1 Bitut 1 - A̠lyiat A̠gwaza na di̠n Tyap: A̠li̠ka̠uli A̠fai

Byat

¹ Nung Bitut, n gyet a̱ta̱m Yesu Kristi a̱ni, nung gwa n dyuut wusika jini, ji̱ nat da̱ a̱vwuo á̱niet khwi nang A̱gwaza khai ba̱ swan nang á̱nietchen a̱ni, mi̱ nfam bibyin Funtut, Ga̱la̱tiya, Ka̱fa̱dokiya, A̱siya, ma̱ng Bitiniya.

² Neet gbangbang, A̱gwaza a̱ yet A̱tyia̱ a̱ni, lyen nyin a̱ si̱ khai nyin. A̱wot A̱za̱za̱rak Ntswa wu si̱ jaat nyin, nyi si̱ tyia̱ za̱za̱rak. Mat a̱nia, nyi si̱ khwi Yesu. A̱wot á̱ si̱ shum nyin ma̱ng a̱sok Yesu Kristi na, á̱ ka jaat nyin. Yok A̱gwaza a̱ fa̱k shok nyin, a̱ nang nyin swat nyinyang gba̱mgbam.

Dyep A̱gwaza mat Swuan Sang Sangba̱p

³ Yok á̱ dyep A̱gwaza, a̱ yet A̱tyia̱ A̱tyoli nzi̱t wu, Yesu Kristi a̱ni. Mat si̱sak nang gu nfa̱k kunak nzi̱t ba̱t, a̱ si̱ tyia̱ á̱ si̱ bu byin zi̱t a̱ka̱feang, zi̱ si̱ shya̱ swuan swai; mat nang A̱gwaza nta̱ngam Yesu Kristi ma̱ng swuan ma̱ á̱niet ba̱ ka̱n kwi a̱ni. Si̱ huni nwuak zi̱t chet tyia̱ fwuo ku yet a̱chet a̱ni.

⁴ A̱wot zi̱ si̱ shya̱ a̱wat zi̱ ya gado nang á̱ sak nzi̱t ndyo Ma A̱gwaza tswazwa ku nwai byian ma̱ng tyiak, a̱wot ku si̱ yet a̱za̱za̱rak a̱ni.

⁵ A̱wot mat si̱sak nang zi̱ nnwuak fwuo da̱ A̱gwaza a̱ni, a̱ si̱ chok zi̱t ma̱ng chet nggu hu, si̱ nang zi̱ nsan swuan sang sangba̱p ngaan ji, nang gu sak a̱ na tyai kpa̱sai, konyan a̱ ka lii da̱ ngaan jen wu a̱ni.

⁶ Nang ku ndi a̱nia a̱ni, si̱ nyi gwai nyi swan ma̱ng a̱lyia̱ sai di̱ shya̱ san huni. A̱mgba̱m ma̱ng a̱nia, di̱ a̱bada̱dei njen ma̱nini, nyi na gbang a̱lyia̱ di̱n jen nang á̱ nya̱shuk nyin ma̱ a̱di̱di̱t a̱ni.

⁷ Ya̱shuk huni hwa na tak nang nwuak a̱chuchuk nyin hu ngyet a̱tsatsak wa. Á̱ mai nwuak a̱chuchuk nyin hu ma̱nang á̱ ni̱ nfwui zi̱nariya ma̱ng long, ku jaat zi̱nariya wu a̱ni. Nwuak a̱chuchuk nyin hu swak zi̱nariya a̱ tyiak a̱ni ma̱ za̱nzan ma̱ng yet a̱tsatsak. Mat a̱nia, ka̱ nyi yong mi̱ chet di̱n jen ma̱ a̱di̱di̱t nang á̱ nya̱shuk nyin a̱ni, ku na bai ma̱ng a̱nyin dyep, shi, ma̱ng chyin a̱tuk nang A̱gwaza na ntyai bwuok Yesu Kristi hu kpa̱sai mi̱ swanta hu a̱ni.

⁸ Ku nang nyi nwai nwuan gu a̱ni, nyi chat gu. Ku nang nyi nwai nwuan nggu ma̱nini a̱ni, nyi si̱ nwuak fwuo da̱ nggu. Nyi bu byia̱ a̱gba̱ndang a̱lyia̱ sai, ka̱ swak kidee a̱ni.

⁹ Zang nang nyi shyat ma̱nini di̱ nwuak fwuo nyin hu di̱ Yesu a̱ni, ji̱ yet san swuan nyin hu hwa.

¹⁰ Tazwa san sang sangba̱p huni hwa, nang a̱yaata̱m a̱kwonu A̱gwaza ba, ku nta̱bam ba̱ si̱ zop ma̱ng di̱dang. Ba̱ si̱ dam ba̱t tazwa nhu, di̱n jen nang ba̱ ku nshei á̱zanson tazwa san huni nang á̱ jhyi á̱ sak nyin ndyo mat shok A̱gwaza ji a̱ni.

¹¹ Nang A̱za̱za̱rak Ntswa a̱ bu yet a̱si̱ Kristi wu ntyia̱ a̱yaata̱m a̱kwonu A̱gwaza ba si̱ shei a̱lyiat nggu na di̱ kyang á̱ la̱p á̱ sak ku na bai á̱zanson a̱ni. Ba̱ si̱ zop mami a̱lyiat a̱nia da̱ a̱cha̱chaat njen ma̱ng si̱sak ji nang Kristi na nswuo a̱bung, a̱wot a̱ bu shya̱ a̱gba̱ndang a̱kyenkyai shi á̱zanson a̱ni.

¹² A̱gwaza si̱ tak ma̱ng a̱yaata̱m a̱kwonu nggu ba da̱nang a̱lyiat na mbai da̱nian mba kya bah. A̱wot na̱ bai da̱nian nyin kya. Ma̱ninika, á̱ ka̱n tak nyin A̱sham Nkhang kani neet da̱ a̱vwuo a̱yaata̱m nggu ba. Ba̱ shei nka mami chet A̱za̱za̱rak Ntswa nang á̱ ta̱m ndyo neet Ma A̱gwaza tswazwa a̱ni. Shei a̱lyiat A̱gwaza hu yet kyang a̱ga̱de hwa nang a̱yaata̱m tswá A̱gwaza ba nswan á̱ cham ma̱ng di̱dang, a̱lyiat a̱nia na̱ bai da̱ a̱nu ka.

Yok Á̱niet Khwi ba̱ Swan A̱za̱za̱rak Swat

¹³ Mat a̱nia, nyi nyia̱ a̱tsatsak a̱di̱dam. Nyi bu swan mi̱ la̱p vam ma̱ng ta̱bat a̱pyia̱. Nyi tyia̱ fwuo di̱n shok san sang sangba̱p ji nang nyi na shya̱ di̱n jen nang Yesu Kristi na ntyai a̱kyenkyai shi nggu wu a̱ni.

¹⁴ Ku yet ta hwa nyi swan nang mman A̱gwaza na̱ khwi a̱lyiat nggu na a̱ni. Nyi yok khwi swat mi̱ ndyin di̱n jen swak nyin ji bah. Swat a̱hwa ku yet nyinyang shyuo vam nyin hwa.

¹⁵ Da̱ a̱kwonu a̱kya, ku yet ta hwa nyi swan a̱za̱za̱rak swat ma̱nang A̱gwaza a̱ khai nyin ngyet a̱za̱za̱rak a̱ni.

¹⁶ A̱lyiat A̱gwaza na nyia̱, “Ku yet ta hwa nyi swan a̱za̱za̱rak nswat. Mat, nung A̱gwaza n gyet a̱za̱za̱rak wa.”

¹⁷ Nyi bu jhyung, A̱tyia̱ nyin wu a̱ shya̱ tswazwa ka nang nyi naai a̱ni, a̱ khai a̱yin da̱ á̱ghyi bah. A̱ na nyia̱ nyin shi̱ri̱ya ku a̱ nwuak nyin zang ji̱ nat cha̱chaat ma̱ng nta̱m nang nyi nyia̱ a̱ni. Mat a̱nia, ku yet ta hwa nyi swan swat fwuong a̱wun A̱gwaza di̱n jen nang nyi ngyet á̱nietchen mi̱ swanta hu a̱ni.

¹⁸ Mat nyi lyen A̱gwaza ku tan zang gu nsan nyin nyi yet á̱sa̱t á̱niet da̱ a̱buk nswat nang a̱yaatyia̱ a̱khwop nyin ba ku ghwon nyin ndyo a̱ni. A̱wot zang ji gu ku tan a̱ni, ji̱ ku yet a̱zurfa ku zi̱nariya a̱ tyiai a̱ni bah.

¹⁹ Da̱ a̱kwonu a̱kya, A̱gwaza ku san nyin ma̱ng a̱za̱za̱rak a̱sok Kristi wa. Nggu wa yet kidee Fi̱ng A̱nfwuk A̱gwaza a̱ yet jhyem a̱ bu sang nyan a̱ni.

²⁰ A̱gwaza ku khai Kristi gu yet zang neet nang gu ka̱n mat swanta hu bah. A̱wot da̱nian nyin kya ma̱nini, nang A̱gwaza ntyai nggu kpa̱sai di̱n jen ngaan jini.

²¹ Mami Kristi kya nang nyi nnwuak fwuo da̱ A̱gwaza. A̱wot nyi si̱ nwuak a̱chuchuk ma̱ng tyia̱ fwuo da̱ A̱gwaza, mat a̱ ku ta̱ngam Kristi ma̱ á̱niet ba̱ ka̱n kwi a̱ni, a̱wot a̱ si̱ nwuak gu a̱gba̱ndang shi.

²² Á̱ ku jaat nyin a̱ka̱tuk nyia̱ nyin wu di̱n jen nang nyi ku nwuo khwi a̱chuchuk wu a̱ni. Ma̱ninika, ku yet ta hwa, nyi tak nang nyi nchat á̱ghyang nyin a̱tsatsak chat nang á̱na̱nyiuk a̱ni. Nyi chat á̱ghyang nyin ma̱ng a̱mgba̱m nfwuo nyin na.

²³ Mat á̱ byin nyin a̱ka̱feang neet Ma A̱gwaza tswazwa. Á̱ si̱ nang nyin swuan swai, ji̱ na nwai tyak a̱ni. Swuan swai jini byia̱ sangba̱p bah, mat ji̱ neet mami a̱lyiat A̱gwaza na̱ yet a̱chet na̱ sang sangba̱p a̱ni.

²⁴ Nang A̱lyiat A̱gwaza na nhyia̱ a̱ni, nyia̱ “Á̱nietbishyi li nang a̱shyim á̱kwop a̱ni. A̱wot shisham mba ji li nang shisham nkywat a̱ka̱kwon a̱ni. Á̱kwop ba ni̱ shyuk. A̱wot nkywat a̱ka̱kwon na na̱ ta̱kut.

²⁵ A̱wot a̱lyiat A̱gwaza na yet a̱chet si̱ nat sang sangba̱p.” A̱wot a̱lyiat a̱nia nia yet A̱sham Nkhang ka nang á̱ ku shei nyin a̱ni.