2 A̱korontiyawa 2 - A̠lyiat A̠gwaza na di̠n Tyap: A̠li̠ka̠uli A̠fai

¹ Mat a̱nia, n kyiak mi̱ fwuo nung n bu mbwuok bai da̱ a̱vwuo nyin, n ba̱ tyia̱ nyin byian fwuo bah.

² Mat ka̱ n tyia̱ nyin byian fwuo, a̱nyan wa ma̱ nyin na tyia̱ nung fwuo sai hu? A̱tsatsak a̱lyiat, a̱tyu nang n sii byian gu fwuo hwa a̱ni bah.

³ Mat n ku chat nfwuo nyin na na̱ byian bah. Huhwa si̱ mbyia̱ n ku ndyuut nyin wusika ntsa ji. Mat ki̱ n bai, a̱tyu a̱ myim a̱ tyia̱ nung a̱gba̱ndang a̱gwai a̱ni, n chat nggu wa a̱ byian nung fwuo bah. A̱tsak a̱lyiat, nyi lyen ki̱ n shya̱ ma̱ng a̱gwai, nyin meang, nyi na gwai.

⁴ N ku ndyuut nyin wusika ntsa ji ma̱ng a̱lyia̱ ya, ma̱ng a̱gba̱ndang byian fwuo, ma̱ng ndang a̱ghyi ma̱ wa̱wat a̱wat. Mat n chat n byian nyin fwuo bah. N ku chat nyi lyen tangka̱i chat nang n chat nyin wa a̱ni.

Bulut Naai Á̱niet Khwi ba̱ Chi A̱tyu a̱ Bwuo A̱bun wu a̱ni

⁵ N tak ma̱ng a̱nyin, mi̱ jen ji̱ swak a̱ni, a̱yin ku byian nzi̱t nfwuo ba̱t. A̱tyu a̱wa a̱ ku byian nyin fwuo a̱ swak si̱sak nggu mbyian nung fwuo a̱ni.

⁶ Á̱niet ma̱ a̱di̱di̱t ma̱ nyin si̱ nyia̱ fi̱p ma̱ng a̱nggu. A̱wot nyep nyin hu maai a̱nia.

⁷ Mat a̱nia, ma̱ninika jen ji nyia̱ nang nyi na nchi ngguu, a̱wot nyi tyia̱ nggu gba̱gbak a̱ni. Kalak byian fwuo nggu ji ji̱ swuo chet gu.

⁸ Mat a̱nia, n naai nyin nyi tak gu nang nyi ni̱ nchat gu ba̱t.

⁹ N dyuut nyin dyo wa, n ka mak nyin n di ki̱ nyi na khwi tyiet nung hu.

¹⁰ Ka̱ a̱mgba̱m nyin chi a̱tyu a̱wa a̱bun nggu wu, nung meang, n chi nggu ndyo. A̱wot ki̱ n chi a̱bun a̱ myim n chi a̱ni, n nyia̱ a̱nia ma̱ng tyok Yesu Kristi hwa da̱nian kpangti̱n nyin ja.

¹¹ Da̱nian ki̱ di̱ A̱ta̱nyeang ka ka̱ du laai nzi̱t zi̱ nwai nyia̱ kyang hu nang A̱gwaza chat a̱ni. Mat zi̱ ka̱n dyen a̱mgba̱m vwuoi a̱ka̱shuk nka hu.

A̱yaata̱m Shei Nkhang A̱li̱ka̱uli A̱fai

¹² Jen ji nang n bai a̱keang Ta̱rowasa da̱nian n ka nshei A̱sham Nkhang Kristi ka a̱ni, A̱gwaza si̱ khwuk nung vak n si̱ nshya̱ a̱wat n shei nkaa.

¹³ A̱mgba̱m ma̱ng a̱nia, fwuo nung hu si̱ myia̱ bah. Mat di̱n jen a̱ja nang Titut a̱na̱nyiuk nung wu mi̱ khwi Kristi ka̱n bwuok a̱ neet ma̱ng a̱nyin, a̱ si̱ bwuo nung nkhang nyin na bah. Mat a̱nia, n si̱ mbyiat sak, n si̱ nswak nat fam a̱byin Ma̱kidoniya n si̱ nshya̱ nggu a̱ja.

¹⁴ A̱wot zi̱ gwai A̱gwaza! A̱ tyia̱ zi̱ si̱ yet a̱khwo Yesu, a̱wot Yesu wa yet a̱gwam nzwang a̱ kwak nzi̱t a̱son di̱ ta lang swuo chet nggu hu. Ma̱ninika, a̱ tyei nzi̱t zi̱ shei A̱lyiat nggu na kuzang a̱vwuo; ma̱nang á̱ ni̱ nfwui a̱myia̱ na̱ byia̱ swam nyinyang di̱n jen ta lang, konyan a̱ fa̱k swam hu a̱ni.

¹⁵ Mat a̱nia, A̱sham Nkhang nzi̱t kya yet kidee swam a̱sham a̱myia̱ Kristi a̱hwa nang á̱ fwui, ku vwuot á̱ chong da̱ a̱vwuo A̱gwaza a̱ni. A̱wot á̱niet ba̱ shya̱ san a̱ni, ma̱ng á̱si̱ ba ba̱ shya̱ di̱n vak a̱khwu a̱ni, ba̱ fwuong swam a̱myia̱ a̱hwa di̱ nvak na̱ vwuon ma̱ng jhyang a̱ni.

¹⁶ Da̱ a̱vwuo á̱niet ba̱ shya̱ di̱n vak a̱khwu a̱ni, swam a̱myia̱ huni nyui a̱bwui swam a̱khwu wa. A̱wot da̱ a̱vwuo á̱niet ba̱ shya̱ san a̱ni, A̱sham Nkhang nzi̱t ka yet swam a̱myia̱ nyinyang na̱ nwuat swuan a̱ni. A̱wot a̱nyan wa maai a̱ nyia̱ tangka̱i ta̱m nang si̱ huni a̱ni?

¹⁷ Mat a̱nia, zi̱ li nang á̱kum á̱niet ka ba̱ shei a̱lyiat A̱gwaza na di̱n vak a̱bwuang a̱ni bah. A̱wot zi̱ shei a̱lyiat A̱gwaza na mami a̱chuchuk ma̱ng tyok Yesu Kristi, mat zi̱ lyen nang A̱gwaza wa ncham zi̱t.