2 A̱korontiyawa 4 - A̠lyiat A̠gwaza na di̠n Tyap: A̠li̠ka̠uli A̠fai

Zwá ma̱ A̱la̱n nang á̱ Nok ma̱ng Lyem a̱ni

¹ Mat a̱nia, nang A̱gwaza nfa̱k shok nzi̱t, a̱ si̱ nwuak nzi̱t ta̱m fai shei A̱sham Nkhang huni a̱ni, zi̱ si̱ mi̱n mak but mi̱ fwuo bah.

² Zi̱ ni̱ lak a̱mgba̱m nta̱m na̱ yet nkyang nsum nang á̱ nyia̱ da̱ bang a̱ni. Zi̱ ni̱ shyok a̱yin bah, ku zi̱ chi̱p a̱lyiat A̱gwaza na zi̱ mbeang á̱si̱ nzi̱t bah. Da̱ a̱kwonu a̱kya, zi̱ ni̱ shei a̱tsatsak a̱lyiat a̱zaghyi A̱gwaza kya. A̱wot a̱mgba̱m á̱niet ba̱ lyen a̱chuchuk a̱ni, fi̱k a̱nia.

³ Ka̱ ku li á ngyei á̱ kup A̱sham Nkhang ka nang zi̱ shei a̱ni ma̱ng a̱toot, á̱ kup ka mi̱ fwuo á̱niet ba̱ shya̱ di̱n vak a̱khwu sang sangba̱p a̱ni.

⁴ A̱ta̱nyeang ka ka̱ yet a̱gwaza swanta wuni a̱ni, a̱ tyia̱ lyin mi̱ nfwuo á̱niet ba̱ nwai nwuak a̱chuchuk wu a̱ni. Ba̱ si̱ mi̱n di a̱sai a̱kyenkyai shi A̱sham Nkhang wu bah. Ba̱ si̱ lak fi̱k a̱lyiat nani tazwa a̱kyenkyai shi Kristi, a̱tyu a̱ tai A̱gwaza ma̱ cha̱chaat a̱ni.

⁵ Nyi fa̱k, zi̱ chong kat shei nyin a̱lyiat tazwa á̱pyia̱ nzi̱t bah. Zi̱ shei nang Yesu Kristi wa ngyet A̱tyoli wu, a̱wot nzi̱t ma̱ á̱pyia̱ nzi̱t zi̱ yet á̱khwo nyin bya da̱nian Yesu.

⁶ Mat A̱gwaza wa ku hyia̱ nyia̱, “Yok sai hu, ku sai mi̱ ndyin hu!” Nggu wa bu tyia̱ sai huni ku sai mi̱ nfwuo nzi̱t na, mat zi̱ ka lyen a̱kyenkyai shi A̱gwaza wu ma̱ a̱ghyi Yesu Kristi ba, a̱ ya á̱ghyi ma̱ mya̱myat a̱myat nang á̱ nwuan a̱ni.

⁷ Ma̱ninika, sai huni sai mi̱ nfwuo nzi̱t na. A̱wot nzi̱t ma̱ á̱pyia̱ nzi̱t zi̱ tai li̱la̱n nang á̱ nok ma̱ng lyem ku ni̱ fwuoi a̱nggang a̱ni; nzi̱t bya nang á̱ nkoot a̱gba̱ndang zwá wu. Si̱ huni tak kpa̱sai nang a̱gba̱ndang chet nzi̱t wu neet da̱ a̱vwuo A̱gwaza kya. Nzi̱t ma̱ á̱pyia̱ nzi̱t zi̱ byia̱ chet bah.

⁸ Á̱ ya̱shuk zi̱t ma̱ng swuo a̱bung di̱ kuzang fam. A̱mgba̱m ma̱ng a̱nia, da̱ mba á̱ feap zi̱t bah. Di̱n jen jhyang, zi̱ ni̱ tyia̱ ma̱ tai. A̱mgba̱m ma̱ng a̱nia, da̱ nzi̱t, zi̱ but mi̱ fwuo bah.

⁹ Á̱ ni̱ nyia̱ ma̱ng a̱nzi̱t. A̱mgba̱m ma̱ng a̱nia, A̱gwaza wu ghwon zi̱t bah. Di̱n jen jhyang, á̱ ni̱ tuu nzi̱t á̱ si̱ mat a̱byin. A̱mgba̱m ma̱ng a̱nia, á̱ tyak ma̱ng a̱nzi̱t bah.

¹⁰ Di̱n jen swuo a̱bung, nvam nzi̱t na ni̱ ya a̱son ma̱ng mun á̱pyia̱ ndung da̱ a̱khwu Yesu ka, mat á̱ ka li tangka̱i nswat Yesu hu mi̱ nvam nzi̱t na mameang.

¹¹ A̱tsak a̱lyiat, zi̱ shya̱ kpa̱mkpaan ma̱ng a̱khwu. Mat zi̱ nyia̱ ta̱m Yesu, da̱nian á̱ ka li tangka̱i swat Yesu hu mi̱ nvam nzi̱t na na̱ kwi a̱ni.

¹² Huhwa mbyia̱ zi̱ ni̱ nwuan a̱khwu, a̱wot si̱ a̱hwa ka̱n tyia̱ nyin nyi shya̱ swuan sang sangba̱p.

¹³ A̱wot zi̱ ya a̱son ma̱ng shei A̱lyiat A̱gwaza na. Mat zi̱ nwuak a̱chuchuk ma̱nang a̱tyu lyuut Za̱bura nhyia̱ a̱ni, nyia̱, “N ku nwuak a̱chuchuk da̱ A̱gwaza, huhwa mbyia̱ nang n si̱ ndyiat.”

¹⁴ Zi̱ lyen A̱gwaza wu a̱ ta̱ngam Yesu ma̱ng swuan ma̱ á̱niet ba̱ ka̱n kwi a̱ni. Nggu wa bu na ta̱ngam nzi̱t ma̱ng swuan dundung ma̱ng Yesu. A̱wot a̱ na neap zi̱t dundung ma̱ng a̱nyin a̱zaghyi nggu.

¹⁵ A̱mgba̱m swuo a̱bung huni yet da̱nian kpangti̱n nyin ja. A̱wot ma̱nang A̱gwaza nfa̱k shok á̱niet ma̱ a̱di̱di̱t a̱di̱t a̱ni, ma a̱nia wa, á̱ na ngwai gba̱mgbam. A̱wot á̱ na mbeang nwuak A̱gwaza a̱gba̱ndang kyenkyai shi.

Swat di̱ Tyia̱ Fwuo

¹⁶ Huhwa mbyia̱, nzi̱t zi̱ but mi̱ fwuo bah. Ku nang nvam nzi̱t na ntyiai chet a̱ni. A̱mgba̱m ma̱ng a̱nia, á̱ bwan fwuo nzi̱t na á̱ ntyei nfai kuzang jen.

¹⁷ Mat, a̱bung ka nang zi̱ swuo ma̱nini a̱ni, shii bah. A̱wot ka̱ na labeang bah, ka̱ na̱ tyak. A̱mgba̱m ma̱ng a̱nia, a̱bung kani ka̱ tyei nzi̱t a̱kyenkyai shi wu a̱ni, na swak swuo a̱bung nang zi̱ swuo ma̱nini a̱ni ma̱ za̱nzan. A̱wot a̱kyenkyai shi wu na ba̱ng si̱ nat sang sangba̱p!

¹⁸ Mat a̱nia, zi̱ yok dam ma̱ng a̱bung ka nang zi̱ swuo ma̱nini a̱ni bah. Da̱ a̱kwonu a̱kya, zi̱ tyia̱ fwuo di̱ nkyang Ma A̱gwaza tswazwa nang zi̱ nwai nwuan a̱ni. Mat nkyang swanta na nang zi̱ nwuan ma̱nini a̱ni, na̱ na tyak ma a̱nggang. A̱wot nkyang Ma A̱gwaza tswazwa nang á̱ nwai nwuan a̱ni, na swan si̱ nat sang sangba̱p.