2 A̱ta̱solonikawa 3 - A̠lyiat A̠gwaza na di̠n Tyap: A̠li̠ka̠uli A̠fai

Bulut Chat Á̱niet Khwi ba̱ Naai A̱gwaza da̱nian guu

¹ Di̱ ngaan hu á̱niet khwi Yesu ba nang n chat a̱ni, zi̱ chat nyi naai A̱gwaza da̱nian zi̱t, nang A̱lyiat A̱gwaza na na nteak a̱ kai a̱vwuo ka ma a̱nggang a̱ni, a̱wot á̱niet ba ba̱ san naa, ba̱ chyin ba̱ khwi naa, ma̱nang nyi ku nsan nyi si̱ khwi na a̱ni.

² Nyi bu naai A̱gwaza da̱nian a̱ ka san zi̱t mbwak a̱ka̱tuk á̱niet ma̱ng á̱si̱ ba̱ nyia̱ a̱ka̱kpa̱t a̱ni. Mat á̱niet ma̱ a̱di̱di̱t ba̱ ka̱n nwuak a̱chuchuk da̱ A̱lyiat A̱gwaza na bah.

³ A̱wot A̱tyoli Yesu yet a̱tsotswat wa. A̱ na tyia̱ nyin gba̱gbak nyi yong mi̱ chet. A̱ bu ti̱n nyin bwak a̱ka̱tuk a̱yin a̱wa, nggu wa yet A̱ta̱nyeang ka.

⁴ Zi̱ byia̱ gbang a̱lyia̱ nang A̱tyoli Yesu na ntyia̱ nyi khwi tyiet nzi̱t hu, a̱wot nyi bu ya a̱son ma̱ng khwi huu.

⁵ Yok A̱tyoli Yesu, gu tyai nyin kpa̱sai, di̱ si̱sak ji nang A̱gwaza nchat nyin a̱ni; a̱ bu beang nyin nyi gbang a̱lyia̱, nyi nyap nfwuo nyi yong mi̱ chet ma̱nang nggu Yesu Kristi ku nnyia̱ a̱ni.

Gba tazwa Á̱niet Khwi ba̱ Nyia̱ Buk a̱ni

⁶ Á̱na̱nyiuk nzi̱t ba mi̱ khwi Yesu nang zi̱ chat a̱ni, zi̱ kam nyin mami a̱lyoot A̱tyoli Yesu Kristi; nyi ghwut vak a̱tyu khwi a̱ yet a̱buk a̱yin a̱ lak nyia̱ ta̱m a̱ni, a̱wot a̱ si̱ lak khwi tyiet hu nang zi̱ ku tyiet ba a̱ni.

⁷ Mat nyin, nyi lyen si̱sak ji nang ku mmyim nyi maat zi̱t a̱ni. Jen ji nang zi̱ ku nshya̱ ma̱ng a̱nyin a̱ni, zi̱ ku nyia̱ buk bah.

⁸ Da̱ nzi̱t, zi̱ ku ya kyayak a̱yin da̱ mi̱ nwai tan bah. Da̱ a̱kwonu a̱kya, zi̱ ku nyia̱ ta̱m a̱ta̱mam ma̱ng a̱tyetuk. Zi̱ si̱ nyia̱ ta̱m nkan a̱lahyia̱, mat zi̱ ku chat zi̱ yet kpa̱t da̱ a̱vwuo a̱yin bah.

⁹ Zi̱ ku nyia̱ ta̱m hu a̱nia, ku nang zi̱ mbyia̱ a̱wat za̱m nyi beang zi̱t a̱ni. A̱wot zi̱ ku nyia̱ nta̱m a̱nia, da̱nian zi̱ ka yet nyin kidee ja nang nyi na khwi a̱ni.

¹⁰ Neet di̱n jen nang zi̱ ku nshya̱ ma̱ng a̱nyin a̱ni, zi̱ ku kam nyin, nyia̱, “Ka̱ a̱yin lak nyia̱ ta̱m, gu yok ya kyayak bah.”

¹¹ A̱mgba̱m ma̱ng a̱nia, zi̱ lyiat a̱lyiat nani, mat zi̱ fa̱k nyia̱ á̱ghyang á̱niet ma̱ nyin nyia̱ bwuk hwa; nyia̱ da̱ ba̱ chat ta̱m bah, ba̱ yet á̱niet nwuai mi̱ zwua̱i bya.

¹² Zi̱ kam á̱niet a̱bya mami a̱lyoot A̱tyoli Yesu Kristi, zi̱ si̱ bu fat ba a̱sa̱kut zi̱ chat ba̱ swan di̱n tyan jhyung, ba̱ nyia̱ nta̱m ba̱ ya nkyayak á̱pyia̱ mba.

¹³ Da̱ a̱kwonu a̱kya, nyin á̱niet khwi Yesu ba nang n chat a̱ni, nyi yok veang di̱ nyia̱ a̱tan nta̱m bah.

¹⁴ Ka̱ a̱yin lak khwi tyiet nzi̱t hu ku shya̱ mi̱ wusika jini a̱ni, nyi cham a̱tyu a̱wa shansham. Nyi yok mun á̱pyia̱ ma̱ng a̱nggu bah. Nyi nyia̱ a̱nia, da̱nian a̱ ka fa̱k nsum.

¹⁵ A̱mgba̱m ma̱ng a̱nia, nyi yok kyiak gu nang a̱tyu lak li nyin a̱ni bah. Zi̱ chat nyi khwat gu a̱fufwuo nang a̱na̱nyiuk a̱ni.

Byat Ngaan

¹⁶ Di̱ yong huni, zi̱ naai A̱tyoli Yesu a̱ nwuat swat nyinyang a̱ni, a̱ nang nyin swat nyinyang kuzang jen di̱ kuzang nvak. Yok A̱tyoli Yesu a̱ shya̱ dundung ma̱ng a̱nyin a̱mgba̱m.

¹⁷ Nung Bulut, nung gwa n dyuut byiat huni mi̱ bwak nung. Huhwa yet a̱lama wu a̱ tak nang wusika jini nneet da̱ a̱vwuo nung a̱ni.

¹⁸ Yok A̱tyoli nzi̱t wu Yesu Kristi a̱ fa̱k shok nyin a̱mgba̱m!