1 A̱ta̱solonikawa 4 - A̠lyiat A̠gwaza na di̠n Tyap: A̠li̠ka̠uli A̠fai

Tangka̱i Swat ku Myim A̱gwaza a̱ni

¹ Di̱ ngaan hu, á̱niet khwi Yesu ba nang n chat a̱ni, zi̱ naai nyin mami a̱lyoot A̱tyoli nzi̱t wu Yesu, nyi swan swat ku myim A̱gwaza a̱ni, ma̱nang zi̱ ka̱n tyiet nyin a̱ni. Ma a̱nia wa nyi nswan ma̱nini, a̱wot zi̱ tyia̱ nyin gba̱gbak nyi ya a̱son nyi mban di̱ nyia̱ a̱nia hu ba̱t.

² Mat nyi lyen tyiet hu zi̱ ku tyiet nyin mat tyok A̱tyoli Yesu hu a̱ni.

³ Tyiet huni huhwa yet; A̱gwaza chat nyi jaat á̱pyia̱ nyin, nyi swan a̱za̱za̱rak nswat, a̱wot nyi ghwon kuzang tangka̱i a̱shi̱shi̱k nyia̱.

⁴ Ku yet ta hwa kuzang a̱yin a̱ lyen si̱sak ji gu na mba̱ng vam nggu hu ma̱ za̱za̱rak di̱n vak nang á̱ na nchyin a̱ni.

⁵ Nyi yok nyia̱ a̱ka̱tuk nshyuo vam nang nnwap na̱ chyi A̱gwaza ni̱ nnyia̱ a̱ni bah.

⁶ A̱wot ma̱ a̱lyiat katnaan, a̱yin gu yok bwuo a̱tyu khwi a̱bun ku a̱ shyok gu di̱n vak kwai ma̱ng a̱byii̱k nggu wu bah. Mat A̱gwaza na tan a̱ka̱tuk nyia̱ konyan a̱ nyia̱ tangka̱i katnaan huni a̱ni, ma̱nang zi̱ ka̱n tak ma̱ng a̱nyin, zi̱ si̱ gba nyin a̱ni.

⁷ A̱gwaza ku yei nzi̱t, zi̱ swan a̱shi̱shi̱k nswat bah. A̱wot a̱ yei nzi̱t, zi̱ jaat á̱pyia̱ nzi̱t zi̱ swan a̱za̱za̱rak nswat wa.

⁸ Mat a̱nia, a̱tyu a̱ lak tyiet huni a̱ni, a̱ lak khwi tyiet a̱tyubishyi hwa bah. A̱gwaza a̱ nang nyin A̱za̱za̱rak Ntswa nggu wu a̱ni, nggu wa nang gu lak.

⁹ Da̱ a̱lyiat chat á̱ghyang na, zi̱ na chat zi̱ lyuut nyin ndyo bah. Mat nyin ma̱ á̱pyia̱ nyin, A̱gwaza wa ka̱n tyiet nyin, nyi ka chat á̱ghyang.

¹⁰ A̱tsak a̱lyiat, nyi wa ka̱n tak nang nyi nchat a̱mgba̱m á̱niet khwi ba̱ shya̱ mi̱ fam a̱byin Ma̱kidoniya a̱ni. A̱mgba̱m ma̱ng a̱nia, á̱niet khwi Yesu nang n chat a̱ni, zi̱ tyei nyin gba̱gbak, nyi ya a̱son nyi bu mbeang chat á̱ghyang hu.

¹¹ Nyi kwan nyi swan shonshyon. Nyi tyia̱ a̱lyia̱ di̱ nkyang nang nyi nyia̱ a̱ni. A̱wot nyi yok tyei á̱ghyi di̱ si̱ á̱ghyang á̱niet bah. Nyi bu nyia̱ nta̱m ma̱ng mbwak nyin. Nyi beang á̱pyia̱ nyin, ma̱nang zi̱ ku ntak ma̱ng a̱nyin a̱ni.

¹² Nyi nyia̱ a̱nia da̱nian nyi ka swan swat shansham da̱ a̱vwuo á̱niet ba̱ nwai khwi Yesu a̱ni, ba̱ bu chyin nyin, a̱wot nyi ka yok ta̱yuk da̱ á̱ghyang á̱niet bah.

Tyiet tazwa Bwuok A̱tyoli Yesu da̱nian Á̱niet Khwi

¹³ Ma̱ninika á̱niet khwi Yesu ba nang n chat a̱ni, da̱ a̱lyiat tazwa á̱niet khwi ba ba̱ ka̱n kwi a̱ni; zi̱ chat nyi shya̱ mi̱n dyin bah, ki̱ di̱ nfwuo nyin na na̱ du byian nang á̱kum á̱niet ba̱ sang tyia̱ fwuo di̱ swuan sang sangba̱p a̱ni.

¹⁴ Mat ki̱ zi̱ nwuak a̱chuchuk nang Yesu khwu, a̱wot á̱ si̱ ta̱ngam gu ma̱ng swuan ma̱ á̱niet ba̱ ka̱n kwi a̱ni; ma a̱nia wa zi̱ nwuak a̱chuchuk nang A̱gwaza na nta̱ngam á̱niet khwi ba̱ ka̱n kwi a̱ni ma̱ng swuan. A̱wot A̱gwaza na bwuok ma̱ng a̱mba dundung ma̱ng Yesu a̱ bai ndyo.

¹⁵ Ma̱nang a̱tyoli Yesu ma̱ a̱pyia̱ gu nhyia̱ a̱ni, zi̱ tak ma̱ng a̱nyin; nzi̱t á̱niet khwi zi̱ ni̱ swuan a̱ni, a̱tuk nang A̱tyoli Yesu na mbwuok a̱ bai a̱ni, zi̱ na khwat a̱son zi̱ myim ma̱ng Yesu ghwon á̱niet khwi ba̱ ka̱n kwi a̱ni bah, ku ma̱ chunchwiit.

¹⁶ Mat A̱tyoli Yesu ma̱ a̱pyia̱ nggu si̱ ba̱ bwuok a̱ neet Ma A̱gwaza tswazwa, a̱ kam mi̱ chet. A̱gba̱ndang a̱ta̱m tswa A̱gwaza na yorong ma̱ng a̱gba̱ndang a̱nwuat, a̱ bu na tyiap a̱gwa A̱gwaza. A̱wot á̱niet khwi Yesu ba̱ ka̱n kwi a̱ni, bibya na yet a̱son doot ma̱ng swuan ma̱ á̱niet ba̱ ka̱n kwi a̱ni.

¹⁷ A̱jawa nzi̱t á̱niet khwi Yesu ba̱ ni̱ swuan a̱ni, a̱mgba̱m zi̱t ma̱ng a̱mba á̱ na kyiak zi̱t á̱ nat ndyo mi̱ kyai tswazwa, zi̱ si̱ myim ndung ma̱ á̱ni̱nian ma̱ng A̱tyoli Yesu. A̱wot zi̱ na swan ndung ma̱ng a̱nggu si̱ nat sang sangba̱p.

¹⁸ Mat a̱nia, nyi tyia̱ á̱ghyang nyin gba̱gbak ma̱ng a̱lyiat nani.