2 Bitut 3 - A̠lyiat A̠gwaza na di̠n Tyap: A̠li̠ka̠uli A̠fai

Yesu na Bwuok a̱ Bai Chi̱k

¹ Nyin á̱niet khwi Yesu ba nang n chat a̱ni, wusika jini ja yet sweang ji nang n dyuut nyin dyo a̱ni. Mami a̱mgba̱m ji sweang, n kwan n tyia̱ nyin á̱za̱za̱rak ma̱ng á̱tsatsak a̱di̱dam, nyi bu jhyung tyiet huni.

² N chat nyi jhyung shei á̱zanson nang á̱za̱za̱rak a̱yaata̱m a̱kwonu A̱gwaza ba ku shei neet gbangbang a̱ni, ma̱ng tyiet hu nang A̱tyoli ma̱ng A̱tyusan nzi̱t wu ku nnwuak nzi̱t a̱yaata̱m nggu ba da̱nian nyin a̱ni.

³ Kyang nyiung nang n chat n jhyung nyin a̱ni, huhwa yet; di̱ ngaan njen wu, nang Yesu ka̱n bwuok a̱ bai bah, á̱niet na ghwut ba̱ mai á̱niet khwi ba di̱ lihyat tazwa bwuok bai Yesu hu. A̱wot ba̱ na khwi a̱ka̱tuk shyuo nfwuo mba wu.

⁴ Ba̱ na mai ba di̱ lihyat nyia̱, “Yesu ku nyia̱ a̱li̱ka̱uli nyia̱ a̱ na bwuok a̱ bai, ma̱ a̱ ka̱n bwuok a? Neet nang a̱yaatyia̱ a̱khwop nzi̱t ba ka̱n kwi bah, kuzang kyang ni̱ li ma̱ cha̱chaat ma̱nang á̱ ku mmat swanta hu a̱ni!”

⁵ Á̱niet ba̱ lyiat lihyat hu a̱ni, ba̱ lak lyen hu ma̱ kpa̱a̱t nang A̱gwaza mat kyai tswazwa ma̱ng a̱byin ma̱ng swang a̱lyiat a̱bwonu nggu ja. A̱wot a̱ si̱ mat a̱byin ka neet ma̱ a̱sa̱khwot nia. A̱sa̱khwot na si̱ tyong a̱byin ka á̱ keang.

⁶ A̱wot ma̱ng a̱sa̱khwot a̱nia nia nang A̱gwaza ku nyia̱ a̱gba̱ndang a̱sa̱khwot a̱ri̱giwa wu. A̱ si̱ mbuk swanta hu gbangbang.

⁷ A̱wot ma a̱nia wa, ma̱ng swang a̱lyiat a̱bwonu nggu ja nang á̱ sak kyai tswazwa ma̱ng a̱byin ma̱ninika, ba̱ swan á̱ fwuong long A̱gwaza hu. Á̱ sak ba á̱ fwuong a̱tuk mam shi̱ri̱ya ka, nang á̱ na ntyak ma̱ng á̱niet ba ba̱ nwai khwi A̱gwaza wu a̱ni.

⁸ A̱wot nyin á̱niet khwi Yesu ba nang n chat a̱ni, nyi yok bwung a̱lyiat nani bah: Da̱ a̱vwuo A̱gwaza, mam nyiung li nang a̱lyia̱ chyikwop a̱ni. A̱wot a̱lyia̱ chyikwop si̱ li nang mam nyiung a̱ni.

⁹ Mat a̱nia, nyi lyen nang A̱gwaza wu nkwak vam di̱ nyia̱ a̱li̱ka̱uli ma̱ cha̱chaat nang gu la̱p a̱ni bah, nang á̱ghyang á̱niet nfa nyia̱ a̱ kwak vam a̱ni. Kaai! A̱nia wa bah! A̱ nyeap fwuo ma̱ng a̱nyin, mat a̱ chat a̱yin ma̱ nyin a̱ khwu bah. A̱wot a̱ chat kuzang a̱yin a̱ bwuak a̱ ghwon a̱ka̱tuk nyia̱ nggu wu wa.

¹⁰ A̱wot mam A̱gwaza hu chobai di̱n jen nang nyi nfa a̱ni bah, ma̱nang a̱tang ni̱ mbai gba̱ngba̱ng di̱n jen nang a lyen a̱ni bah. A̱wot a̱tuk a̱kya, kyai tswazwa hu na swak ma̱ng a̱khwom na̱ tyei a̱wun a̱ni. A̱wot ji̱ na ta̱yuut. A̱wot kuzang kyang mi̱ kyai tswazwa hu na fwui. A̱wot a̱byin ka ma̱ng nkyang na̱ shya̱ ma̱ nka a̱ni, na fwui mameang.

¹¹ Ka̱ A̱gwaza na fwui a̱mgba̱m nkyang nani a̱nia, zang tangka̱i á̱niet hwa myim nyi yet? Ku myim swat nyin hu ku yet a̱za̱za̱rak di̱ khwi A̱gwaza shansham.

¹² Nyi swan ma̱ng di̱dang fwuong a̱tuk mam A̱gwaza ka ka̱ bai. Nyi kwan nyi li ka̱ bai a̱nggang. A̱tuk a̱kya, a̱ na fwui kyai tswazwa hu ma̱ng long. A̱wot nkyang na nang á̱ nyia̱ tswazwa a̱ni, na̱ na fwui na̱ byii̱k ma̱ a̱lya̱ra̱p ndong.

¹³ A̱mgba̱m ma̱ng a̱nia, zi̱ swan ma̱ng di̱dang fwuong nkyai tswazwa nfai ma̱ng a̱byin a̱fai, nang A̱gwaza nyia̱ a̱li̱ka̱uli wu a̱ na mat nzi̱t ndyo a̱ni, a̱vwuo nang nyia̱ tsotswat nshya̱ a̱ni.

¹⁴ Mat a̱nia, nyin á̱niet khwi Yesu ba nang n chat a̱ni, nang nyi swan nfwuong a̱tuk a̱kya a̱ni, nyi kwan ba̱t á̱ shya̱ nyin nang nyi swan swat nyinyang ku yet a̱za̱za̱rak a̱ni. Nyi ghwon a̱ka̱tuk nyia̱, nyi yet á̱niet sang a̱bun a̱zaghyi A̱gwaza.

¹⁵ A̱wot nyi jhyung nyap fwuo A̱gwaza A̱tyoli nzi̱t hu, a̱ nwuat á̱niet ba jen ja ba̱ ka shya̱ san hwa. A̱lyiat nani nia nang Bulut meang, a̱na̱nyiuk nzi̱t wu mi̱ khwi Kristi nang zi̱ chat a̱ni, lyuut nyin dyo, di̱ mumwang nang A̱gwaza nang gu a̱ni.

¹⁶ Bulut lyuut a̱lyiat nani mi̱ a̱mgba̱m wusiká nggu ji. Tyiet gu ghyang vwuo a̱khwu, a̱yin a̱ fi̱k hu. A̱wot á̱niet ba̱ chyi kyang ma̱ng sang chet mi̱ khwi a̱ni, ba̱ shei a̱lyiat nggu na na̱ fa kyang ghyang ma̱ zan a̱ni; ma̱nang ba̱ nnyia̱ ma̱ng á̱kum A̱lyiat A̱gwaza ka a̱ni. A̱wot si̱ huni na bai ma̱ng a̱mba a̱khwu.

Byat Ngaan hu

¹⁷ Mat a̱nia, nyin á̱niet khwi Yesu ba nang n chat a̱ni, nang nyi ka̱n dyen a̱nia a̱ni, nyi cham á̱pyia̱ nyin, kalak á̱niet tyiet a̱ka̱laa bani, ba̱ lak khwi doka A̱gwaza ji a̱ni, ba̱ bwan nfwuo nyin na. Nyi ghyuap di̱ nyia̱ a̱chuchuk, nyi ka kwa di̱ yong mi̱ chet nyin hu.

¹⁸ Da̱ a̱kwonu a̱kya, nyi ya a̱son ma̱ng mban hwa mami shok ma̱ng lyen A̱tyoli Yesu Kristi A̱tyusan nzi̱t wu. Yok a̱kyenkyai shi a̱ yet si̱ nggu ma̱nini, ba̱ng si̱ nat sang sangba̱p! Samba̱rka!