1 A̱ta̱solonikawa 2 - A̠lyiat A̠gwaza na di̠n Tyap: A̠li̠ka̠uli A̠fai

Nta̱m Bulut ma̱ A̱keang Ta̱solonika

¹ Á̱na̱nyiuk nung ba mi̱ khwi Yesu nang n chat a̱ni, nyin ma̱ á̱pyia̱ nyin, nyi lyen nang bai nzi̱t hu da̱ a̱vwuo nyin ngyet a̱buk kyang wa bah.

² Ma̱nang nyi ndyen zi̱ ku nswuo a̱bung ma̱ng si̱sak ji nang á̱ ku njhyuai nzi̱t á̱ si̱ nyia̱ ma̱ng a̱nzi̱t ma̱ a̱keang Filibi a̱ni, zi̱ si̱ gbang a̱lyia̱ da̱ A̱gwaza nzi̱t wu. Zi̱ si̱ tak nyin A̱sham nkhang nggu ka a̱mgba̱m ma̱ng a̱ka̱tuk nfi̱p wu nang zi̱ ku shya̱ a̱ni.

³ A̱sham nkhang nang zi̱ shei a̱ni, ka̱ mbyia̱ a̱ka̱laa ku a̱guk mi̱ fwuo bah. Da̱ nzi̱t, zi̱ kwan zi̱ shyok nyin wa bah.

⁴ Da̱ a̱kwonu a̱kya, nang A̱gwaza nshim a̱ si̱ khai nzi̱t, a̱ si̱ tyia̱ nzi̱t A̱sham nkhang ka mbwak a̱ni. Mat a̱nia, zi̱ shei nka da̱nian á̱niet bya ba̱ ka fa̱k nyinyang zi̱t bah. Zi̱ chat A̱gwaza a̱ mai nfwuo nzi̱t na a̱ni, nggu wa a̱ fa̱k nyinyang zi̱t.

⁵ Nang nyi ndyen a̱ni, nzi̱t zi̱ ku tak nyin lyen a̱nu hwa bah. Da̱ nzi̱t, zi̱ ku chat zi̱ laai nyin wa bah. Zi̱ ku mak nyia̱ nkyang mami wuwok, a̱wot zi̱ si̱ chat zi̱ niat na bah. A̱gwaza wa yet sheda nzi̱t hu.

⁶ Da̱ nzi̱t, zi̱ ku chat shya̱ dyep hwa da̱ a̱vwuo á̱niet, ku da̱ a̱vwuo nyin, ku da̱ a̱vwuo á̱ghyang á̱niet bah.

⁷ Nang a̱yaata̱m Yesu a̱ni, zi̱ ku myim zi̱ yet á̱niet chat beang da̱ a̱vwuo nyin. A̱mgba̱m ma̱ng a̱nia, zi̱ si̱ khwi nyin shonshyon nang a̱yang ni̱ nnyia̱ na̱mbwon mman nggu a̱ni.

⁸ Zi̱ chat nyin ba̱t, huhwa si̱ mbyia̱ zi̱ si̱ fa̱k a̱lyia̱ sai zi̱ shei nyin A̱sham nkhang A̱gwaza kya ma̱nyin ka bah. A̱wot zi̱ si̱ nwuak swuan nzi̱t ji ja, mat nyi yet á̱niet nang zi̱ fa̱k da̱ mba a̱ni za̱m.

⁹ Á̱na̱nyiuk nung ba mi̱ khwi Yesu nang n chat a̱ni, nyi jhyung si̱sak zi̱ ku nnyia̱ nta̱m a̱ta̱mam ma̱ng a̱tyetuk, da̱nian ki̱ di̱ zi̱ du yet nyin kpa̱t di̱ shei nyin A̱sham nkhang A̱gwaza ka.

¹⁰ Nyi yet á̱niet sheda bya mbeang A̱gwaza, nang zi̱ nswan a̱za̱za̱rak, a̱tsotswat, ma̱ng swat sang a̱bun mami nyin, nyi yet á̱niet ba̱ nwuak fwuo da̱ Yesu a̱ni.

¹¹ Ma̱nang nyi ndyen a̱ni, zi̱ ku swan ma̱ng kuzang a̱yin ma̱ nyin nang a̱tyia̱ ni̱ nswan ma̱ng mman nggu a̱ni.

¹² Zi̱ ku gba nyin. Zi̱ si̱ tyia̱ nyin gba̱gbak. Zi̱ si̱ yong nyin si̱sak ji nyi na nswan swat ku myim A̱gwaza a̱ni, a̱tyu a̱ yei nyin mami tyok nggu hu ma̱ng a̱kyenkyai shi nggu wu a̱ni.

¹³ Mat a̱nia, zi̱ ni̱ gwai A̱gwaza kuzang jen. Mat nang nyi ku nsan A̱lyiat A̱gwaza na ma̱ng a̱nzi̱t a̱ni, nyi ku san naa nang a̱si̱ a̱tyubishyi nia a̱ni bah. A̱wot nyi si̱ san naa na̱ yet á̱si̱ A̱gwaza nia, mami a̱chuchuk a̱nia wa na̱ ndi. Ni̱nia nyia̱ nta̱m na mi̱ nfwuo nyin na, nyin á̱niet ba ba̱ nwuak a̱chuchuk a̱ni.

¹⁴ Á̱na̱nyiuk nung ba mi̱ khwi Yesu nang n chat a̱ni, nyi ku maat á̱niet khwi A̱gwaza ba ba̱ shya̱ mi̱ fam a̱byin Yahudiya ba̱ mun á̱pyia̱ ma̱ng Yesu Kristi a̱ni. Mat swuo a̱bung hu nang nyi ku swuo mbwak á̱niet nyin ba a̱ni, ma a̱nia wa ba̱ nswuo a̱bung mbwak A̱yahudawa ba, ba̱ yet á̱niet mba ba a̱ni.

¹⁵ Tangka̱i A̱yahudawa huni hwa ku hyat A̱tyoli Yesu ma̱ng a̱yaata̱m a̱kwonu A̱gwaza gbangbang. A̱wot ma̱ninika ba̱ bu ya̱shuk zi̱t ba̱t. A̱wot ba̱ si̱ byian A̱gwaza fwuo. Ba̱ si̱ bu nyia̱ na̱nvan ma̱ng á̱niet ma̱ a̱di̱di̱t a̱di̱t.

¹⁶ Ba̱ si̱ nvwuong nzi̱t shei A̱lyiat A̱gwaza na da̱ a̱vwuo Nnwap na̱ nwai yet A̱yahudawa a̱ni, nyia̱ kalak ba̱ du shya̱ san da̱ a̱vwuo A̱gwaza. Huhwa mbyia̱ ba̱ ngya a̱son mi̱ mban a̱ka̱tuk nyia̱ mba wu si̱ nat sangba̱p. A̱wot di̱ ngaan hu, mwai lyen A̱gwaza hu wa ka̱n chyok tazwa mba.

Bulut Byia̱ Fwuo di̱ Nat Byiat A̱ta̱solonikawa

¹⁷ Nyin á̱na̱nyiuk nzi̱t ba mi̱ khwi Yesu nang zi̱ chat a̱ni, mat nang á̱ nghai zi̱t ma̱ng a̱nyin da̱ a̱bada̱dei njen a̱ni (mami vam hwa kang ma̱ng a̱di̱dam); a̱mgba̱m ma̱ng a̱nia, zi̱ si̱ byia̱ fwuo ba̱t zi̱ chat zi̱ li nyin a̱ghyi ma̱ng a̱ghyi.

¹⁸ Huhwa mbyia̱, zi̱ ku chat zi̱ bai ma̱ nyin. A̱wot nung Bulut, n si̱ kwan n chong da̱ a̱vwuo nyin nchi̱ri̱ng ba̱t, a̱wot A̱ta̱nyeang ka si̱ nvwuong nzi̱t.

¹⁹ Yihwa yet kyang tyia̱ fwuo nzi̱t hu, ku a̱gwai, ku zang nzi̱t ji, nang zi̱ bye ntam a̱zaghyi A̱tyoli Yesu a̱tuk bwuok nggu ka? Mee nyin byaa?

²⁰ A̱tsak a̱lyiat, nyin bya yet a̱gwai ma̱ng shi nzi̱t hu.