1 A̱korontiyawa 2 - A̠lyiat A̠gwaza na di̠n Tyap: A̠li̠ka̠uli A̠fai

Bulut Shei A̱lyiat tazwa Yesu Kristi mi̱ Fwuo Nyiung

¹ Nyin á̱niet khwi Yesu ba nang n chat a̱ni, nang n ku ntsa bai hu da̱ a̱vwuo nyin, n tyai ma̱ng a̱nyin kyang nang A̱gwaza jhyi a̱ sak di̱ niat a̱ni. N ku bai ma̱ng a̱nyin n si̱ ntak a̱lyiat A̱gwaza na tí̱tak ma̱ng mumwang a̱tyubishyi hwa bah.

² Mat jen nang n ku nshya̱ ma̱ng a̱nyin a̱ni, n ku kyiak mi̱ fwuo nung hu n bwung kuzang kyang, da̱nian n shei á̱lyiat tazwa Yesu Kristi ma̱nyin gu; nggu wa nang á̱ ku kpang da̱ a̱team a̱khwu wu.

³ Nang n ku mbai da̱ a̱vwuo nyin a̱ni, vam hu si̱ khwu nung. N si̱ nfa̱k a̱wun ma̱ng tyi̱ri̱m vam.

⁴ A̱wot a̱lyiat nung na ma̱ng shei A̱lyiat A̱gwaza nung hu ku shya̱ kpa̱sai ba̱t. Da̱ nung, n tak nyin lyen a̱nu ma̱ng mumwang hwa bah. A̱wot n si̱ nta̱yuk di̱ chet A̱za̱za̱rak Ntswa A̱gwaza hwa ma̱nyin hu.

⁵ N ku nyia̱ a̱nia, da̱nian nyi nwuak a̱chuchuk di̱ mumwang a̱tyubishyi hwa bah. Da̱ a̱kwonu a̱kya, nyi ka nwuak a̱chuchuk wu di̱ chet A̱gwaza hwa.

Mumwang ku Neet da̱ a̱vwuo A̱za̱za̱rak Ntswa a̱ni

⁶ A̱mgba̱m ma̱ng a̱nia, jen nang n shya̱ ma̱ á̱niet ba̱ ka̱n tyia̱ chet mi̱ khwi hu a̱ni, n ni̱ ndyiat swáng a̱lyiat mumwang; a̱wot tangka̱i mumwang ku yet si̱ swanta huni hwa, ku mumwang á̱niet ba̱ nyia̱ tyok swanta huni hwa a̱ni bah, mat ba̱ na kwi á̱ bwung ba di̱ a̱bada̱dei njen.

⁷ Kaai, mumwang hu zi̱ lyiat a̱ni, si̱ A̱gwaza hwa ku shya̱ di̱ niat a̱ni; mumwang hu A̱gwaza jhyi a̱ sak neet gbangbang a̱ si̱ niat a̱ni, neet nang gu ka̱n mat swanta hu bah. A̱ si̱ nyia̱ nhu da̱nian zi̱ ka shya̱ a̱mgba̱m shi.

⁸ A̱wot á̱niet nyia̱ tyok swanta bani ka̱n fi̱k mumwang a̱hwa bah. Ka̱ ba̱ wa ku fi̱k hu, si̱ ba̱ ku hyat A̱tyoli nzi̱t wu a̱ byia̱ shi a̱ni, di̱ kpang gu da̱ a̱team a̱khwu wu bah.

⁹ Ma a̱nia wa A̱lyiat A̱gwaza nang á̱ lyuut a̱ni nhyia̱, nyia̱, “Á̱ ka̱n di ma̱ng á̱ghyi bah, da̱ mba, á̱ ka̱n fa̱k ma̱ng a̱fufwuo bah; a̱wot a̱yin ka̱n dam mi̱ fwuo nggu hu kyang nang A̱gwaza jhyi a̱ sak da̱nian á̱niet ba̱ chat gu a̱ni bah.”

¹⁰ A̱wot nzi̱t bya nang A̱gwaza tak nzi̱t nkyang nani kpa̱sai mat A̱za̱za̱rak Ntswa nggu wu. Da̱nian Tswa nggu ji zop nzi̱t a̱mgba̱m kuzang nkyang. A̱wot ji̱ si̱ tyai nzi̱t a̱tsatsak a̱chuchuk nang A̱gwaza niat a̱ni.

¹¹ Á̱ mbyia̱ a̱tyu a̱ maai a̱ lyen a̱di̱dam a̱ghyang a̱niet a̱ni bah, si̱ mi̱ tswa a̱tyu a̱ja. A̱wot á̱ mbyia̱ a̱tyu a̱ maai a̱ lyen a̱di̱dam A̱gwaza a̱ni bah, si̱ mi̱ Tswa A̱gwaza ji ma̱nyin ji.

¹² A̱wot zi̱ ka̱n san a̱di̱dam á̱niet swanta wuni bah. Da̱ a̱kwonu a̱kya, zi̱ ka̱n san A̱za̱za̱rak Ntswa A̱gwaza wa. Ku tak zi̱t a̱sham nkyang nang A̱gwaza ka̱n nang zi̱t ma̱ sa̱t mat shok nggu ji a̱ni.

¹³ Nang zi̱ nshei ma̱ng a̱nyin a̱lyiat nani a̱ni, zi̱ shei nyin swáng á̱lyiat ji̱ neet di̱ mumwang nang a̱tyubishyi tyiet wa a̱ni bah. Da̱ a̱kwonu a̱kya, zi̱ shei nyin swáng á̱lyiat nang A̱za̱za̱rak Ntswa wa tyai nzi̱t ndyo a̱ni. Zi̱ lyiat ma̱ng swáng á̱lyiat A̱za̱za̱rak Ntswa, zi̱ ka tyia̱ nyi fi̱k a̱chuchuk a̱ yet a̱si̱ A̱za̱za̱rak Ntswa a̱ni.

¹⁴ A̱wot á̱niet ba̱ sang A̱za̱za̱rak Ntswa wu a̱ni, ba̱ si̱ mi̱n san a̱chuchuk wuni a̱ neet da̱ a̱vwuo A̱za̱za̱rak Ntswa A̱gwaza a̱ni bah. Mat da̱ a̱vwuo mba a̱chuchuk wu yet bwuon hwa. Da̱ mba, ba̱ si̱ mi̱n fi̱k gu bah. Mat ma̱ á̱niet ba̱ byia̱ A̱za̱za̱rak Ntswa wu a̱ni, bibya ni̱ fi̱k a̱chuchuk A̱gwaza wu nang A̱za̱za̱rak Ntswa wu ni̱ tyai a̱ni.

¹⁵ Á̱niet ba ba̱ byia̱ A̱za̱za̱rak Ntswa wu a̱ni, ba̱ ni̱ byia̱ mumwang nang ba̱ ni̱ nfi̱k ba̱ mak a̱mgba̱m nkyang nang A̱za̱za̱rak Ntswa wu fa a̱ni. A̱wot mba ma̱ á̱pyia̱ mba, á̱ mbyia̱ a̱yin ma̱ á̱niet swanta ba, a̱ si̱ mi̱n fi̱k ku a̱ mak á̱niet ba̱ byia̱ A̱za̱za̱rak Ntswa wu a̱ni bah.

¹⁶ Mat, á̱ nyia̱, “A̱nyan wa maai a̱ lyen a̱di̱dam A̱gwaza wu? A̱nyan wa lyen kyang shansham, a̱ maai a̱ tyiet A̱gwaza?” A̱wot nzi̱t, zi̱ fi̱k a̱mgba̱m nkyang nani, mat zi̱ nyia̱ a̱di̱dam ma̱nang Kristi ni̱ nnyia̱ a̱ni.