1 A̱korontiyawa 7 - A̠lyiat A̠gwaza na di̠n Tyap: A̠li̠ka̠uli A̠fai

Tyiet tazwa Swat Nyeang

¹ Ma̱ninika, n na nwuak nyin shim tazwa lyip nang nyi lyuut mi̱ wusika nyin ji a̱ni: “Ku yet a̱sham a̱tyok a̱ swan da̱ mi̱ a̱byii̱k a?”

² A̱tsak a̱lyiat, a̱mgba̱m ma̱ng a̱nia, mat nang á̱niet nda̱u a̱shi̱shi̱k nyia̱ a̱ni, ku myim kuzang a̱tyok a̱ bwuo a̱byii̱k gu; ma a̱nia wa kuzang a̱byii̱k a̱ nyeang a̱tyok gu.

³ Ku myim a̱tyok wu gu ni̱ nnwuak vam nggu hu da̱ a̱vwuo a̱byii̱k nggu ka; ma a̱nia wa a̱byii̱k wu, nggu meang, gu ni̱ nwuak vam nggu hu da̱ a̱vwuo a̱tyok nggu ka.

⁴ A̱byii̱k wu byia̱ tyok tazwa vam nggu hu bah, si̱ a̱tyok wu. Ma a̱nia wa, a̱tyok wu byia̱ tyok tazwa vam nggu hu bah, si̱ a̱byii̱k wu.

⁵ Nyi yok lak myian ma̱ng á̱ghyang nang a̱tyok ma̱ng a̱byii̱k a̱ni bah, si̱ nang nyin a̱feang shim nyi ghwon myian hu ma̱ng á̱ghyang da̱ a̱banjen ma̱ a̱da̱dei; da̱nian nyi ka nwuak á̱pyia̱ nyin di̱ naai A̱gwaza. A̱wot jen jhyang nyi bu myia̱ ma̱ng á̱ghyang, kalak A̱ta̱nyeang ka̱ du mak nyin, nyi kwa mat nwai ta̱bat á̱pyia̱ nyin hu.

⁶ N dyiat á̱lyiat nani mat n tyei nyin á̱lyiat nia, doka ja nang n nwuat nyin bah.

⁷ Ki̱ chat hwa wa yet shya̱, si̱ á̱niet ba swan di̱ mi̱n nyeang ma̱nang a̱nung a̱ni. A̱wot konyan byia̱ tangka̱i za̱nang chet nang A̱gwaza nang gu a̱ni; a̱ghyang a̱niet byia̱ tangka̱i za̱nang chet jini, a̱ghyang a̱niet si̱ byia̱ tangka̱i za̱nang chet jhyang ji̱ vwuon a̱ni.

⁸ Ma̱ninika, n dyiat ma̱ng a̱nyin, nyin nyi ka̱n nwai nyia̱ nyeang a̱ni, ma̱ng á̱nyiuk ba nang á̱tyok mba ba ka̱n kwi a̱ni: Ku yet a̱sham nyi swan di̱ mi̱n nyeang, ma̱nang nung n swan a̱ni.

⁹ A̱wot ka̱ ba̱ byia̱ chet nang ba̱ na nta̱bat á̱pyia̱ mba a̱ni bah, ku myim ba̱ nyia̱ nyeang. Mat ku lan á̱ nyia̱ nyeang nang shyuo vam na nswuo chet a̱tyubishyi a̱ni.

¹⁰ A̱wot tazwa á̱niet ba̱ ka̱n nyia̱ nyeang hu a̱ni, n byia̱ doka ji neet da̱ a̱vwuo nung a̱ni bah, ji̱ neet da̱ a̱vwuo A̱gwaza kya. Ku yet ta hwa, a̱byii̱k nyeang a̱ swan nyeang ma̱ng a̱tyok gu, a̱ yok tyat hu bah.

¹¹ A̱wot ka̱ a̱ ma tyat nyeang nhu, yok gu swan a̱pyia̱ nggu di̱ mi̱n nyeang. Ka̱ a̱ ma si̱ mi̱n swan a̱nia bah, si̱ gu bwuok a̱ jhyi swat nyeang nggu hu ma̱ng a̱tyok nggu wu. Ma a̱nia wa a̱tyok wu, ku yet ta hwa gu swan nyeang ma̱ng a̱byii̱k nggu wu, gu yok tyat hu bah.

¹² Ma̱ninika, nyin á̱kum á̱niet ka, n na ndyiat ma̱ng a̱nyin, ku nang n san doka jini da̱ a̱vwuo A̱gwaza a̱ni bah. Ka̱ a̱tyok a̱ khwi Yesu a̱ni byia̱ a̱byii̱k a̱ nwai khwi Yesu a̱ni, a̱wot a̱byii̱k wu si̱ shim a̱ ya a̱son ma̱ng swat nyeang ma̱ng a̱tyok a̱wa; a̱tyok wu gu yok tyat nyeang hu bah.

¹³ A̱wot ka̱ a̱byii̱k a̱ khwi Yesu a̱ni byia̱ a̱tyok a̱ nwai khwi Yesu a̱ni, a̱wot a̱tyok wu si̱ shim a̱ ya a̱son a̱ swan nyeang ma̱ng a̱nggu; ku yet ta hwa a̱byii̱k wu a̱ swan nyeang hu ma̱ng a̱tyok a̱wa, gu yok tyat nyeang hu bah.

¹⁴ Mat a̱tyok a̱ nwai khwi Yesu a̱ni, na shya̱ kpa̱mkpaan ma̱ng A̱gwaza, mat a̱byii̱k nggu wu a̱ khwi Yesu a̱ni. Ma a̱nia wa, a̱byii̱k a̱ nwai khwi Yesu a̱ni, na shya̱ kpa̱mkpaan ma̱ng A̱gwaza mameang. Ki̱ a̱nia wa bah, si̱ mman mba na shya̱ kpa̱mkpaan ma̱ng A̱gwaza bah. A̱wot ma̱ninika na̱ shya̱ kpa̱mkpaan ma̱ng A̱gwaza.

¹⁵ A̱wot ka̱ a̱tyok ku a̱byii̱k a̱ nwai khwi Yesu a̱ni, yong mi̱ chet a̱ chat tyat nyeang, á̱ yok gu gu tyat nyeang hu. Ka̱ ku li a̱nia, a̱tyok ku a̱byii̱k a̱ yet a̱tyu khwi Yesu a̱ni, byia̱ a̱ka̱ta ma̱ng a̱tyu a̱ nwai khwi Yesu a̱ni bah. Mat A̱gwaza ka̱n gyorong nyin nyi swan swat nyinyang.

¹⁶ A̱wot nyin á̱tyok, nyi lyen shimba da̱nian nyin kya nang á̱nyiuk nyin ba ba̱ nwai khwi Yesu a̱ni, na shya̱ swuan sang sangba̱p ji baa? Ma a̱nia wa nyin á̱nyiuk, nyi lyen shimba da̱nian nyin kya nang á̱tyok nyin ba ba̱ nwai khwi Yesu a̱ni na shya̱ swuan sang sangba̱p ji baa?

Yok Á̱niet Khwi ba̱ Swan tangka̱i Swat nang A̱gwaza Chat a̱ni

¹⁷ A̱mgba̱m ma̱ng a̱nia, konyan ma̱ nyin gu ya a̱son mi̱ swat di̱ si̱sak nang A̱gwaza nsak gu a̱ni. A̱wot nyi swan ma̱nang nyi ku nswan A̱gwaza si̱ ntsa yorong nyin a̱ni. Doka jini ja nang nung Bulut n nwuak a̱mgba̱m susot á̱niet khwi ji.

¹⁸ Kidee, a̱tyok nang á̱ tyia̱ mi̱ chen, neet nang gu ka̱n nwuo khwi Yesu a̱ni bah, gu yok chat a̱ niat nyan tyia̱ mi̱ chen ji bah. Ma a̱nia wa, a̱tyok a̱ nwuo khwi Yesu nang á̱ ka̱n tyia̱ nggu mi̱ chen a̱ni bah, gu yok chat á̱ tyia̱ nggu mi̱ chen bah.

¹⁹ Tyia̱ mi̱ chen ku nwai tyia̱ mi̱ chen ku shyak kyang bah. Kyang ku yet a̱ swak a̱ni, huhwa yet; á̱ khwi doká A̱gwaza ji.

²⁰ A̱tsak a̱lyiat, yok konyan ma̱ nyin gu swan di̱ si̱sak ji nang gu ku nswan A̱gwaza si̱ ngyorong gu a̱ni.

²¹ A yet a̱khwo waa? Nyi yok ghwon si̱ a̱hwa ku tyia̱ nyin a̱fi̱fa nang nyi na nwai khwi Yesu a̱ni bah. A̱wot ka̱ nyi shya̱ a̱wat shot di̱ yet a̱khwo hu, nyi san.

²² Nyi yok bwung bah; ka̱ nyi ku yet á̱khwo bya, di̱n jen nang A̱gwaza ku ngyorong nyin a̱ni, ma̱ninika, mami a̱lyoot Yesu, nyi yet á̱khwo bya bah. Ma a̱nia wa, ka̱ nyi ku swan di̱ mi̱n khwo nang A̱gwaza ku ngyorong nyin a̱ni, ma̱ninika, nyi yet á̱khwo Kristi bya.

²³ A̱gwaza san nyin, a̱ si̱ tan a̱gba̱ndang zang wa da̱nian nyin. Mat a̱nia, nyi yok yet á̱khwo á̱niet swanta ba bah.

²⁴ Nyin á̱niet khwi Yesu ba nang n chat a̱ni, yok konyan ma̱ nyin, gu swan ma̱nang gu ku nswan, A̱gwaza si̱ ntsa yorong gu a̱ni.

A̱ka̱neam nwai Nyeang ma̱ng Á̱nyiuk nang Á̱tyok ba Kwi a̱ni

²⁵ Ma̱ninika, n dyuut nyin ndyo tazwa lyip nyin hu da̱ a̱ka̱neam na̱ ka̱n nwai nyeang a̱ni. A̱gwaza nwuak nung doka da̱nian mba bah. A̱mgba̱m ma̱ng a̱nia, A̱gwaza si̱ nwuak nung mumwang ku yet a̱tsatsak a̱ni, mat shok nggu ji.

²⁶ Di̱ li nung hu, ku na lan ka̱ a̱yin swan di̱ mi̱n nyeang, mat swuo a̱bung hu ku nshya̱ a̱ni.

²⁷ Ka̱ a ka̱n nyia̱ nyeang, yok tyat hu bah. Ma a̱nia wa, ka̱ a ma ka̱n nyia̱ nyeang bah, yok chat a nyia̱ nyeang hu bah.

²⁸ A̱wot ka̱ a̱tyok ma ka̱n nyia̱ nyeang, ku yet a̱ka̱tuk nyia̱ bah. Ma a̱nia wa, ka̱ nggwon neam ka̱n nyia̱ nyeang, ku yet a̱ka̱tuk nyia̱ bah. A̱mgba̱m ma̱ng a̱nia, nyin á̱niet ba ba̱ ka̱n nyia̱ nyeang mi̱ jen jini a̱ni, nyi na nwuo a̱fi̱fa swanta wuni mat kyang bwak nyin hu. A̱wot n kwan wa n ti̱n nyin mi̱ tangka̱i a̱fi̱fa a̱wa.

²⁹ Nyin á̱niet khwi Yesu ba nang n chat a̱ni, kyang nang n fa nhyia̱ ma̱ng a̱nyin a̱ni, huhwa yet; jen ji bwat a̱ni, ji̱ shi bah. Mat a̱nia, di̱ yong huni si̱ nat á̱zanson, á̱niet ba̱ ka̱n nyia̱ nyeang a̱ni, ba̱ yok ntyia̱ nfwuo di̱ nyeang hwa ma̱nyin hu bah.

³⁰ Á̱niet ba̱ shya̱ mi̱ nfwuo byian, ku á̱si̱ ba ba̱ byia̱ fwuo sai a̱ni, ku á̱si̱ ba ba̱ kwai nkyang a̱ni; ba̱ yok shim nkyang nani na̱ swuo chet mba bah, ku byian nfwuo, ku fwuo sai, ku byia̱ zwá.

³¹ Á̱niet ba̱ nyia̱ nta̱m da̱nian swanta huni a̱ni, ba̱ yok sak fwuo da̱ ná bah. Mat swanta huni ma̱nang zi̱ ndyen a̱ni, á̱ na labeang bah, ku na swak.

³² N chat nyi khap pyipyia̱ nyin da̱ a̱fi̱fa nkyang swanta nani. A̱tyu a̱ ka̱n nyia̱ nyeang a̱ni bah, a̱ ni̱ kyiak jen nggu ji a̱ nyia̱ A̱gwaza ta̱m. A̱wot a̱ bu nyia̱ a̱di̱dam di̱ si̱sak gu na ntyia̱ A̱gwaza a̱ fa̱k nyinyang gu a̱ni.

³³ A̱wot a̱tyok a̱ ka̱n nyia̱ nyeang a̱ni, ku yet ta hwa, a̱ nyia̱ a̱di̱dam di̱ nkyang swanta, ma̱ng si̱sak ji nang gu na ntyia̱ a̱byii̱k nggu wu a̱ fa̱k nyinyang a̱ni.

³⁴ A̱wot fwuo a̱tyok hu ni̱ ka̱u a̱ka̱feang. Ma a̱nia wa, a̱byii̱k a̱ ka̱n nyeang, a̱wot a̱ si̱ doot a̱ swan da̱ ma̱ a̱tyok, ku a̱byii̱k a̱ ka̱n mak nyia̱ nyeang a̱ni bah; ka̱ a̱ doot a̱ nwuak a̱pyia̱ nggu di̱ nta̱m A̱gwaza. A̱wot a̱ bu swan a̱za̱za̱rak nswat mi̱ vam ma̱ng tswa. A̱wot a̱byii̱k nyeang, ku yet ta hwa gu nyia̱ a̱di̱dam di̱ nkyang swanta, ma̱ng si̱sak ji nang gu na ntyia̱ a̱tyok nggu wu a̱ fa̱k nyinyang a̱ni.

³⁵ N dyuut a̱lyiat nani da̱nian n ka beang nyin wa. N dyuut naa da̱nian n ka nvwuong nyin nyia̱ kyang hu nang nfwuo nyin na kyiak a̱ni bah. N chat nyi nyia̱ kuzang kyang ku na beang nyin nyi nyia̱ ta̱m A̱gwaza hu shansham swak a̱ni, di̱ mi̱n nkyang ma̱ a̱da̱dei na̱ na tyia̱ nyin ndyem di̱ nyia̱ nta̱m A̱gwaza na a̱ni.

³⁶ A̱wot ka̱ a̱tyok dam nyia̱ a̱ nyia̱ nggwon neam ka̱ yet a̱sak gu a̱ni shansham bah, a̱wot a̱ si̱ chat a̱ myian ma̱ng a̱nka; ku myim a̱ bwuo nka, ka̱ yet a̱kyuo gu ma̱nang fwuo nggu hu nkyiak a̱ni. Ku yet a̱ka̱tuk nyia̱ wa bah.

³⁷ A̱wot ka̱ a̱tyok ka̱n kyiak mi̱ fwuo gu nyia̱ a̱ na nyia̱ nyeang bah, a̱wot a̱ si̱ khwi shonshyon, a̱ si̱ ta̱bat a̱pyia̱ nggu di̱ di̱dang a̱byii̱k; a̱ nyia̱ shansham, ka̱ a̱ swan di̱ mi̱n nyeang hu.

³⁸ Mat a̱nia, di̱ li nung hu, a̱tyok a̱ nyia̱ nyeang ma̱ng nggwon neam ka̱ yet a̱sak gu a̱ni, a̱ nyia̱ shansham. A̱wot a̱tyu a̱ swan di̱ mi̱n nyeang a̱ni, a̱ nyia̱ shansham a̱ swaak.

³⁹ Ka̱ a̱tyok a̱byii̱k ni̱ shya̱ ma̱ng swuan, ku myim a̱byii̱k wu a̱ tyat nyeang ma̱ng a̱tyok wu bah. Ka̱ a̱tyok wu ma ka̱n khwu, á̱ shim a̱byii̱k wu ndyo gu nyeang a̱tyok a̱ghyang nang fwuo nggu hu chat a̱ni. A̱wot ku yet ta hwa a̱tyok wu a̱ yet a̱tyu khwi A̱gwaza.

⁴⁰ A̱wot di̱ li nung hu, ku na lan ka̱ a̱byii̱k wu swan di̱ mi̱n nyeang. A̱wot n nyia̱ a̱di̱dam n tyia̱ nyin a̱lyiat nani na̱ neet da̱ a̱vwuo A̱za̱za̱rak Ntswa A̱gwaza a̱ni.