1 Bitut 2 - A̠lyiat A̠gwaza na di̠n Tyap: A̠li̠ka̠uli A̠fai

Yok Á̱niet Khwi ba̱ Swan nang Á̱za̱za̱rak Á̱niet A̱gwaza a̱ni

¹ Mat a̱nia, nyi yok kuzang tangka̱i a̱ka̱kpa̱t. Nyi yok laai á̱ghyang nyin bah. Nyi yok yet á̱bubuk á̱niet. Nyi yok kwi swam. Nyi bu yok tyam á̱ghyang nyin bah.

² Da̱ a̱kwonu a̱kya, ma̱nang a̱chyuang mman nang á̱ sii tyei a̱ni, ku yet ta hwa nyi fwuong di̱dang swuo a̱baan ba̱t na̱ yet a̱si̱ A̱za̱za̱rak Ntswa a̱ni, da̱nian nyi ka mmeang nyi laai tat a̱jhyem sang san sangba̱p.

³ Nang A̱lyiat A̱gwaza na nhyia̱ a̱ni, nyi wa ka̱n shyup, nyi si̱ fa̱k nang shok A̱gwaza ji ngyet a̱tan.

Nfang Nswuan mami A̱li A̱gwaza

⁴ Nyi bai da̱ a̱vwuo Kristi, a̱ yet a̱fang nswuan a̱ta̱m kuntyin nok a̱li A̱gwaza ka a̱ni. Á̱nietbishyi si̱ lak gu. A̱wot A̱gwaza si̱ khai ngguu, á̱ ka chyin ngguu gba̱mgbam.

⁵ A̱wot nyin nyi yet nfang nswuan nia nang á̱ nnok A̱za̱za̱rak A̱li A̱gwaza wu a̱ni. Kang ma̱ng a̱nia, nyi bu yet a̱za̱za̱rak sot a̱yaapris wa. Mat nang Yesu Kristi ngyet a̱tyu a̱ yong da̱ a̱kwonu nyin a̱zaghyi A̱gwaza a̱ni, A̱za̱za̱rak Ntswa na beang nyin, nyi neap za̱náng nang A̱gwaza na nfa̱k nyinyang nyin a̱ni.

⁶ Ma̱nang A̱lyiat A̱gwaza na nhyia̱ a̱ni nyia̱, “N kpaat a̱fang a̱ta̱m kuntyin nok mi̱ Urusha̱lima, nang n khai da̱nian á̱ ka chyin a̱ni. A̱wot konyan wa nwuak fwuo da̱ nka, a̱ na fa̱k nsum bah, ku ma̱ chunchwiit!”

⁷ Ma̱ninika, da̱ a̱vwuo nyin á̱niet ba̱ nwuak fwuo da̱ Kristi a̱ni, nyi fi̱k nang a̱fang kani ngyet a̱si̱ ka nang á̱ chyin a̱ni. A̱wot da̱ a̱vwuo á̱niet ba̱ lak nwuak fwuo da̱ nka a̱ni, ba̱ fi̱k bah, ma̱nang á̱ ndyuut ma̱ A̱lyiat A̱gwaza na a̱ni, nyia̱, “A̱fang nang á̱niet nok ba lak a̱ni, kikya yet a̱tsatsak a̱fang a̱ta̱m kuntyin nok nang á̱ kpaat a̱ni.”

⁸ A̱wot á̱ bu lyuut nyia̱, “A̱fang kani kya na tyia̱ á̱niet ba̱ ga̱u. Kikya bu na tyia̱ mba ba̱ shot a̱kwa.” Ba̱ ga̱u mat ba̱ lak khwi a̱lyiat A̱gwaza na. Huhwa mbyia̱ ku ngyet mba a̱daat nang á̱ sak mba ndyo a̱ni.

⁹ A̱wot nyi li a̱nia bah, mat nyi yet kwai nang A̱gwaza khai a̱ni. Nyi yet a̱yaapris a̱gba̱ndang A̱gwam, a̱za̱za̱rak nwap, ma̱ng á̱niet ba̱ yet a̱si̱ A̱gwaza a̱ni. Mat a̱nia, nyi na tak á̱ghyang á̱niet a̱cha̱chet a̱tan nkyang a̱ga̱de nang A̱gwaza nyia̱ a̱ni. Mat A̱gwaza yorong nyin a̱ ghwut ndyo mi̱ ndyin a̱ nat ndyo ma̱ a̱kyenkyai sai nggu wu.

¹⁰ Ma̱nang á̱ ndyuut ma̱ A̱lyiat A̱gwaza na a̱ni, nyia̱, “Mi̱ jen jhyang ji̱ swak a̱ni, nyi ku yet á̱niet A̱gwaza bah. A̱wot ma̱ninika, nyi yet á̱niet nggu bya. Mi̱ jen jhyang ji̱ swak a̱ni, A̱gwaza ku fa̱k kunak nyin bah. A̱wot ma̱ninika, A̱gwaza fa̱k kunak nyin hwa.”

¹¹ Nyin á̱niet khwi Yesu ba nang n chat a̱ni, n gba nyin á̱niet nyi yet á̱nietchen ma̱ng á̱niet ba̱ bai a̱na̱nda da̱ a̱bada̱dei njen mi̱ swanta huni a̱ni. Nyi yok ghwon a̱ka̱tuk nshyuo swanta wu, a̱ nyia̱ zwang mi̱ fwuo nyin na bah.

¹² Nyi ta̱bam, nyi swan swat ku yet a̱ni ma̱ng á̱kpa̱ndang nswat nyin ba ba̱ nwai khwi A̱gwaza a̱ni. Mat, a̱mgba̱m nang ba̱ mbat nyin di̱ nyia̱ a̱ka̱tuk, ba̱ na li á̱tsatsak nta̱m nang nyi nyia̱ a̱ni, a̱wot ba̱ nwuak A̱gwaza shi di̱n jen nang gu na mbai a̱ni.

Yok Á̱niet Khwi ba̱ Nwuak A̱yaakwak A̱son ba Shi

¹³ Mat nang nyi nfwuong a̱wun A̱gwaza a̱ni, nyi khwi tyok a̱yaakwak a̱son á̱nietbishyi, ku a̱gba̱ndang a̱gwam shan A̱romawa a̱ ba̱ng a̱mgba̱m tyok a̱byin hu a̱ni,

¹⁴ ku á̱niet nang gu khai ba̱ nyia̱ tyok da̱nian gu a̱ni. Mat bibya nang a̱gba̱ndang a̱gwam wu ta̱m ba ba̱ nyia̱ shi̱ri̱ya tazwa á̱niet ba̱ bwoi a̱bun a̱ni. A̱wot ba̱ bu chyin á̱niet ba̱ nyia̱ a̱tan a̱ni.

¹⁵ Mat A̱gwaza chat nyi swan a̱tan swat, nyi ka tyia̱ á̱niet ba̱ sang mumwang, a̱wot ba̱ si̱ bat nyin a̱bun a̱ni, ba̱ tyia̱ nywang.

¹⁶ Nyi yet á̱sa̱t á̱niet bya. A̱mgba̱m ma̱ng a̱nia, nyi yet á̱khwo A̱gwaza bya. Mat a̱nia, nyi yok ghwon sa̱t nyin hu, ku yet ta̱fwat nang nyi na nyia̱ a̱ka̱kpa̱t a̱ni bah.

¹⁷ Nyi chyin konyan. A̱wot nyi chat á̱na̱nyiuk nyin ba, ba̱ yet á̱niet khwi a̱ni. Nyi fa̱k a̱wun A̱gwaza. A̱wot nyi nwuak a̱gwam shi.

Nta̱m Á̱khwo

¹⁸ Nyin á̱khwo ba, ku yet ta hwa nyi khwi á̱niet ba̱ nyia̱ tyok da̱ nyin a̱ni ma̱ng fwuo nyiung. Nyi khwi a̱lyiat mba na. A̱wot ma̱ á̱niet byia̱ shok ku á̱niet nyia̱ shonshyon bya ma̱nyin mba nyi na khwi bah; ku ba̱ yet á̱niet a̱ngai bya, nyi khwi mbaa.

¹⁹ Mat A̱gwaza fwuong nyinyang nyin di̱n jen nang nyi nyia̱ ta̱m nang nyi lyen ku yet a̱tan a̱ni, a̱wot nyi si̱ bu gbang a̱lyia̱ nyi si̱ nyap fwuo di̱n jen nang á̱ nya̱shuk nyin a̱ni, mat nyi lyen A̱gwaza.

²⁰ A̱tsak a̱lyiat, ka̱ á̱ tsot nyin mat a̱ka̱tuk nyia̱, nyi si̱ gbang a̱lyia̱, yihwa na yet zang nyin ji? A̱wot ka̱ nyi ma swuo a̱bung mat nyia̱ a̱tan nta̱m, si̱ nyi gbang a̱lyia̱, A̱gwaza na fa̱k nyinyang nyin.

²¹ Mat A̱gwaza yei nyin nyi nyia̱ a̱tan nta̱m, ku di̱ ta̱m hu na yet nyin si̱ swuo a̱bung hwa, ma̱nang Kristi ku nswuo a̱bung da̱nian nyin a̱ni. Nggu wa yet nyin kidee ji. A̱wot ku yet ta hwa nyi khwi ngguu.

²² Ma̱nang á̱ ndyuut tazwa Kristi a̱ni, nyia̱, “A̱ ku nyia̱ a̱ka̱tuk nyia̱ bah. Da̱ nggu, a̱ ku laai a̱yin bah.”

²³ Nang á̱ ku nyia̱ nggu lihyat a̱ni, a̱ si̱ kaat a̱lyiat ma̱ng a̱mba bah, ku nang gu ku nswuo a̱bung ka a̱ni. Da̱ nggu, a̱ fwoot á̱ghyi a̱ chat a̱ tan bah. Da̱ a̱kwonu a̱kya, a̱ si̱ ghwon a̱lyiat nggu na mbwak A̱gwaza kya. A̱ nyia̱ shi̱ri̱ya kuzang njen mami a̱chuchuk a̱ni.

²⁴ Nggu ma̱ a̱pyia̱ nggu, ku kyiak a̱ka̱tuk nyia̱ nzi̱t wu mi̱ vam nggu hu da̱ a̱team a̱khwu; da̱nian zi̱ ka yet nkwom di̱ nyia̱ a̱ka̱tuk nyia̱, a̱wot zi̱ yet a̱chet di̱ nyia̱ a̱tsotswat nta̱m. Mat a̱fi̱fa̱t gu bibya, nang á̱ nchoot nyin.

²⁵ Mi̱ njen jhyang ji̱ swak a̱ni, nyi ku li nang zón seap ji̱ bwuk a̱ni. A̱wot ma̱ninika, nyi bwuok khwi a̱tyu a̱ chok nyin, a̱ si̱ bu cham swuan nyin ji a̱ni.