2 Timoti 2 - A̠lyiat A̠gwaza na di̠n Tyap: A̠li̠ka̠uli A̠fai

A̱tsotswat A̱tyu Nzwang Yesu Kristi

¹ Mat a̱nia, nwan Timoti nggwon nung mi̱ khwi Yesu, gbang a̱lyia̱ mat shok ji nang Kristi Yesu nyia̱ ang ndyo a̱ni.

² Tyiet hu nang a fa̱k nang n tyiet a̱zaghyi á̱niet khwi ma̱ a̱di̱di̱t a̱ni, huhwa yet si̱ hu nang á̱tsotswat á̱niet ba san ba̱ si̱ shim a̱ni. Nwan meang, ma ntyiet á̱ghyang á̱niet ba̱ yet á̱tsotswat a̱ni, da̱nian mba meang ba̱ ma ndyen, ba̱ ka tyiet á̱ghyang á̱niet huu.

³ Gbang a̱lyia̱ ndung ma̱ng a̱nzi̱t di̱ swuo a̱bung hu, nang a̱tsotswat a̱tyu nzwang Yesu Kristi a̱ni.

⁴ A̱tyu nzwang a̱ shya̱ mi̱ nta̱m a̱ni, a̱ ni̱ kwan a̱ nyia̱ kyang hu nang a̱kwak a̱son nggu wu chat a̱ni. A̱wot da̱ nggu, a̱ ni̱ nwuo kyiai a̱pyia̱ nggu di̱ nta̱m a̱sai mbung bah.

⁵ Ma̱ a̱nia wa, a̱tyu a̱ yet nggwon chung a̱ni, a̱ si̱ mi̱n shya̱ zang bah si̱ nang gu khwi doka chung ji.

⁶ A̱wot, a̱tyu khap a̱ nyia̱ ta̱m ba̱t a̱ni, nggu wa ni̱ tsa shya̱ a̱fi̱ng ka di̱ yak hu nang gu kap a̱ni.

⁷ Nyia̱ a̱di̱dam da̱ a̱lyiat nang n shei ang a̱ni. A̱wot A̱gwaza na tyia̱ a fi̱k a̱mgba̱m a̱lyiat nani.

⁸ Nyia̱ a̱di̱dam di̱ Yesu Kristi kuzang jen, a̱tyu nang á̱ ku ta̱ngam ma̱ng swuan ma̱ á̱niet ba̱ ka̱n kwi a̱ni, a̱wot a̱tyu a̱ ku neet mi̱ kwai Da̱wuda ji a̱ni. Tyiet huni hwa yet A̱sham Nkhang ka nang n shei a̱ni.

⁹ Mat A̱sham Nkhang kani nang n shei a̱ni, kikya nang n swuo a̱bung ka. Ku si̱ tat á̱ vwuoi nung ma̱ng a̱nyanyang á̱ ngyei n gyet a̱tyu bwoi a̱bun wa. A̱mgba̱m ma̱ng a̱nia, da̱ mba, á̱ la̱p a̱lyiat A̱gwaza na ma̱ng a̱nyanyang bah.

¹⁰ Huhwa mbyia̱, n gbang a̱lyia̱ ma̱ng kuzang kyang da̱nian á̱niet khwi nang A̱gwaza khai a̱ni, nang mba meang na shya̱ swuan sang sangba̱p nang á̱ shyat neet da̱ a̱vwuo Yesu Kristi a̱ni, ba̱ bu shya̱ a̱kyenkyai shi nggu wu a̱ nwai tyiai a̱ni.

¹¹ A̱lyiat nani yet a̱tsak a̱lyiat wa za̱m: “Ki̱ zi̱ kwi dundung ma̱ng a̱nggu, zi̱ bu na swuan dundung ma̱ng a̱nggu.

¹² Ki̱ zi̱ gbang a̱lyia̱, zi̱ ma na ya tyok hu ndung ma̱ng a̱nggu. Ki̱ zi̱ ma fwuo lyen nggu hu, nggu meang a̱ ma na fwuo lyen nzi̱t hu.

¹³ Ki̱ zi̱ yet á̱niet nwai nyia̱ tsotswat bya, nggu a̱ na yong di̱ nyia̱ tsotswat nggu hu. Mat, a̱ si̱ mi̱n fwuo za̱kwa nggu ji bah.”

A̱tyu Nta̱m nang A̱gwaza Shim gu ndyo a̱ni

¹⁴ Yong mi̱ di̱ jhyung á̱niet ang ba tyiet huni, a bu gba mba a̱zaghyi A̱gwaza, ba̱ yok ya fwuang di̱ swáng a̱lyiat bah. Mat tangka̱i ya fwuang a̱hwa yet a̱tai a̱lyiat wa. A̱wot ji̱ si̱ byia̱ chet nang ji̱ na mbyian á̱niet ba ba̱ fwuong ji a̱ni.

¹⁵ Kwan ba̱t a shya̱ a̱tsak shim da̱ a̱vwuo A̱gwaza, nang a̱tyu nta̱m a̱ nwai fwuong nsum ta̱m nggu hu a̱ni. A tyiet a̱tsak a̱lyiat A̱gwaza wu cha̱chaat.

¹⁶ Tyong zan a ghwon á̱niet a̱tai a̱lyiat chyi A̱gwaza. Mat á̱niet ba̱ lyiat a̱nia a̱ni, ba̱ na mban lak khwi A̱gwaza hu.

¹⁷ A̱lyiat na ba̱ tyiet a̱ni, na̱ teak nang a̱gba̱ndang a̱gap a̱ ya vam a̱yin a̱ni. A̱cha̱chet á̱niet tyiet a̱feang shya̱ ma̱ mba; bibya yet Himinayat ma̱ng Filitut.

¹⁸ Ba̱ wa ka̱n ghwon khwi vak a̱chuchuk hu. A̱wot ba̱ laai á̱niet khwi ba nyia̱, á̱ wa ka̱n ta̱ngam zi̱t ma̱ng swuan ma̱ á̱niet ba̱ ka̱n kwi a̱ni! Di̱ nvak huni hwa ba̱ si̱ ntyia̱ á̱ghyang á̱niet si̱ bwuok lilyim di̱ khwi A̱gwaza hu.

¹⁹ A̱mgba̱m ma̱ng a̱nia, á̱niet khwi nggu ba li nang a̱fang tsa a̱tyin kuntyin nok nang A̱gwaza wu kpaat a̱ni. Á̱ si̱ mi̱n zwun ka bah. A̱wot a̱lyiat nani nia nang á̱ lyuut tazwa nka nyia̱, “A̱gwaza wu lyen á̱si̱ ba̱ yet á̱si̱ nggu a̱ni,” a̱wot, “Konyan wa nyia̱ a̱ khwi A̱gwaza a̱ni, ku yet ta hwa gu ghwon a̱ka̱tuk nyia̱.”

²⁰ Ma̱ a̱gba̱ndang a̱li, á̱ mbyia̱ kyang nta̱m nang á̱ nyia̱ ma̱ng zi̱nariya ma̱ng a̱zurfa wa a̱ni ma̱nyin na bah. Á̱ mun á̱ mbyia̱ si̱ nang á̱ nyia̱ ma̱ng nkwon ma̱ng lyem a̱ni. Njhyang yet si̱ nyia̱ á̱za̱za̱rak nta̱m; njhyang si̱ yet si̱ nyia̱ nta̱m a̱lyuk.

²¹ Konyan wa jaat a̱pyia̱ nggu a̱ ti̱n ma̱ a̱ka̱tuk nkyang a̱ni, á̱ na kyiak gu nang a̱za̱za̱rak nkyang nta̱m a̱ jaat nang a̱tyoli jhyi a̱ na nnyia̱ kuzang a̱chuchuk nta̱m a̱ni.

²² Tyong a̱ka̱tuk nshyuo si̱ yet fi̱ng a̱yin. A̱wot a tyia̱ fwuo di̱ nyia̱ tsotswat, ma̱ng nwuak a̱chuchuk, ma̱ng chat á̱niet, ma̱ng swan swat nyinyang, dundung ma̱ng á̱niet ba̱ dyep A̱gwaza ma̱ng á̱za̱za̱rak nfwuo a̱ni.

²³ Lak kyang ku na mun ang ma̱ng ya fwuang ma̱ tai di̱ ku byia̱ a̱pyia̱ a̱ni bah. A lyen nang a̱lyiat nani na ntyak di̱ zok ja.

²⁴ A̱khwo A̱gwaza, ku myim gu la̱u fwuon zok bah. Da̱ a̱kwonu a̱kya, ku yet ta hwa gu nyia̱ shonshyon ma̱ng konyan; a̱ yet a̱gwak a̱tyu tyiet, a̱ byia̱ shyim fwuo ma̱ng á̱niet ba̱ tyei jhya̱ a̱ni.

²⁵ Ku myim a̱khwo A̱gwaza gu yet a̱tyu ghyuai a̱pyia̱, gu tyiet á̱niet ba̱ nyia̱ fi̱p ma̱ng a̱chuchuk tyiet nggu wu a̱ni. Shimba, A̱gwaza wu na nwuak ba jen ba̱ ghwon a̱ka̱tuk nyia̱ mba wu, a̱wot ba̱ shim nang tyiet hu ngyet a̱chuchuk.

²⁶ A̱jawa ka̱ ba̱ bwuok á̱ bai ma̱ng a̱di̱dam mba wu, ba̱ na shya̱ shot mbwak A̱ta̱nyeang, a̱tyu a̱ ta̱bat mba ma̱ a̱tsi̱ntsat nggu wu. Mat a̱ si̱ ka̱n tyia̱ mba ba̱ ka khwi vak nggu hu a̱ni.