1 Timoti 1 - A̠lyiat A̠gwaza na di̠n Tyap: A̠li̠ka̠uli A̠fai

Byat

¹ Nung Bulut n gyet a̱ta̱m Kristi Yesu mat A̱gwaza a̱ yet A̱tyusan nzi̱t ma̱ng Kristi Yesu, a̱tyu zi̱ ntyia̱ fwuo a̱ni, bibya tyia̱ nung ta̱m hu.

² N dyuut ang wusika jini, n bu byiat ang Timoti a̱tsatsak nggwon nung di̱ nwuak fwuo di̱ Yesu. Yok A̱gwaza a̱ yet A̱tyia̱ a̱ni, ma̱ng Yesu Kristi nzi̱t, gu fa̱k shok nyin, a̱ fa̱k kunak nyin, a̱ nang nyin swat nyinyang.

Gba tazwa Á̱niet tyiet A̱ka̱laa

³ N chat a ya nswan ma̱ a̱keang A̱fisut, ma̱nang n ku ntak ma̱ng a̱nwan nang n sweap naat mi̱ fam a̱byin Ma̱kidoniya a̱ni. Á̱ghyang á̱niet a̱ja ba̱ tyiet tyiet bwoi a̱ka̱laa. A̱wot n chat a kam mba, ba̱ yok.

⁴ Kam ba, ba̱ yok tsaai a̱tai tashikum, ma̱ng lyuut lyulyoot nche a̱yaatyia̱ a̱khwop ma̱ a̱di̱di̱t. Mat ntangka̱i a̱lyiat a̱nia ni̱ chong ma̱ng buk, da̱ a̱kwonu na̱ nchong ma̱ng tyei á̱niet gba̱gbak di̱ si̱sak ji nang ba̱ ni̱ nswan swat mba hu di̱ nwuak fwuo da̱ A̱gwaza.

⁵ Kyang nang tyiet nung huni fa a̱ni, huhwa yet; ku myim a̱mgba̱m á̱niet khwi ba̱ chat á̱ghyang ma̱ a̱za̱za̱rak nfwuo, ba̱ bu yet á̱niet ba̱ nwai nyia̱ a̱ka̱tuk nang nfwuo mba na kpaat ba a̱ni, ba̱ bu nwuak fwuo di̱ Yesu mami a̱chuchuk.

⁶ Á̱ghyang á̱niet wa ka̱n teap di̱ khwi ntangka̱i za̱kwá a̱nia. A̱wot ba̱ si̱ bwuk, ba̱ si̱ nwuo khwi a̱tai a̱lyiat.

⁷ Ba̱ chat á̱niet ba̱ kyiak ba nang á̱tsatsak á̱niet tyiet doka Musa a̱ni. A̱wot da̱ mba, ba̱ lyen kyang ba̱ lyiat a̱ni bah, ku nang ba̱ ndyiat ma̱ng gbang a̱lyia̱ a̱ni.

⁸ Zi̱ lyen nang doka ji ngyet a̱chuchuk, ki̱ á̱ nyia̱ nta̱m ma̱ng a̱nji di̱n vak hu ku myim a̱ni.

⁹ Zi̱ bu lyen nang á̱ nkpaat doka ji da̱nian á̱tsatsak á̱niet bya bah. Da̱ a̱kwonu a̱kya, á̱ kpaat ji da̱nian á̱niet lak khwi doka bya; á̱niet tyei zat, á̱niet lak khwi A̱gwaza, á̱niet nyia̱ a̱ka̱tuk nyia̱, á̱niet nwai yet a̱za̱za̱rak, á̱niet lak nwuak A̱gwaza shi, á̱niet ba̱ hyaai a̱yaatyia̱ ma̱ng a̱yaayang, ma̱ng á̱niet ba̱ hyaai á̱ghyang á̱niet a̱ni.

¹⁰ Á̱ kpaat doka ji da̱nian á̱niet katnaan, ma̱ng á̱niet nyia̱ shi̱shi̱k nyia̱, á̱tyok ba̱ khwat ma̱ng á̱tyok, ku á̱nyiuk ba̱ khwat ma̱ng á̱nyiuk, ma̱ng á̱niet nyiin á̱niet ba̱ lyiai mba di̱ khwo, á̱niet bwoi a̱ka̱laa, á̱niet ba̱ shyi shyishyi nyia̱ ba̱ na hyia̱ a̱tsak a̱lyiat a̱wot ba̱ si̱ tyat jii, ma̱ng a̱mgba̱m á̱niet ba̱ nyia̱ fi̱p ma̱ng a̱tsatsak tyiet wu a̱ni.

¹¹ Tyiet huni nang á̱ tyia̱ nung ndyo mbwak a̱ni, shya̱ cha̱chaat ma̱ng a̱gba̱ndang shi A̱sham Nkhang, nang á̱ shei tazwa A̱gwaza a̱ byia̱ a̱li̱ba̱rka a̱ni.

Bulut Gwai nang A̱gwaza Nfwuong Kunak gu a̱ni

¹² N gwai Yesu Kristi A̱tyoli nzi̱t wu, a̱tyu a̱ tyia̱ nung chet di̱ nyia̱ gu ta̱m huni a̱ni. N gwai nggu nang gu nkyiak nung n gyet a̱tsotswat. A̱wot a̱ si̱ bu khai nung, n nyia̱ ta̱m da̱nian gu a̱ni.

¹³ A̱gwaza wa nwuak nung a̱wat kani, ku nang neet gbangbang n ku nyia̱ Kristi lihyat. N si̱ ngyet a̱tyu jhya̱ ma̱ng a̱ka̱kpa̱t, huhwa n si̱ ta̱shuk á̱niet khwi nggu ba. A̱mgba̱m ma̱ng a̱nia, A̱gwaza si̱ fa̱k kunak nung. Mat, n ku nyia̱ nkyang nani di̱ nwai lyen ma̱ng nwai nwuak a̱chuchuk.

¹⁴ A̱wot A̱tyia̱ nzi̱t wu ku nyia̱ nung shok gba̱mgbam. A̱ si̱ bu tyia̱ nung nwuak fwuo, n bu nchat á̱niet mat nang n mmun á̱pyia̱ ma̱ng Kristi Yesu a̱ni.

¹⁵ A̱lyiat nani yet a̱tsak a̱lyiat wa, na̱ si̱ bu myim zi̱ san naa: Yesu Kristi bai mi̱ swanta hu, gu ka san á̱niet nyia̱ a̱ka̱tuk nyia̱. A̱wot nung gwa ngyet a̱gwak wu ma̱ mba.

¹⁶ A̱mgba̱m ma̱ng a̱nia, A̱gwaza si̱ fa̱k kunak nung; da̱nian nung, n gyet a̱gwak wu swak ma̱ng nyia̱ a̱ka̱tuk hu a̱ni, Yesu Kristi si̱ tak nyap fwuo nggu hu ku nwai tyiai a̱ni da̱ nung. Huhwa, á̱ghyang á̱niet na fi̱k nang n gyet kidee di̱ si̱sak ji nang ba̱ na nnwuak fwuo da̱ nggu, ba̱ shya̱ swuan sang sangba̱p a̱ni mameang.

¹⁷ Yok a̱kyenkyai shi ma̱ng Tyok ku yong chi̱k da̱ A̱gwaza, a̱ yet A̱gwam sang sangba̱p; A̱gwaza a̱ na nwai khwu a̱ni, A̱gwaza nang a̱ nwai nwuan a̱ni, nggu wa yet A̱gwaza ma̱nyin nggu, si̱ nat sang sangba̱p. Samba̱rka!

¹⁸ Timoti, nggwon nung mami khwi Kristi, n tyia̱ tyiet huni mbwak ang. Tyiet huni hwa yet kyang hu nang a̱ta̱m a̱kwonu A̱gwaza mami á̱niet khwi ba ku mi̱ ndyiat tazwa ang neet mi̱ jen ji swak a̱ni. Yok tyiet a̱ta̱m a̱kwonu A̱gwaza huni ku tyia̱ ang gba̱gbak nang a na nkwan a̱tan a̱yaat a̱ni.

¹⁹ Nwuak fwuo da̱ Kristi, a khwi gu cha̱chaat kuzang jen ma̱ng fwuo nyiung ku nwai kpaat ang a̱ni. Á̱ghyang á̱niet, ba̱ ka̱n dak khwi a̱tan nkyang nang nfwuo mba na tak ku myim ba̱ nyia̱ a̱ni. Mat a̱nia, ma̱nang kukwon a̱wak ni̱ ndwi da̱ a̱fang ku fwuoi ku seang a̱ni. Ma a̱nia wa, á̱niet bani nwuak fwuo mba hu seang.

²⁰ Mami mba, á̱ mbyia̱ Himinayat ma̱ng A̱liza̱nda, á̱niet ba nang n ku nvwuong ghwut ndyo mi̱ susot á̱niet khwi ji. N si̱ ntyia̱ mba mbwak A̱ta̱nyeang ka, ka̱ gba mba ba̱ ka ghwon nyia̱ A̱gwaza wu lihyat hu.