1 A̱korontiyawa 6 - A̠lyiat A̠gwaza na di̠n Tyap: A̠li̠ka̠uli A̠fai

Á̱niet Khwi ba̱ yok Nat ma̱ng Á̱ghyang mba mi̱ Tutu Shi̱ri̱ya bah

¹ Ka̱ a̱yin ma̱ nyin ya fwuang ma̱ng a̱tyu khwi Yesu a̱ghyang, yihwa mbyia̱ gu na nnat mi̱ tutu shi̱ri̱ya á̱niet nwai khwi Yesu, da̱nian ba̱ ka nyia̱ nggu shi̱ri̱ya. Da̱ a̱kwonu a̱kya, ku myim ba̱ nat da̱ a̱vwuo a̱tung á̱niet khwi Yesu bya, ba̱ nyia̱ mba shi̱ri̱ya ji!

² A̱wot, nyi lyen nang á̱niet khwi Yesu bya na nyia̱ á̱niet swanta ba shi̱ri̱ya ji baa? A̱wot ki̱ nyin bya na nyia̱ á̱niet swanta ba shi̱ri̱ya ji, ku myim nyi nyia̱ shi̱ri̱ya a̱bachyuang nkyang nani na̱ shya̱ mami nyin a̱ni baa?

³ Nyi lyen nang zi̱ na nnyia̱ a̱yaata̱m tswá A̱gwaza ba shi̱ri̱ya baa? Ka̱ a̱nia wa, mami a̱chuchuk ku myim nyi kwan nyi nyia̱ shi̱ri̱ya a̱bachyuang nkyang na̱ yet á̱si̱ swanta nani a̱ni.

⁴ Ka̱ nyi byia̱ fwuang tazwa ntangka̱i á̱lyiat nani nang nyi nchong shi̱ri̱ya a̱ni, yihwa mbyia̱ nyi nchong da̱ a̱vwuo á̱niet shi̱ri̱ya ba̱ nwai yet á̱niet khwi a̱ni?

⁵ N hyia̱ ma̱ng a̱nyin a̱lyiat nani da̱nian n ka tyia̱ nyin nsum nia. Á̱ mbyia̱ a̱yin mami a̱mgba̱m nyin á̱niet khwi ba, a̱ byia̱ mumwang ku maai a̱ faat shi̱ri̱ya ma̱ nyin a̱ni baa?

⁶ A̱wot da̱ a̱kwonu a̱kya, a̱tyu khwi Yesu ni̱ nat ma̱ng a̱na̱nyiuk gu a̱tyu khwi mi̱ tutu shi̱ri̱ya, a̱ ka̱ tyia̱ nggu á̱tan a̱zaghyi á̱niet ba̱ nwai yet á̱niet khwi Yesu a̱ni!

⁷ Nang nyi nchong ma̱ng á̱ghyang nyin da̱ a̱vwuo shi̱ri̱ya á̱niet ba̱ nwai yet á̱niet khwi a̱ni, ku tak nang nyi ngyet á̱niet lat bya mi̱ khwi Yesu hu. Yihwa mbyia̱ nyi na nnwai nyap fwuo hu, nyi ghwon á̱ tyia̱ nyin a̱bun, a̱wot nyi bu bwung kuzang kyang? Yihwa mbyia̱ nyi si̱ mi̱n ghwon á̱ shyok nyin bah?

⁸ Da̱ a̱kwonu a̱kya, nyin bya ma̱ á̱pyia̱ nyin ni̱ bwuo a̱bun wu. Nyi bu shyuo á̱na̱nyiuk nyin ba, ba̱ yet á̱niet khwi dundung ma̱ng a̱nyin a̱ni.

⁹ Nyi lyen da̱nang á̱ka̱tuk á̱niet na nshya̱ gado mi̱ Tyok A̱gwaza hu bah, ka̱ni? Nyi yok laai pyipyia̱ nyin bah: Á̱niet ba̱ nyia̱ a̱shi̱shi̱k nyia̱ a̱ni; ku á̱niet khwi nghwughwu a̱yaagwaza sang swuan; ku á̱niet katnaan; ku á̱tyok ba̱ lyiai pyipyia̱ mba nang khám a̱ni da̱ a̱vwuo á̱tyok á̱ghyang; ku á̱tyok ba khwat ma̱ng á̱tyok mbeang á̱nyiuk ba̱ khwat ma̱ng á̱nyiuk a̱ni;

¹⁰ ku á̱tang; ku á̱niet wuwok di̱ chat nkyang swanta; ku á̱niet hyeng a̱kan; ku á̱niet fwoi á̱niet; ku á̱niet ba̱ shyuo á̱ghyang a̱ni; á̱ mbyia̱ a̱yin ma̱ mba a̱ na shya̱ gado mi̱ Tyok A̱gwaza hu a̱ni bah.

¹¹ Á̱ghyang á̱niet ma̱ nyin ku nyia̱ a̱nia mi̱ njen nang nyi ku nwai yet á̱niet khwi a̱ni. A̱wot á̱ si̱ kwi nyin. Á̱ si̱ jaat nyin, nyi si̱ tyia̱ za̱za̱rak. A̱gwaza si̱ bu tak kpa̱sai nang gu nkyiak nyin nyi yet á̱tsotswat á̱niet sang a̱bun a̱zaghyi nggu. Mat nyi yei a̱lyoot A̱tyoli Yesu Kristi, ma̱ng chet A̱za̱za̱rak Ntswa hu.

Yok Á̱niet Khwi ba̱ Tyei Nvam mba na na̱ Nwuak A̱gwaza Shi

¹² Á̱ ni̱ nyia̱, “Á̱ shim zi̱t ndyo, zi̱ nyia̱ kuzang kyang.” A̱wot nung n nyia̱ kuzang kyang hwa na yet nyin a̱tan bah. Ku nang á̱ ni̱ nnyia̱, “Á̱ shim zi̱t ndyo, zi̱ nyia̱ kuzang kyang a̱ni.” Nung, n nyia̱ n si̱ mi̱n mak yet a̱khwo kuzang kyang bah.

¹³ Á̱ ni̱ nyia̱, “Á̱ nyia̱ kyayak da̱nian a̱fa kya. A̱fa ka meang, á̱ nyia̱ nka da̱nian kyayak hwa.” (Si̱ huni yet a̱tsak a̱lyiat wa. A̱mgba̱m ma̱ng a̱nia, A̱gwaza na bwuk ma̱ng kyayak hu ma̱ng a̱fa ka). A̱wot nyi si̱ mi̱n fa nyia̱, A̱gwaza nyia̱ nvam nzi̱t na da̱nian a̱shi̱shi̱k nyia̱ bah. Nvam nzi̱t na á̱ nyia̱ naa da̱nian zi̱ ka nwuak A̱gwaza shi hwa. A̱wot A̱gwaza wa chok nvam nzi̱t na.

¹⁴ A̱wot A̱gwaza na ta̱ngam nvam nzi̱t na ma̱ng swuan ma̱ á̱niet ba̱ ka̱n kwi a̱ni, ma̱nang gu ku nta̱ngam A̱tyoli nzi̱t wu Yesu ma̱ng swuan ma̱ á̱niet ba̱ ka̱n kwi a̱ni.

¹⁵ Nyi lyen nang nvam nyin na ngyet nkap nvam Kristi niaa? Ku myim a̱yin a̱ kyiak vam nggu hu ku yet nkap Kristi a̱ni, a̱wot a̱ si̱ ta̱mak hu ma̱ng vam kham a? Kaai, ku ma̱ chunchwiit, ku myim bah!

¹⁶ A̱wot nyi lyen ka̱ a̱tyok ta̱mak vam nggu hu ma̱ng kham, a̱ na yet vam nyiung hwa ma̱ng kham ji baa? Mat A̱lyiat A̱gwaza na nyia̱, “Á̱niet a̱feang a̱bya na mun, ba̱ yet vam nyiung.”

¹⁷ A̱wot a̱tyu a̱ mun a̱pyia̱ nggu ma̱ng A̱gwaza a̱ni, a̱ yet tswa jhyung ja ma̱ng a̱nggu.

¹⁸ Nyi tyong nyi ghwon a̱shi̱shi̱k nyia̱! Á̱ mbyia̱ a̱ka̱tuk nyia̱ a̱ghyang a̱ byian vam a̱tyubishyi nang a̱shi̱shi̱k nyia̱ a̱ni bah. Mat a̱shi̱shi̱k nyia̱ yet a̱ka̱tuk nyia̱ wa tazwa vam a̱tyubishyi.

¹⁹ Nyi ka̱n fi̱k nang nvam nyin na ngyet a̱li A̱za̱za̱rak Ntswa kya baa? A̱za̱za̱rak Ntswa wu swan mami nyin, a̱wot A̱gwaza wa nang nyin nggu baa? A̱wot nyin bya, byia̱ á̱pyia̱ nyin bah,

²⁰ mat A̱gwaza wa san nyin, a̱ si̱ tan ma̱ng a̱tsatsak nzang. Mat a̱nia, ku yet ta hwa nyi tyei nvam nyin na na̱ nwuak A̱gwaza shi.