1 A̱korontiyawa 3 - A̠lyiat A̠gwaza na di̠n Tyap: A̠li̠ka̠uli A̠fai

Yok Á̱niet Khwi ba̱ ya ntsa Khwi A̱gwaza kang ma̱ng A̱yaakwak A̱son mba ba

¹ Nyin á̱niet khwi Yesu ba nang n chat a̱ni, jen ji nang n ku nshya̱ ndung ma̱ng a̱nyin a̱ni, n ku ndyiat ma̱ng a̱nyin nang á̱niet nang A̱za̱za̱rak Ntswa nyia̱ nta̱m da̱ mba a̱ni bah. N si̱ ndi ku myim n dyiat ma̱ng a̱nyin nang nyi wa ni̱ yet á̱niet swanta bani bya a̱ni, ku a̱chyuang mman mi̱ khwi Kristi hu.

² N ku nang nyin a̱baan nia nyi si̱ swuo, kang ma̱ng a̱kpa̱u kyayak, mat nang nyi ka̱n maai ya a̱kpa̱u kyayak wu bah. A̱wot ku ma̱nini, nyi ka̱n maai bah.

³ Mat ba̱ng ba̱ tat a̱fwun, za̱kwa a̱ka̱tuk nyia̱ nyin ji ni̱ nyia̱ tyok da̱ nyin. Ka̱ nyi kwi swam á̱ghyang, nyi si̱ bu ya fwuang ma̱ng á̱ghyang nyin; si̱ huni tak nang za̱kwa a̱ka̱tuk nyia̱ nyin ji nnyia̱ tyok da̱ nyin baa? Nyi si̱ bu swan nang á̱niet swanta bya a̱ni baa?

⁴ Mat ka̱ a̱yin ma̱ nyin nyia̱, “Nung n khwi sot Bulut ja!” A̱wot a̱ghyang a̱niet si̱ nyia̱, “Nung n khwi sot A̱folot ja!” Mee nyi ghai pyipyia̱ nyin di̱ susot nang á̱niet swanta bya a̱ni aa?

⁵ Zang tangka̱i a̱yin hwa nang A̱folot wu yet? Zang tangka̱i a̱yin hwa nang nung Bulut wu yet? Zi̱ yet ma̱ á̱khwo A̱gwaza bya, ba̱ beang nyin nyi si̱ nwuak a̱chuchuk da̱ A̱sham Nkhang ka a̱ni. Konyan ma̱ a̱nzi̱t si̱ nyia̱ ta̱m hu nang A̱gwaza nwuak guu a̱ nyia̱ a̱ni.

⁶ Nung gwa ku nchyui zwá yak ji mi̱ fwuo nyin na. A̱folot wa si̱ ntyei a̱sa̱khwot na. A̱wot A̱gwaza wa si̱ tyia̱ yak hu si̱ laai.

⁷ Mat a̱nia, a̱tyu a̱ chyui zwá yak ji a̱ni, ma̱ng a̱tyu a̱ ntyei a̱sa̱khwot na a̱ni, ta̱m mba hu tyak kyang bah. A̱tyu a̱ nyia̱ ta̱m hu a̱ swak a̱ni, nggu wa yet, A̱gwaza a̱ tyia̱ zwá yak ji si̱ laai a̱ni.

⁸ A̱tyu chyui zwá yak wu ma̱ng a̱tyu tyei a̱sa̱khwot wu, ba̱ nyia̱ ta̱m hu ndung ma̱ng a̱di̱dam a̱nyiung. A̱wot konyan ma̱ a̱mba na san zang ma̱ cha̱chaat ma̱ng ta̱m hu nang gu nyia̱ a̱ni.

⁹ Mat a̱mgba̱m nzi̱t a̱feang zi̱ yet á̱kpa̱ndang ta̱m A̱gwaza bya. A̱wot nyin bya li nang a̱byin khap A̱gwaza ka a̱ni. Nyi si̱ bu li nang nok A̱gwaza a̱ni.

¹⁰ Mat shok nang A̱gwaza nyia̱ nung ndyo a̱ni, n tsa kuntyin nok hu nang a̱gwak a̱tyu lyen nok a̱ni. Ma̱ninika, á̱ghyang á̱niet ya a̱son di̱ nok tazwa kuntyin hu. A̱wot konyan wa na nok tazwa kuntyin huni, ku yet ta hwa gu ta̱bam ma̱ng si̱sak gu nnok a̱ni.

¹¹ Mat á̱ mbyia̱ a̱tyu a̱ maai a̱ kpaat kuntyin ghyang ku vwuon ma̱ng si̱ nang zi̱ ka̱n kpaat a̱ni bah. Kuntyin huhwa yet, Yesu Kristi.

¹² A̱tyu a̱ nyia̱ nok di̱ kuntyin a̱hwa, a̱ si̱ nyia̱ nta̱m ma̱ng kuzang tangka̱i nkyang nok, na̱ yet zi̱nariya, a̱zurfa, a̱tsatsak nfang, nkwon, a̱ga̱faat, ma̱ng chyat a̱ni.

¹³ A̱wot a̱tuk fak shi̱ri̱ya A̱gwaza ka, a̱nga̱ngak ndong a̱wa na tyai kpa̱sai kuzang tangka̱i nta̱m nang kuzang a̱tyu nok nok di̱ kuntyin hu a̱ni. Long huhwa na mak ku tak tangka̱i ta̱m nok nang konyan nyia̱ a̱ni.

¹⁴ Ki̱ ta̱m nok hu nang gu nyia̱ a̱ni yong mi̱ chet di̱ kuntyin hu, a̱tyu nok a̱wa na shya̱ zang.

¹⁵ A̱wot ki̱ ta̱m nok hu fwui, a̱tyu nok wu na swuo a̱bung, gu nwai a̱gba̱ndang zang. A̱wot nggu a̱tyu nok wu ma̱ a̱pyia̱ nggu a̱ na shot. A̱wot ku na li nang a̱tyu a̱ shot a̱ ghwut ma̱ a̱lya̱ra̱p ndong a̱ni.

¹⁶ Nyi lyen nang nyi ngyet A̱li Nwuat Za̱nang A̱gwaza kyaa? A̱wot A̱za̱za̱rak Ntswa A̱gwaza wu si̱ shya̱ ma̱ nyin a?

¹⁷ Mat a̱nia, ka̱ a̱yin bi̱ri̱m A̱li Nwuat Za̱nang A̱gwaza ka, A̱gwaza meang na bi̱ri̱m ngguu. Mat A̱li Nwuat Za̱nang A̱gwaza ka yet a̱za̱za̱rak wa. A̱wot nyin bya yet A̱li Nwuat Za̱nang A̱gwaza ka.

¹⁸ Nyi yok laai pyipyia̱ nyin bah. Ki̱ nyi fa nyi byia̱ mumwang swanta huni, ku myim nyi bwuak pyipyia̱ nyin ntyia̱ á̱bwuon, da̱nian nyi ka byia̱ mumwang ba̱t.

¹⁹ Mat mumwang swanta huni, ku yet bwuon hwa da̱ a̱vwuo A̱gwaza. Ma̱nang á̱ ndyuut ma̱ A̱lyiat A̱gwaza na a̱ni, nyia̱, “A̱gwaza na tya̱ra̱m á̱niet mumwang, ma̱ng a̱kwi ntswam mumwang lyen swanta mba hu.”

²⁰ A̱wot á̱ bu lyuut ma̱ A̱lyiat A̱gwaza na nyia̱, “A̱gwaza lyen a̱di̱dam á̱niet mumwang wu; a̱ lyen nang mumwang mba hu ngyet a̱buk kyang wa.”

²¹ Mat a̱nia, nyi yok tam di̱ khwi a̱tyu a̱ yet a̱kwak a̱son á̱nietbishyi a̱ni bah. Mat kuzang kyang A̱gwaza wa nang nyin huu:

²² ku nung Bulut, ku A̱folot, ku Bitut, ku swanta, ku swuan ma̱ng a̱khwu, ku swat ma̱nini ma̱ng á̱zanson. Kuzang kyang yet si̱ nyin hwa.

²³ A̱wot nyin, nyi yet á̱si̱ Kristi bya. A̱wot Kristi si̱ yet a̱si̱ A̱gwaza.