1 Bitut 3 - A̠lyiat A̠gwaza na di̠n Tyap: A̠li̠ka̠uli A̠fai

Swat Nyeang

¹ Ma a̱nia wa, nyin á̱nyiuk, ku yet ta hwa nyi tyia̱ pyipyia̱ nyin mbwak tyok á̱tyok nyin ba. Mat ka̱ á̱ghyang á̱niet ma̱ á̱tyok nyin ba khwi A̱sham Nkhang A̱gwaza ka bah, a̱za̱za̱rak nswat nyin wu na tyia̱ ba̱ khwi A̱gwaza shansham, ku da̱nang nyi kaat a̱lyiat ma̱ng a̱mba bah.

² Mat ka̱ á̱tyok nyin ba li a̱za̱za̱rak nswat nyin wu ma̱ng fwuong a̱wun A̱gwaza, ba̱ na khwi nggu shansham.

³ Nyi yok tyia̱ nfwuo nyin na di̱ nkyang a̱gwai nvam, nang bat pyia̱, tyia̱ ná, ku khwi a̱yaatoot ba̱ byia̱ kurum a̱ni bah.

⁴ Da̱ a̱kwonu a̱kya, nyi kup á̱pyia̱ nyin ma̱ng shisham ji neet mami nfwuo nia a̱ni. Shisham ji̱ nwai tyiai, ji̱ si̱ bu yet a̱shonshyon ma̱ng a̱nyonywang za̱kwa a̱ni. Za̱kwa a̱ja yet a̱tsatsak kyang wa ba̱t da̱ a̱vwuo A̱gwaza.

⁵ Ma a̱nia wa nang a̱za̱za̱rak á̱nyiuk gbangbang ba ku ngwai a̱gwai mba na, ba̱ si̱ yet a̱sham. Ba̱ si̱ nwuak nfwuo mba na da̱ A̱gwaza di̱ khwi a̱lyiat á̱tyok mba na.

⁶ Gbangbang, Sa̱ratu ku khwi a̱lyiat a̱tyok nggu na Ibrahim. A̱ si̱ ngyei gu a̱tyoli ngguu. Nyin meang nyi yet mman á̱nap Sa̱ratu bya, ki̱ nyi nyia̱ a̱tan nta̱m, nyi si̱ mi̱n fa̱k a̱wun kyang nang á̱tyok nyin ba na nyia̱ nyin ndyo a̱ni bah.

⁷ Ma a̱nia wa nyin á̱tyok ba, ku yet ta hwa nyi chyin á̱nyiuk nyin ba. Nyi swan dundung ma̱ng a̱mba ma̱ng lyen nang a̱yaabaat ya gado za̱nang swuan swai A̱gwaza a̱ni, ku nang ba̱ mbyia̱ chet vam nang a̱nyin a̱ni bah. Nyi nyia̱ á̱nyiuk nyin ba kyang ku myim a̱ni, A̱gwaza a̱ ka shim naai nyin hu.

Swuo A̱bung mat Nyia̱ Tsotswat

⁸ Di̱ ngaan hu, yok a̱di̱dam nyin wu a̱ yet a̱nyiung. Nyi fa̱k kunak á̱ghyang. Nyi chat á̱ghyang nyin nang á̱na̱nyiuk a̱ni. Nyi byia̱ fwuo beang á̱ghyang. Nyi yok nyia̱ gba̱p a̱pyia̱ bah.

⁹ Nyi yok tan a̱ka̱kpa̱t ma̱ng a̱ka̱kpa̱t bah. Nyi yok fwoi á̱niet ba̱ fwoi nyin a̱ni bah. Da̱ a̱kwonu a̱kya, nyi tyia̱ mba a̱li̱ba̱rka wa. A̱nia wa nang A̱gwaza ngyorong nyin nyi nnyia̱, a̱wot a̱ ma na tyia̱ nyin a̱li̱ba̱rka wu.

¹⁰ Mat A̱lyiat A̱gwaza na nyia̱, “Ka̱ a chat fa̱k nyinyang swat ang hu, a̱wot a bu bwuo a̱tan mam ma̱ a̱di̱di̱t, vwuong a̱lyem ang ka lyiat a̱ka̱tuk a̱lyiat. A̱wot a yok bwoi a̱ka̱laa a̱bwonu ang ka bah.

¹¹ Yok a̱ka̱kpa̱t, a̱wot a nyia̱ a̱tan nta̱m. Chat swat nyinyang ma̱ng á̱ghyang ang. A̱wot a bu kwan a ba̱ng a̱nia.

¹² Mat á̱ghyi A̱gwaza ba nwuan á̱niet ba ba̱ nyia̱ tsotswat a̱ni. A̱wot a̱ si̱ myiai a̱fufwuo, a̱ fwuong naai mba hu. A̱wot á̱ghyi A̱gwaza ba lak li á̱niet ba̱ nyia̱ a̱ka̱kpa̱t a̱ni.”

¹³ Ma̱ninika, ka̱ nyi byia̱ fwuo nyia̱ tsotswat, a̱yin si̱ mi̱n chat a̱ nyia̱ nyin a̱ka̱kpa̱t bah.

¹⁴ A̱mgba̱m ma̱ng a̱nia, ka̱ nyi na swuo a̱bung mat nyia̱ tsotswat, A̱gwaza na nwuak nyin zang da̱ nhu. Mat a̱nia, nyi yok nyia̱ a̱fi̱fa ku nyi fa̱k a̱wun á̱niet ba̱ tyei nyin a̱wun a̱ni bah.

¹⁵ Da̱ a̱kwonu a̱kya, ku yet ta hwa nyi nwuak Kristi shi, nang A̱tyoli swuan nyin wu a̱ni. A̱wot ka̱ a̱yin lyip nyin tazwa tyia̱ fwuo nyin hu di̱ Kristi, nyi swan ma̱ng la̱p vam nyi nwuak gu shim hu ma̱ cha̱chaat.

¹⁶ A̱wot nyi nwuak ba shim ma̱ shonshyon ma̱ng nwuak ba shi. Nyi yok nyia̱ kyang ku na tyia̱ nyin nsum a̱ni bah, da̱nian ka̱ ba̱ lyiat nyin lihyat, ba̱ na fa̱k nsum, ka̱ ba̱ li tangka̱i a̱tsatsak nswat nang nyi swan a̱ni, mat nyi yet á̱niet khwi Kristi bya.

¹⁷ Nyi yok bwung bah; ku na laai lan ki̱ shim A̱gwaza hwa nyi swuo a̱bung mat nyia̱ a̱tan nta̱m, nang nyi na nswuo a̱bung di̱ nyia̱ a̱ka̱tuk a̱ni.

¹⁸ A̱tsak a̱lyiat, Yesu ma̱ a̱pyia̱ nggu ku swuo a̱bung da̱ a̱ka̱nyiung mat a̱ka̱tuk nyia̱ nzi̱t wu. A̱wot a̱ bu na swuo a̱bung bah. A̱ ku yet a̱tsotswat wa. A̱wot a̱ si̱ khwu da̱nian á̱niet a̱ka̱tuk nyia̱, gu ka neap zi̱t a̱za̱za̱rak a̱zaghyi A̱gwaza. Á̱ ku hyat gu mi̱ vam hwa. A̱wot á̱ si̱ ta̱ngam gu ma̱ng swuan mami A̱za̱za̱rak Ntswa.

¹⁹ Mami tswa jija gu si̱ nat a̱ si̱si̱ shei a̱lyiat A̱gwaza na da̱ a̱vwuo á̱ka̱tuk ntswá ji shya̱ mi̱ jaru a̱ni.

²⁰ Á̱ka̱tuk ntswá a̱bya ku lak khwi A̱gwaza gbangbang di̱n jen nang Nuhu ku nshap a̱gba̱ndang kukwon a̱wak wu a̱ni. A̱mgba̱m ma̱ng a̱nia, A̱gwaza si̱ nyap fwuo ma̱ng á̱niet a̱ni̱nai ba̱ si̱ nwuo a̱gba̱ndang kukwon a̱wak wu a̱ni. Ba̱ si̱ shot a̱khwu a̱sa̱khwot a̱gba̱ndang a̱ri̱giwa di̱n jen a̱ja.

²¹ A̱sa̱khwot a̱nia ku yet kidee ba̱ptisman ja. Ma̱nini ni̱nia san nyin, na̱ yet a̱si̱ kwi a̱lyuk mi̱ vam nia bah. A̱wot na̱ yet kidee nwuak shim hwa da̱ A̱gwaza neet mami a̱za̱za̱rak nfwuo. Na̱ san nyin mat doot Yesu Kristi ma̱ á̱niet ba̱ ka̱n kwi a̱ni.

²² Di̱ yong huni, Yesu Kristi wa ka̱n nat Ma A̱gwaza tswazwa. A̱wot a̱ swan a̱zayak A̱gwaza da̱ a̱gba̱ndang chuk tyok. A̱wot a̱mgba̱m a̱yaata̱m tswá A̱gwaza ba, ntyok na, ma̱ng nchet na, khwi tyok nggu hu.