1 Timoti 2 - A̠lyiat A̠gwaza na di̠n Tyap: A̠li̠ka̠uli A̠fai

Tyiet tazwa Kwok Ntong a̱zaghyi A̱gwaza

¹ Di̱ ntsa hu, n chat n tyiet nyin, nyi ni̱ nnaai A̱gwaza da̱nian a̱mgba̱m á̱niet ba. Nyi yong mi̱ di̱ naai guu da̱ a̱kwonu mbaa kuzang jen. Nyi gwai nggu da̱nian ba.

² Nyi ni̱ naai da̱nian á̱gwam ma̱ng a̱mgba̱m á̱niet ba ba̱ ba̱ng tyok a̱ni, da̱nian zi̱ ka swan swat nyinyang ma̱ng á̱ghyang, zi̱ swan shonshyon, a̱wot zi̱ swan a̱za̱za̱rak nswat di̱ fwuong a̱wun A̱gwaza.

³ Tangka̱i naai huni yet a̱tan kyang. A̱wot A̱gwaza a̱ yet A̱tyusan nzi̱t wu a̱ni, chat hu za̱m,

⁴ Nggu wa chat a̱mgba̱m á̱niet ba ba̱ shya̱ swuan sang sangba̱p, a̱wot ba̱ fi̱k a̱chuchuk wu.

⁵ A̱gwaza yet a̱nyiung wa, a̱wot á̱ si̱ bu byia̱ a̱tyu a̱ yong ma̱ a̱ka̱wa̱tyia̱ a̱kwonu á̱nietbishyi ma̱ng A̱gwaza wu a̱ni; a̱tyu a̱wa nggu wa yet Yesu Kristi.

⁶ Nggu wa ku nwuak swuan nggu ji da̱nian gu ka san a̱mgba̱m á̱niet swanta ba, ba̱ yet á̱sa̱t á̱niet. Si̱ huni hwa yet ta̱m ji nang á̱ ku tak kpa̱sai da̱ cha̱chaat njen a̱wa a̱ni.

⁷ Mat tak ta̱m jini kpa̱sai hwa, nang á̱ ku ntyia̱ nung n gyet a̱ta̱m Yesu ma̱ng a̱tyu shei A̱sham Nkhang wu. N si̱ bu ngyet a̱tyu tyiet nwuak a̱chuchuk ma̱ng a̱tsatsak da̱ a̱vwuo Nnwap na̱ nwai yet A̱yahudawa a̱ni. N shei a̱tsak a̱lyiat wa, la hwa nang n bwoi bah.

⁸ N chat á̱tyok ba mi̱ kuzang a̱tung sot á̱niet khwi ba̱ naai A̱gwaza wu, ma̱ng neap a̱za̱za̱rak mbwak mba wu tswazwa kuzang jen di̱ mi̱n mwai lyen, ma̱ng nwai but mi̱ fwuo.

⁹ N bu nchat á̱nyiuk ba ba̱ ta̱bat á̱pyia̱ mba di̱ si̱sak nang ba̱ na nkhwi a̱yaatoot ba̱ myim a̱ni. Ba̱ yok bat pyia̱ hu di̱ chat shei yet, ma̱ng tyia̱ zi̱nariya, ku a̱mya̱myat wulu, ku a̱yaatoot ba̱ la̱u byia̱ kurum a̱ni bah.

¹⁰ Da̱ a̱kwonu a̱kya, n chat ba̱ yong mi̱ di̱ nyia̱ a̱tsatsak nta̱m wa, ma̱nang ku mmyim á̱nyiuk ba ba̱ kyiak pyipyia̱ mba nang a̱tsatsak á̱niet khwi ba̱ fwuong a̱wun A̱gwaza a̱ni.

¹¹ Ku myim á̱nyiuk ba̱ tyia̱ nyonywang di̱n jen tyiet ma̱ a̱ka̱tung sot á̱niet khwi ma̱ng a̱tsatsak ghyuai a̱pyia̱.

¹² N shim á̱nyiuk ba̱ tyiet ku ba̱ nyia̱ tyok tazwa á̱tyok mami a̱tung sot á̱niet khwi bah. Ku myim ba̱ swan nyonywang.

¹³ Mat A̱da̱mu wa nang A̱gwaza ku tsa mat hu, a̱ sii du nyia̱ A̱wa.

¹⁴ A̱wot A̱da̱mu wa nang A̱ta̱nyeang ka ku laai bah. A̱wa wa nang á̱ ku laai, a̱ si̱ nyia̱ a̱ka̱tuk nyia̱ wu.

¹⁵ A̱mgba̱m ma̱ng a̱nia, á̱nyiuk na shya̱ shyichet nang ba̱ na ntyei mman, ka̱ ba̱ yong di̱ nwuak a̱chuchuk, ma̱ng chat, ma̱ng a̱za̱za̱rak swat ma̱ng sang gba̱p a̱pyia̱.