2 Bitut 2 - A̠lyiat A̠gwaza na di̠n Tyap: A̠li̠ka̠uli A̠fai

Yok Á̱niet Khwi ba̱ Ta̱bam ma̱ng Á̱niet Tyiet A̱ka̱laa

¹ A̱wot gbangbang, á̱ ku byia̱ á̱niet ba̱ ku kyiak pyipyia̱ mba nyia̱ ba̱ yet á̱tsak a̱yaata̱m a̱kwonu A̱gwaza ba ma̱ á̱niet Isi̱rela, ma̱nang á̱ na mbyia̱ á̱niet tyiet a̱ka̱laa ma̱ nyin a̱ni. Ba̱ na bai ma̱ng tyiet ghyang da̱ bang ku na tyia̱ á̱niet ba ba̱ teap a̱ni. A̱wot si̱ a̱hwa hwa ma̱nyin hu bah. Ba̱ na fwuo lyen Yesu A̱tyoli nzi̱t wu a̱ san mba a̱ni. Si̱ a̱hwa na tyia̱ ba̱ khwat á̱pyia̱ mba a̱khwu ma a̱nggang.

² Á̱ghyang á̱niet ma̱ a̱di̱di̱t na khwi a̱ka̱tuk tyiet mba wu ma̱ng a̱shi̱shi̱k nyia̱ sang nsum mba wu nang a̱ka̱la̱m a̱ni. Á̱niet tyiet a̱ka̱laa a̱bya, na tyia̱ á̱niet nwai khwi Yesu ba̱ lyiat a̱ka̱tuk a̱lyiat tazwa vak a̱chuchuk hu.

³ Mat a̱dodo wuwok mba wu, ba̱ na bai ma̱ng nvak a̱ka̱laa, da̱nian ba̱ ka shya̱ kurum di̱ shyuo nyin. A̱wot A̱gwaza wa ka̱n faat ba shi̱ri̱ya a̱khwu neet a̱fwun bah. Mat a̱nia, a̱khwu mba ka na byian jen bah.

⁴ Ma a̱nia wa, ku a̱yaata̱m tswá A̱gwaza ba, ba̱ ku nyia̱ a̱ka̱tuk nyia̱ wu a̱ni, A̱gwaza ku ghwon mba bah. Da̱ a̱kwonu a̱kya, a̱ si̱ la̱p ba, a̱ si̱ ta mba ma̱ a̱tsuung mbwong sang sangba̱p ku yet a̱gbi̱ri̱ng ndyin a̱ni. Á̱ ba̱ng ba a̱ja á̱ nfwuong mam shi̱ri̱ya hu.

⁵ Ma a̱nia wa swanta gbangbang hu, A̱gwaza ku ghwon á̱niet ba, ba̱ ku nyia̱ a̱ka̱tuk nyia̱ wu a̱ni bah. Mi̱ Nuhu wa ma̱ng á̱niet a̱natat ba̱ yet kyang bwak nggu hu a̱ni ma̱nyin mba gu ku ghwon. Nuhu ku gba á̱niet swanta ba tazwa a̱tsotswat shi̱ri̱ya A̱gwaza ji chobai a̱ni. Mat a̱nia, A̱gwaza si̱ chok Nuhu di̱n jen nang gu ku nhyat á̱niet ba̱ lak khwi A̱gwaza mi̱ swanta hu a̱ni ma̱ng a̱sa̱khwot a̱ri̱giwa.

⁶ Nang si̱ a̱hwa nswak a̱ni, A̱gwaza ku mun a̱ faat shi̱ri̱ya a̱khwu tazwa á̱niet Sodom ma̱ng Goma̱ra. A̱ si̱ fwui mba ma̱ng long. Ba̱ si̱ tyia̱ ntong. A̱gwaza ku nyia̱ mba a̱nia, ba̱ ka yet kidee shi̱ri̱ya ji̱ na shya̱ á̱niet ba̱ lak khwi a̱lyiat A̱gwaza na a̱ni.

⁷ A̱wot A̱gwaza si̱ bu ti̱n Lutu a̱ ghwut ndyo mi̱ Sodom, mat Lot ku yet a̱tsotswat a̱yin wa. Á̱niet lak khwi kuzang tangka̱i doka ma̱ng á̱niet nyia̱ a̱shi̱shi̱k nyia̱ nang a̱ka̱la̱m ba̱ swan dundung ma̱ng a̱nggu a̱ni, si̱ ghwut gu a̱pyia̱.

⁸ A̱tsatsak a̱lyiat, Lot ku yet a̱tsotswat a̱yin wa. Fwuo nggu hu si̱ byian ba̱t mat a̱ka̱tuk nyia̱ nang gu nwuan, a̱ si̱ bu fwuong kuzang a̱tuk a̱ni.

⁹ Ka̱ ku li a̱nia, ku tak nang A̱gwaza ndyen si̱sak ji gu na nsan á̱niet khwi nggu ba di̱n jen mak mba ji a̱ni. A̱ si̱ bu lyen si̱sak gu na ntyia̱ á̱niet a̱ka̱tuk nyia̱ swuo a̱bung mi̱ swanta huni a̱ni. Ku bu tak nang gu ndyen si̱sak ji nang gu na nsak á̱ka̱tuk á̱niet á̱ nfwuong mam á̱ na nfaat mba shi̱ri̱ya ngaan ji a̱ni.

¹⁰ Shi̱ri̱ya nang A̱gwaza na nyia̱ á̱niet ba̱ khwi a̱ka̱tuk shyuo nvam ji̱ tyei mba a̱na̱ndyung a̱ni, ma̱ng á̱si̱ ba̱ jhyuai tyok nggu hu a̱ni, ji̱ na swak ma̱ng byia̱ chet. Á̱niet tyiet bwoi a̱ka̱laa bani yet á̱niet lak fwuong bya ma̱ng gba̱p a̱pyia̱. A̱wot da̱ mba, ba̱ fwuong a̱wun kyang bah. Ba̱ lyiat tswá ji̱ byia̱ shi Ma A̱gwaza tswazwa a̱ni lihyat.

¹¹ A̱wot a̱yaata̱m tswá A̱gwaza ba ba̱ byia̱ tyok ma̱ng chet a̱ swak á̱niet tyiet a̱ka̱laa a̱bya a̱ni, jen nang ba̱ ni̱ mbat tswá ji, ji̱ byia̱ shi Ma A̱gwaza tswazwa a̱bun a̱ni, ba̱ ni̱ bat ji a̱bun di̱ lihyat bah.

¹² A̱wot á̱niet tyiet a̱ka̱laa bani li nang nyam a̱yit ji̱ sang a̱di̱dam a̱ni. Ba̱ nyia̱ kyang nang nvam mba na tak ba, ba̱ nyia̱ wa a̱ni. Ma̱nang nyam a̱yit a̱ni, á̱ mat ba da̱nian á̱ ka ya̱baat ba á̱ fak mameang. Ba̱ lyiat á̱ghyang á̱niet lihyat di̱ tyiet da̱nang ba̱ fi̱k a̱ni bah. A̱wot á̱ na hyaai mba ma̱nang nyam a̱yit a̱ni.

¹³ Swuo a̱bung mba hu hwa na yet zang mba ji mat a̱ka̱kpa̱t nang ba̱ nyia̱ a̱ni. Ku a̱ta̱mam ba̱ ni̱ chat ba̱ tyai á̱pyia̱ mba kpa̱sai di̱ fa̱k nyinyang ya á̱ tsa nswuo. Ba̱ yet kyang nsum hwa. A̱wot ba̱ si̱ tyia̱ á̱niet khwi ba nsum ma̱ng a̱na̱ndyung. Ba̱ fwuong nyinyang bwoi a̱ka̱laa, ku nang ba̱ ngya nkyayak mun á̱pyia̱ dundung ma̱ng a̱nyin a̱ni.

¹⁴ Á̱ghyi mba ba tyei mba shyuo a̱shi̱shi̱k nyia̱ nang a̱ka̱la̱m a̱ni. A̱wot di̱dang nyia̱ a̱ka̱tuk nyia̱ maai mba bah. Ba̱ laai á̱niet nwai yong mi̱ chet ba̱ nyia̱ a̱ka̱tuk nyia̱. A̱wot ba̱ yet a̱yaagwak bya di̱ nyia̱ wuwok. A̱gwaza ka̱n shyi mbaa.

¹⁵ Á̱niet tyiet a̱ka̱laa bani, teap ba̱ si̱ ghwon a̱tan nvak wu. A̱wot ba̱ si̱ khwi vak Ba̱lam nggwon Ba̱yor. Nggu wa ku chat a̱ shya̱ kurum ba̱t. Huhwa si̱ tyia̱ a̱ si̱ byia̱ fwuo nyia̱ a̱ka̱tuk nyia̱.

¹⁶ A̱wot a̱ka̱za̱nki si̱ kam nggu da̱ a̱ka̱tuk nyia̱ nggu wu, nang ka̱ ku ndyiat ma̱ng a̱nggu ma̱ng a̱nwuat a̱tyubishyi a̱ni. Di̱ nvak huni hwa a̱lyiat a̱ka̱za̱nki na si̱ nvwuong gu nyia̱ a̱ka̱tuk ma̱ng ki̱ngkang hu nang gu ku chat nyia̱ a̱ni.

¹⁷ Á̱niet tyiet a̱ka̱laa bani yet á̱buk á̱niet bya, ba̱ ni̱ laai á̱niet nang nnang a̱sa̱khwot ku myim ku byia̱ a̱sa̱khwot, a̱wot ku si̱ fi̱k a̱ni. Ba̱ si̱ bu li nang á̱ni̱nian ku tak nang za na nva a̱ni. A̱wot wun hu si̱ hyap hu a̱ seang. A̱gwaza wa ka̱n khap ba a̱ sak da̱ a̱vwuo ka̱ yet a̱gbi̱ri̱ng ndyin a̱ni.

¹⁸ Á̱niet tyiet bwoi a̱ka̱laa a̱bya tam da̱ á̱pyia̱ mba ma̱ng a̱tai a̱lyiat. A̱wot ba̱ ghwon á̱niet ba̱ khwi shyuo nvam mba ji, ku tyia̱ ba̱ nwuo a̱shi̱shi̱k nyia̱ nang a̱ka̱la̱m a̱ni. A̱ni wa ba̱ ndaai á̱niet ba, ba̱ sii tsa ghwut ma̱ á̱niet ba̱ nyia̱ a̱ka̱tuk a̱ni.

¹⁹ Ba̱ nyia̱ mba a̱li̱ka̱uli shya̱ a̱wat, nang ba̱ na nyia̱ kyang hu ba̱ chat a̱ni. A̱wot mba ma̱ á̱pyia̱ mba ba̱ yet á̱khwo a̱ka̱tuk nyia̱ ma̱ng shyuo. Mat konyan yet a̱khwo kyang nang gu shim ku nyia̱ tyok mi̱ fwuo nggu hu a̱ni.

²⁰ A̱wot ka̱ a̱yin ka̱n shya̱ shot da̱ a̱na̱ndyung a̱ka̱kpa̱t swanta na di̱ lyen A̱tyoli nzi̱t wu Yesu Kristi A̱tyusan; a̱wot a̱ si̱ bu bwuak a̱ si̱ ta̱bat nyia̱ a̱ka̱tuk nyia̱, a̱wot a̱ka̱tuk nyia̱ wu si̱ swuo chet gu, swat ngaan nggu hu na swak si̱ gu ntsa a̱ni mi̱ yet a̱ka̱tuk.

²¹ Ma a̱nia wa, ku na lan á̱niet tyiet a̱ka̱laa a̱bya ka̱nang ba̱ wa ka̱n dyen a̱tsotswat nvak wu neet di̱n tsa hu bah, nang ba̱ na ndyen nhu, a̱wot ba̱ sii ghwon khwi doka nang á̱ ku nwuak ba ba̱ swan a̱za̱za̱rak nswat a̱ni.

²² Ba̱ bwuok á̱ nat a̱ka̱tuk nyia̱ nang ba̱ ntsa a̱ni, ku nat cha̱chaat nang á̱ ni̱ nyia̱, “A̱bwu ka̱ kwa̱i a̱ni, ka̱ bu bwuok ka̱ si̱ niai kwa̱i nka hu.” Á̱ bu ni̱ nyia̱ a̱ni, “A̱kusuru nang á̱ swuo a̱ni, a̱ bu bwuok a̱ nat a̱ si̱si̱ byii̱t mi̱ bwang.”