1 A̱korontiyawa 4 - A̠lyiat A̠gwaza na di̠n Tyap: A̠li̠ka̠uli A̠fai

Nta̱m A̱yaata̱m Yesu Kristi

¹ Mat a̱nia, nyi kyiak á̱niet kwak a̱son nang A̱folot ma̱ng a̱nung nang a̱khwo Kristi bya a̱ni. Nzi̱t bya, nang A̱gwaza wu tyia̱ nzi̱t ta̱m huni mbwak. Zi̱ wa̱i á̱niet ba á̱lyiat da̱ a̱chuchuk wu nang A̱gwaza niat a̱ni.

² A̱tyu nang á̱ kyiak, á̱ si̱ tyia̱ nggu ta̱m mbwak a̱ni, ku yet ta hwa, gu nyia̱ ta̱m hu tsotswat.

³ Da̱ a̱vwuo nung, ku yet a̱bada̱dei kyang kya ba̱t, ki̱ nyin ku tyok a̱tyubishyi, ku mak a̱wot ku fi̱k ta̱m nung hu. Ku nung, n nwuak a̱chuchuk di̱ mak ta̱m a̱pyia̱ nung hu bah.

⁴ A̱di̱dam nung wu kpaat nung mi̱ fwuo bah. A̱wot si̱ a̱hwa tak nang n sang a̱bun di̱ ta̱m nung hu bah. A̱gwaza wa ma̱ a̱pyia̱ nggu na mak nung, a̱ bu fi̱k ta̱m hu nang n nyia̱ a̱ni.

⁵ Mat a̱nia, nyi yok mak nyi nyia̱ shi̱ri̱ya di̱ nta̱m a̱yin a̱nggang neet nang Kristi A̱tyoli nzi̱t wu ka̱n bwuok bah. Mat nggu wa na tyai kpa̱sai nkyang nang zi̱ nyia̱ na̱ shya̱ mi̱ dyin a̱ni, a̱wot gu bu tyai a̱di̱dam mi̱ nfwuo nzi̱t wu kpa̱sai. A̱wot A̱gwaza na dyep konyan ma̱ cha̱chaat ma̱ng ta̱m hu nang gu nyia̱ a̱ni.

⁶ Ma̱ninika nyin á̱niet khwi Yesu ba nang n chat a̱ni, n nwuak kidee jini tazwa a̱pyia̱ nung ma̱ng A̱folot, mat nyi ka fi̱k kyang nang n dyiat tazwa nzi̱t a̱ni. Ki̱ nyi fi̱k a̱ma ntyap nang á̱ ni̱ hyia̱ a̱ni, nyia̱, “A̱yin gu yok swak gak kyang nang á̱ lyuut a̱ni bah.” Nyi na tam di̱ khwi sot a̱tyu tyiet, ku nyi lak khwi á̱ghyang á̱niet bah.

⁷ Yihwa nwuak nyin a̱wat ka nyi khai nyi ntam da̱ a̱yaakwak a̱son nyin ba? Yihwa nang nyi byia̱ da̱nang A̱gwaza wa nang nyin bah? A̱wot ka̱ A̱gwaza wa nang nyin kuzang kyang nang nyi byia̱ a̱ni, yihwa mbyia̱ nyi ntam á ngyei di̱ za̱nang ja bah.

⁸ Nyi fa nyi wa ka̱n shya̱ kuzang kyang nang nyi chat a̱ni. Nyi fa nyi yet á̱niet nzwá bya! Nyi fa nyi wa ka̱n shya̱ Tyok A̱gwaza hu da̱ mi̱n zi̱t! N chat si̱ nyi ka̱n nwuo nyia̱ tyok hu, mat a̱jawa zi̱ na nnyia̱ tyok hu ndung ma̱ng a̱nyin.

⁹ Da̱ a̱kwonu a̱kya, di̱n jen jhyang, n ni̱ ndam A̱gwaza wa ka̱n tyai nzi̱t kpa̱sai, nzi̱t zi̱ yet a̱yaata̱m Yesu Kristi bya, nang á̱khwo nang á̱ ya̱baat mi̱ nzwang a̱ni. A̱wot á̱ si̱ tyia̱ zi̱ si̱ ta lang khwi a̱kwak a̱son á̱niet nzwang wu lilyim, di̱ tak a̱gwai tyak zwang a̱ni; nang zi̱ nfwuong á̱ faat zi̱t shi̱ri̱ya a̱khwu a̱ni. Zi̱ bu yet kyang nang a̱mgba̱m á̱niet swanta ba mai di̱ lihyat a̱ni.

¹⁰ Nwuak fwuo nzi̱t hu di̱ Kristi, ku tyia̱ zi̱ li nang á̱bwuon bya a̱ni. A̱wot nyi kyiak pyipyia̱ nyin nyi yet á̱niet mumwang di̱ khwi Kristi! Nzi̱t, zi̱ byia̱ chet bah. A̱wot nyin, nyi byia̱ chet ba̱t! Á̱ nwuat nyin shi! A̱wot nzi̱t, á̱ si̱ jhyuai nzi̱t.

¹¹ Ku ma̱ninika, zi̱ fwuong zong ma̱ng mashyi a̱sa̱khwot. A̱wot zi̱ byia̱ a̱yaatoot khwi shansham ba̱ na kup zi̱t shyishyim a̱ni bah. Á̱ ni̱ tsot zi̱t kuzang jen. A̱wot da̱ nzi̱t, zi̱ byia̱ a̱li bah.

¹² Zi̱ ni̱ van ma̱ng nyia̱ ta̱m ma̱ng mbwak nzi̱t na, zi̱ ka shya̱ kyayak zi̱ ya. Á̱niet ba ba̱ ni̱ fwoi nzi̱t a̱ni, zi̱ ni̱ nang mba a̱nu. Ka̱ á̱ ya̱shuk zi̱t, zi̱ ni̱ gbang a̱lyia̱.

¹³ Ka̱nang á̱nietbishyi tyam nzi̱t, zi̱ ni̱ nyap fwuo, zi̱ lyiat ma̱ng a̱mba di̱n shok. A̱mgba̱m ma̱ng a̱nia, á̱ ni̱ nyia̱ ma̱ng a̱nzi̱t nang zi̱ bya yet a̱tong swanta ka a̱ni. Zi̱ yet kyang hu nang konyan fwuong shushyuk a̱ni, ba̱ng ba̱ tat a̱fwun kani, a̱nia wa ku ndi.

¹⁴ N dyuut nyin dyo, da̱nian n ka tyia̱ nyin nsum nia bah. A̱wot n gba nyin wa nang mman nung nang n chat a̱ni.

¹⁵ Ku nyi byia̱ á̱niet tyiet chyikwop swak bya ba̱ tyiet nyin tazwa Kristi a̱ni, nyi byia̱ a̱tyia̱ a̱nyiung wa mami A̱za̱za̱rak Ntswa. Mat, n ku ngyet a̱tyia̱ nyin mami Kristi Yesu, jen nang n ku nshei nyin A̱sham Nkhang ka a̱ni.

¹⁶ Mat a̱nia, n naai nyin nyi maat nung.

¹⁷ Huhwa mbyia̱, n ku nta̱m ma̱ng a̱nyin Timoti, a̱tyu a̱ yet nggwon nung nang n chat mami A̱tyoli Yesu a̱ni, a̱ bu yet a̱tsotswat a̱yin wa di̱ khwi A̱gwaza. Nggu wa na jhyung nyin si̱sak ji nang n nkhwi Kristi Yesu a̱ni; ma̱nang n tyiet a̱mgba̱m susot á̱niet khwi ji mi̱ kuzang a̱keang nang n nat a̱ni.

¹⁸ A̱wot á̱ghyang á̱niet ma̱ nyin wa ka̱n nwuo gba̱p a̱pyia̱. Ba̱ fa nyia̱ da̱ n bu na mbwuok mbai da̱ a̱vwuo nyin bah.

¹⁹ A̱wot ka̱ A̱gwaza shim, n na mbai da̱ a̱vwuo nyin di̱ mi̱n byian jen. A̱jawa n na nzop si̱sak nang á̱niet gba̱p a̱pyia̱ bani ndyiat di̱ lyen a̱nu hwa ma̱nyin hu, ku ba̱ ma ndyiat ma̱ng chet A̱gwaza hwa.

²⁰ Mat Tyok A̱gwaza hu yet tsot a̱nu hwa bah. Ku yet swat mami chet A̱gwaza hwa.

²¹ Yihwa nang nyi khai? N bai da̱ a̱vwuo nyin ma̱ng chyong ja, n ntsot nyin a? Kee n mbai n tak ma̱ng a̱nyin chat mami shyim fwuo?