2 Timoti 1 - A̠lyiat A̠gwaza na di̠n Tyap: A̠li̠ka̠uli A̠fai

¹ Nung Bulut, n gyet a̱ta̱m Yesu Kristi mat nang A̱gwaza wa nkhai nung, da̱nian n ka nshei a̱lyiat swuan sang sangba̱p, nang gu nyia̱ a̱li̱ka̱uli á̱ shya̱ di̱ nwuak fwuo di̱ Kristi Yesu a̱ni.

² N dyuut ang wusika jini, n bu mbyiat ang Timoti, nggwon nung mi̱ khwi Kristi nang n chat a̱ni. Yok A̱gwaza a̱ yet A̱tyia̱ a̱ni ma̱ng Kristi Yesu A̱tyoli nzi̱t wu, a̱ fa̱k shok ang, a̱ fa̱k kunak ang, a̱wot a̱ nang ang swat nyinyang.

A̱gwai ma̱ng Tyia̱ Gba̱gbak

³ N gwai A̱gwaza a̱tyu nang n nyia̱ nggu ta̱m hu ma̱ng nwai nyia̱ a̱ka̱tuk nyia̱ nang fwuo nung hu na nkpaat nung a̱ni, ma̱nang a̱yaatyia̱ khwop nzi̱t ba ku nyia̱ a̱ni. Kuzang jen n ni̱ naai A̱gwaza da̱nian ang a̱tyetuk ma̱ng a̱ta̱mam.

⁴ Ki̱ n jhyung ndang a̱ghyi na di̱n jen nang zi̱ ku mbyiat sak a̱ni, a̱wot n ni̱ nchat n di ang ba̱t, da̱nian n ka nfa̱k a̱lyia̱ sai.

⁵ N jhyung a̱tsatsak nwuak fwuo ang wu da̱ Yesu, ma̱nang a̱yang a̱khwop ang wu Luwit, mbeang a̱yang byin ang wu Yunit ku nnwuak fwuo da̱ nggu a̱ni. A̱wot n dyen nang a na ngya a̱son a mbeang di̱ nwuak fwuo ang hu da̱ Yesu.

⁶ Huhwa mbyia̱, n chat n jhyung ang a fuut za̱nang chet ang ji shansham. Za̱nang chet ji nang A̱za̱za̱rak Ntswa A̱gwaza ku nang ang nang n ku nsak ang mbwak di̱n jen nwuo ta̱m ang ji a̱ni.

⁷ Mat A̱za̱za̱rak Ntswa nang A̱gwaza nang zi̱t a̱ni, a̱ yet a̱si̱ tyei nzi̱t a̱wun nia bah. Da̱ a̱kwonu a̱kya, a̱ tyei nzi̱t zi̱ yong mi̱ chet hwa, zi̱ chat á̱ghyang nzi̱t, zi̱ bu chat A̱gwaza, a̱wot zi̱ ta̱bat á̱pyia̱ nzi̱t shansham.

⁸ Mat a̱nia, yok fa̱k nsum di̱ shei A̱sham nkhang Yesu ka bah. A̱wot a bu yok fa̱k nsum nung nang n shya̱ mi̱ khwo hu da̱nian nggu a̱ni bah. Da̱ a̱kwonu a̱kya, nyi gbang a̱lyia̱ di̱ swuo a̱bung hu dundung mat A̱sham Nkhang Yesu mami chet A̱gwaza hu.

⁹ Nggu wa san zi̱t, a̱ si̱ yei nzi̱t zi̱ ka swan a̱za̱za̱rak nswat. A̱ san zi̱t mat kyang nang zi̱ nyia̱ wa a̱ni bah; a̱wot da̱nian la̱p sak gu hwa ma̱ng shok nggu ji. A̱ ku nyia̱ zi̱t shok jini da̱ a̱vwuo Kristi Yesu, neet nang á̱ ka̱n mat swanta hu bah.

¹⁰ A̱wot ma̱ninika di̱ bai Yesu Kristi A̱tyusan nzi̱t, huhwa nang á̱ si̱ ntyai nzi̱t shok jini kpa̱sai. Nggu wa tyak ma̱ng chet a̱khwu hu. A̱wot di̱n vak A̱sham Nkhang huni hwa nang gu ntyai nzi̱t swuan sang sangba̱p ji kpa̱sai.

¹¹ A̱wot A̱gwaza wu khai nung, n gyet a̱ta̱m Yesu n shei A̱sham Nkhang kani, n bu tyiet kaa.

¹² Huhwa mbyia̱ nang n swuo a̱bung kani. A̱mgba̱m ma̱ng a̱nia, n fa̱k nsum bah. Mat n dyen a̱tyu nang n nwuak fwuo da̱ nggu a̱ni. A̱wot n bu ngbang a̱lyia̱ a̱ maai a̱ chok A̱sham Nkhang ka nang nggu tyia̱ nung ndyo mbwak a̱ni, si̱ nat mam hu nang gu na mbwuok a̱ bai a̱ni.

¹³ Ba̱ng kidee a̱chuchuk tyiet ji nang a shya̱ da̱ a̱vwuo nung a̱ni shansham. Ku yet kidee nang a na khwi a̱ni. A̱wot a yong di̱ nwuak a̱chuchuk da̱ nhu. A mban di̱ chat nang a shya̱ di̱ mun á̱pyia̱ ma̱ng Kristi Yesu a̱ni.

¹⁴ Chok A̱sham Nkhang ka nang á̱ tyia̱ ang ndyo mbwak a̱ni, mat chet A̱za̱za̱rak Ntswa hu a̱ shya̱ ma̱ng nzi̱t a̱ni.

¹⁵ A lyen nang á̱niet khwi ma̱ a̱di̱di̱t mi̱ fam a̱byin A̱siya hu nang nung a̱ma, mbeang Faija̱lut ma̱ng Hamoja̱ni̱t.

¹⁶ A̱wot yok A̱gwaza a̱ fa̱k kunak kyang bwak Oni̱siforut, mat kuzang jen a̱ ni̱ bai a̱ ba̱ shyim nung fwuo hu. A̱ tyia̱ nung gba̱gbak. A̱ ku fa̱k nsum mat nang n shya̱ di̱ la̱p ma̱ng a̱nyanyang mi̱ khwo hu a̱ni bah.

¹⁷ Da̱ a̱kwonu a̱kya, mi̱ di̱ chyok bai nggu hu mi̱ Rom, a̱ si̱ kup á̱ghyi di̱ chat nung di̱ tityan ma̱ a̱di̱di̱t, si̱ nang gu nshya̱ nung.

¹⁸ Yok A̱gwaza wu a̱ fa̱k kunak Oni̱siforut a̱tuk bwuok bai Yesu ka! A̱wot a lyen ba̱t si̱sak ji nang Oni̱siforut ku mbeang nung ba̱t ma̱ a̱keang A̱fisut a̱ni.