2 Bitut 1 - A̠lyiat A̠gwaza na di̠n Tyap: A̠li̠ka̠uli A̠fai

Byat

¹ Nung, Siman Bitut, a̱khwo ma̱ng a̱ta̱m Yesu Kristi, n dyuut nyin wusika jini, nyin á̱niet ba nyi san a̱tsatsak nwuak a̱chuchuk cha̱chaat ma̱ng a̱nzi̱t a̱ni. Á̱ ku nang nyin nwuak a̱chuchuk huni, mat a̱chuchuk ma̱ng tsotswat Yesu Kristi a̱ yet A̱gwaza ma̱ng A̱tyusan nzi̱t wu a̱ni.

² Yok A̱gwaza a̱ ya a̱son ma̱ng fwuong shok nyin, ma̱ng nwuat nyin swat nyinyang nang nyi mban gba̱mgbam mi̱ lyen A̱gwaza ma̱ng Yesu a̱ yet A̱tyoli nzi̱t wu a̱ni.

Yok Á̱niet Khwi ba̱ Mban A̱tan Za̱kwa di̱ Khwi A̱gwaza

³ Mat chet A̱gwaza hwa, nang Yesu nnang zi̱t kuzang kyang nang zi̱ chat mi̱ swat khwi ku myim gu a̱ni. Zi̱ ka̱n san kuzang kyang mat si̱sak nang zi̱ ndyen gu a̱ni. Nggu wa yorong zi̱t da̱ a̱vwuo nggu zi̱ shya̱ shi ma̱ng yet a̱tan nggu hu, ku swak si̱ konyan a̱ni.

⁴ A̱wot mat nang A̱gwaza nshi a̱ si̱ bu swak ma̱ng yet a̱tan a̱ni, a̱ si̱ nyia̱ nzi̱t a̱cha̱chet ma̱ng á̱tsatsak a̱li̱ka̱uli nggu ba. Á̱tsatsak a̱li̱ka̱uli bani bya na tyia̱ nyi nyia̱ a̱tan nang A̱gwaza a̱ni. A̱wot nyi shot a̱ka̱tuk nshyuo á̱nietbishyi mi̱ swanta, ji̱ byian za̱kwa nyin ji a̱ni.

⁵ Mat a̱mgba̱m a̱yaali̱ka̱uli bani nang A̱gwaza nyia̱ nzi̱t ndyo a̱ni, nyi mbeang nwuak fwuo nyin hu di̱ Yesu mat ntangka̱i za̱kwa nani; nyi nwuak fwuo di̱ Yesu ma̱nyin nggu bah, nyi mbeang nyia̱ a̱tan ta̱m mameang. Nyi nyia̱ a̱tan ta̱m ma̱nyin hu bah, nyi mbeang lyen A̱gwaza mameang.

⁶ Nyi lyen A̱gwaza ma̱nyin nggu bah, nyi mbeang ya̱baat á̱pyia̱ mameang. Nyi ya̱baat á̱pyia̱ ma̱nyin hu bah, nyi mbeang gbang a̱lyia̱ mameang. Nyi gbang a̱lyia̱ ma̱nyin hu bah, nyi mbeang khwi A̱gwaza di̱n vak hu myim gu a̱ni.

⁷ A̱wot nyi khwi A̱gwaza di̱n vak ku myim gu a̱ni ma̱nyin hu bah, nyi mbeang fa̱k da̱ á̱na̱nyiuk nyin ba, ba̱ yet á̱niet khwi a̱ni mameang. Nyi fa̱k da̱ á̱na̱nyiuk ba̱ yet á̱niet khwi a̱ni ma̱nyin mba bah, nyi mbeang chat konyan mameang.

⁸ Ma̱nang nyi mban ma̱ng ntangka̱i za̱kwa nani gba̱mgbam a̱ni, ma a̱nia wa ku na tyia̱ nyi nyia̱ ta̱m shansham, nyi mban ma̱ng a̱fi̱ng di̱ lyen Yesu Kristi, A̱tyoli nzi̱t wu.

⁹ A̱wot á̱niet ba̱ sang tangka̱i za̱kwa huni a̱ni, ba̱ nwuan shansham bah. Ba̱ si̱ yet á̱niet a̱fi̱fan bya. Ba̱ si̱ bwung nang á̱ nchi a̱ka̱tuk nyia̱ mba wu, nang ba̱ nyia̱ di̱n jen nwai khwi Yesu ji a̱ni.

¹⁰ Mat a̱nia, nyin á̱niet khwi Yesu ba nang n chat a̱ni, nyi kwan ba̱t nyi nyia̱ ta̱m ma̱ng tangka̱i za̱kwa huni. Nyi tak chi̱k nang A̱gwaza wa ngyei nyin, a̱ si̱ bu khai nyin. Mat ki̱ nyi nyia̱ a̱nia, nyi si̱ mi̱n mak kwa, nyi bwuok lilyim di̱ nwuak a̱chuchuk nyin hu bah, ku ma̱ chunchwiit.

¹¹ Nang ku ndi a̱nia a̱ni, A̱gwaza na shim á̱ san nyin mbwak nfeang mi̱ Tyok sang sangba̱p A̱tyoli Yesu Kristi, A̱tyusan nzi̱t wu.

Si̱sak á̱ na Ndyen A̱tsatsak Tyiet a̱ni

¹² Mat a̱nia, n na jhyung nyin nkyang nani nchi̱ri̱ng, ku nang nyi ndyen naa, nyi si̱ bu yong mi̱ chet di̱ nwuak a̱chuchuk di̱ tyiet nang á̱ ka̱n tyiet nyin a̱ni.

¹³ A̱wot ku yet a̱sham, ki̱ n ni̱ shya̱ ma̱ng swuan, n gya a̱son ma̱ng jhyung nyin.

¹⁴ Mat A̱tyoli nzi̱t wu, Yesu Kristi, ka̱n tyai nung ndyo, nang ku ngyet ta hwa, á̱ na labeang bah, n na ghwon swanta huni.

¹⁵ A̱wot n kwan ba̱t ma̱nini n tak ma̱ng a̱nyin tyiet huni, nyi ka jhyung hu mi̱ nfwuo nyin na kuzang jen, ku nang n ka̱n ghwon swanta huni.

¹⁶ Di̱n jen nang zi̱ ku nshei nyin nkhang nang Yesu Kristi A̱tyoli nzi̱t wu na mbai ma̱ng chet a̱ni, zi̱ ku tsaai nyin tashikum mumwang ja bah. Da̱ a̱kwonu a̱kya, zi̱ ku li a̱kyenkyai shi tyok nggu wu ma̱ng á̱ghyi nzi̱t bya,

¹⁷ jen nang gu ku nsan a̱kyenkyai shi ma̱ng tyok da̱ a̱vwuo A̱gwaza a̱ yet A̱tyia̱ a̱ni. A̱nwuat a̱kyenkyai shi tyok nggu ka si̱ neet Ma A̱gwaza tswazwa, ka̱ si̱ nyia̱ ma̱ng a̱nzi̱t, “Di, nggwon nung kya ka nang n chat a̱ni! Ka̱ nwuat nung a̱gba̱ndang a̱lyia̱ sai!”

¹⁸ Nzi̱t ma̱ á̱pyia̱ nzi̱t, zi̱ ku fa̱k a̱nwuat a̱kya ka̱ neet Ma A̱gwaza tswazwa, nang zi̱ shya̱ dundung ma̱ng Yesu tazwa a̱za̱za̱rak a̱fan wu.

¹⁹ Mat kyang a̱nia nang zi̱ ku li a̱ni, zi̱ gbang a̱lyia̱ ba̱t nang a̱yaata̱m a̱kwonu A̱gwaza ba ndyiat a̱tsak a̱lyiat wa. Ku yet ta hwa nyi myiai a̱fufwuo da̱ a̱lyiat nang ba̱ lyuut a̱ni. Mat á̱lyiat mba na tyai nkyang nang long sang ku sai da̱ a̱vwuo ka̱ yet lyin a̱ni, si̱ nang shong a̱tson bai, a̱wot Kristi A̱ yet A̱na̱ndan Tsotson a̱ni, a̱ sai mi̱ fwuo nyin na.

²⁰ Kyang ku swak a̱ni, huhwa yet; ku yet ta hwa nyi fi̱k nang a̱mgba̱m tak á̱zanson ma̱ A̱lyiat A̱gwaza na, ku bai mat mumwang a̱yaata̱m a̱kwonu A̱gwaza hwa bah.

²¹ Ku na̱ neet da̱ a̱vwuo a̱di̱dam á̱nietbishyi wa bah. Kaai, da̱ a̱kwonu a̱kya, a̱yaata̱m a̱kwonu A̱gwaza a̱bya ku lyiat mat A̱za̱za̱rak Ntswa wa ku nwuo mi̱ nfwuo mba na. A̱wot ba̱ si̱ lyiat á̱ lyuut nkyang nang A̱gwaza tak ma̱ng a̱mba a̱ni.