1 Timoti 6 - A̠lyiat A̠gwaza na di̠n Tyap: A̠li̠ka̠uli A̠fai

¹ A̱mgba̱m á̱niet ba ba̱ yet á̱khwo a̱ni, ku myim ba̱ nwuak a̱yaatyoli a̱ka̱sa mba ba a̱mgba̱m shi; da̱nian ki̱ da̱ á̱niet nta ba̱ du jhyuai a̱lyoot A̱gwaza ka kpa̱sai ma̱ng tyiet nzi̱t hu.

² Á̱khwo ba̱ byia̱ a̱yaatyoli a̱ka̱sa ba̱ yet á̱niet khwi A̱gwaza a̱ni, á̱khwo ba̱ yok shya̱ ta̱fwat ba̱ jhyuai mba bah. Mat a̱yaatyoli ba yet á̱na̱nyiuk mba bya mami Yesu. Da̱ a̱kwonu a̱kya, yok á̱khwo ba ba̱ nyia̱ mba ta̱m hu ku swak kyang ku myim a̱ni. Mat ya a̱son a̱yaatyoli mba hu na mun a̱ yet si̱ mba hwa nang á̱niet khwi ba chat a̱ni. Nkyang nani nia nang a na tyiet baa, a bu tyia̱ mba gba̱gbak.

Tyiet A̱ka̱laa ma̱ng A̱tan Byia̱ Zwá

³ A̱tyu a̱ tyiet tyiet hu ku nyia̱ na̱nvan ma̱ng si̱ nzi̱t hu a̱ni, a̱wot da̱ nggu a̱ shim a̱tsatsak ma̱ng a̱tan a̱lyiat Yesu Kristi A̱tyoli nzi̱t wu, ma̱ng tyiet nzi̱t hu ku yet si̱ khwi A̱gwaza a̱ni bah.

⁴ Tangka̱i a̱tyu tyiet a̱hwa yet a̱tyu a̱dung a̱pyia̱ wa. A̱ lyen kyang bah. A̱ yet a̱tyu la̱u a̱di̱di̱t chat fwuang, ma̱ng zok tazwa swáng a̱lyiat. Tyiet nggu hu chong ma̱ng ya fwuang, si̱ kwi swam, ghai di̱ susot, tyam á̱ghyang, ma̱ng bat á̱niet a̱ka̱tuk nyia̱.

⁵ Á̱niet a̱bya la̱u a̱di̱di̱t nyia̱ fi̱p da̱ a̱vwuo á̱niet ba̱ byia̱ a̱ka̱tuk nfwuo a̱ni. Ba̱ si̱ mi̱n fi̱k vak a̱chuchuk hu bah. Ba̱ dam á̱ ngyei khwi A̱gwaza hu yet vak shyat kurum hwa.

⁶ A̱tsak a̱lyiat, khwi A̱gwaza hu chong ma̱ng kpangti̱n ba̱t, ka̱nang a̱nyuu kyiak kyang nang gu byia̱ a̱ni hu ni̱ maai nggu.

⁷ Mat, zi̱ bai mi̱ zwá mi̱ swanta hu bah. Da̱ nzi̱t, zi̱ na ghwon swanta hu mi̱ zwá bah.

⁸ A̱wot, ki̱ zi̱ byia̱ kyayak ma̱ng a̱yaatoot, nkyang a̱nia maai nzi̱t.

⁹ A̱wot á̱si̱ ba̱ chat byia̱ zwá a̱ni, ni̱ kwak pyipyia̱ mba jat mak. Ba̱ kwa mi̱ tsi̱ntsat ma̱ng a̱bombwuon kyang ma̱ a̱di̱di̱t, ma̱ng a̱tai a̱ka̱tuk nshyuo a̱ swuo chet á̱nietbishyi, na̱ kwak ba á̱ nat ndyo di̱ byian ma̱ng a̱khwu a̱ni.

¹⁰ Mat a̱dodo chat kurum wa yet a̱tyin kuzang tangka̱i a̱ka̱tuk. Á̱ghyang á̱niet tyia̱ nfwuo mba na di̱ shyuo kurum. A̱wot ba̱ si̱ ghwon khwi vak nwuak a̱chuchuk mba hu. Ba̱ si̱ bu khwat pyipyia̱ mba a̱ka̱tuk byian nfwuo ma̱ a̱di̱di̱t.

Bulut Kam Timoti A̱ Ngaan

¹¹ A̱wot nwan Timoti, a̱tyu ta̱m A̱gwaza, tyong ntangka̱i a̱ka̱tuk nkyang nani. Da̱ a̱kwonu a̱kya, ntyia̱ a̱lyia̱ ba̱t di̱ nyia̱ tsotswat, khwi A̱gwaza, nwuak fwuo di̱ Kristi, chat á̱ghyang, gbang a̱lyia̱, ma̱ng nyia̱ shonshyon.

¹² Kwan a̱tan a̱yaat, a tyia̱ a̱lyia̱ di̱ nwuak fwuo da̱ A̱gwaza. A ba̱ng swuan sang sangba̱p ang ji gi̱ngi̱ng. Mat swuan jini ja nang A̱gwaza wu ku ngyorong ang a san, nang a ku ntak a̱tsatsak nwuak a̱chuchuk kpa̱sai a̱zaghyi á̱niet khwi Yesu ma̱ a̱di̱di̱t a̱ni.

¹³ N kam ang a̱zaghyi A̱gwaza, a̱tyu a̱ nwuat kuzang kyang swuan a̱ni, ma̱ng Yesu Kristi a̱tyu a̱ ku gbang a̱lyia̱ a̱ si̱ tak a̱chuchuk kpa̱sai a̱zaghyi gwomna Buntut Bilatut ma̱ sa̱t a̱ni;

¹⁴ khwi a̱lyiat nani, na̱ yet a̱za̱za̱rak ma̱ng sang a̱bun a̱ni, si̱ nat mam nang Yesu Kristi A̱tyoli nzi̱t wu na mbwuok a̱ bai a̱ni.

¹⁵ Bwuok bai nggu hu na shya̱ da̱ a̱cha̱chaat njen nang A̱gwaza wu chat a̱ni; a̱tyu a̱ byia̱ a̱mgba̱m shi a̱ nyia̱ tyok ma̱nyin nggu a̱ni. Nggu wa yet, A̱gwam á̱gwam, ma̱ng A̱tyoli a̱yaatyoli.

¹⁶ Nggu wa ma̱nyin gu na nwai khwu. A̱ swan da̱ a̱vwuo ka̱ sai ma̱ mya̱myat, nang a̱tyubishyi si̱ mi̱n tat a̱ni bah. Á̱ mbyia̱ a̱tyu a̱ ka̱n di nggu a̱ni bah. Da̱ mba á̱ mbyia̱ a̱tyu a̱ si̱ mi̱n di nggu a̱ni bah. Yok shi ma̱ng chet ku nwai tyiai a̱ni, shya̱ dundung ma̱ng a̱nggu, si̱ nat sang sangba̱p, Samba̱rka!

¹⁷ Kam á̱niet ba̱ yet á̱niet nzwá mi̱ swanta hu a̱ni, ba̱ yok gba̱p a̱pyia̱, ba̱ yok tyia̱ nfwuo mba na di̱ zwá ji̱ tyiai a̱ni bah. Da̱ a̱kwonu a̱kya, ba̱ tyia̱ nfwuo mba na da̱ A̱gwaza wa; a̱tyu a̱ nwuat zi̱t kuzang tangka̱i kyang kuzang jen mi̱ fwuo nyiung nang zi̱ na nfwuong nyinyang a̱ni.

¹⁸ Kam mba ba̱ nyia̱ shok ma̱ng zwá ji, di̱ nyia̱ a̱tan nta̱m ba̱t; ba̱ ka ka̱u njii ma̱ng fwuo nyiung, ba̱ mbeang á̱kunak na.

¹⁹ A̱ni wa ba̱ na nsak á̱pyia̱ mba zwá ji̱ na yet a̱tyin swuan di̱n jen chobai a̱ni, da̱nian ba̱ ka shya̱ swuan ji yet a̱tsatsak swuan wu a̱ni.

²⁰ Timoti, ba̱ng tyiet huni nang á̱ tyia̱ ang mbwak a̱ni. Khap a̱pyia̱ ang zan ma̱ng a̱tai a̱lyiat da̱ na̱ yet a̱si̱ A̱gwaza a̱ni bah, ma̱ng a̱ka̱tuk nfwuang a̱ yet tangka̱i mumwang nang á̱niet tyiet a̱bya nwuan á ngyei lyen kyang hwa a̱ni.

²¹ Mat á̱ghyang á̱niet ka̱n kyiak tyiet a̱ka̱laa huni nang a̱tan wa a̱ni. Di̱ nyia̱ a̱nia, ba̱ si̱ teap, ba̱ si̱ ghwon vak nwuak a̱chuchuk hu. Yok A̱gwaza a̱ fa̱k shok nyin a̱mgba̱m!