1 A̱korontiyawa 10 - A̠lyiat A̠gwaza na di̠n Tyap: A̠li̠ka̠uli A̠fai

Tyiet tazwa Khwi Nghwughwu A̱yaagwaza Sang Swuan Isi̱rela

¹ Nyin á̱niet khwi Yesu ba nang n chat a̱ni, nyi yok bwung bah. A̱yaatyia̱ a̱khwop nzi̱t ba ku chong mi̱ tswa a̱yit gbangbang. A̱mgba̱m ba, A̱gwaza ku tyia̱ ni̱nian hwa si̱ kwak ba a̱son ka. Ba̱ si̱ byia̱k kyai a̱sa̱khwot hu, ma̱ a̱khwot a̱byin.

² Ni̱nian hwa ma̱ng kyai a̱sa̱khwot, ku yet kidee nang á̱ ku nyia̱ mba ba̱ptisman nang á̱niet ba̱ mun á̱pyia̱ ma̱ng Musa ba̱ si̱ khwi nggu a̱ni.

³ A̱mgba̱m ba, ba̱ si̱ ya tangka̱i kyayak A̱za̱za̱rak Ntswa nyiung hwa.

⁴ A̱wot a̱mgba̱m ba si̱ swuo tangka̱i a̱sa̱khwot A̱za̱za̱rak Ntswa nyiung wa. A̱wot a̱mgba̱m ba si̱ swuo a̱sa̱khwot na̱ ku neet ma̱ a̱za̱za̱rak a̱fang a̱wa a̱ ku chong ndung ma̱ng a̱mba a̱ni. A̱fang a̱kya ku yet kidee Kristi ja ma̱ a̱pyia̱ nggu.

⁵ A̱mgba̱m ma̱ng a̱nia, A̱gwaza si̱ fa̱k nyinyang á̱ghyang á̱niet ma mba bah. A̱ si̱ hyaai mba, a̱ si̱ seang nvam mba na mi̱ tswa a̱yit.

⁶ Nkyang nani na̱ ku shya̱ mba a̱ni, na̱ yet nzi̱t kidee ja. Na̱ si̱ bu gba nzi̱t zi̱ yok shyuo a̱ka̱tuk nkyang, ma̱nang ba̱ ku nnyia̱ shyuo ji a̱ni.

⁷ Nyi yok kwok nghwughwu a̱yaagwaza sang swuan ntong ma̱nang á̱ghyang mba ku nnyia̱ a̱ni bah. Ma̱nang á̱ ndyuut ma̱ A̱lyiat A̱gwaza na a̱ni, nyia̱, “Á̱niet ba si̱ swan, ba̱ si̱ ya á̱ ntsa nswuo. A̱wot ba̱ si̱ doot ba̱ si̱ song song sang nsum di̱ dyep a̱yaagwaza sang swuan.”

⁸ A̱wot ku yet ta hwa, zi̱ yok tyia̱ á̱pyia̱ nzi̱t ma̱ a̱shi̱shi̱k nyia̱ bah, ma̱nang á̱ghyang á̱niet ma̱ mba ku nnyia̱ a̱ni. Mat a̱ka̱tuk nyia̱ mba wu, á̱niet chyikwop swak nfeang ma̱ a̱tat si̱ kwi a̱tuk a̱nyiung.

⁹ Ma a̱nia wa, zi̱ yok mak A̱gwaza bah, ma̱nang á̱ghyang á̱niet ma̱ a̱mba ku nyia̱ a̱ni. A̱ si̱ tyia̱ zwák si̱ tyam mba, ba̱ si̱ kwi.

¹⁰ A̱wot zi̱ yok kwop a̱dyii̱ng, ma̱nang á̱ghyang á̱niet ma̱ a̱mba ku nnyia̱ a̱ni bah. A̱wot a̱ta̱m tswa hyaai á̱niet, si̱ hyaai mbaa.

¹¹ Nkyang nani na̱ ku shya̱ mba a̱ni, yet nzi̱t kidee ja. Á̱ si̱ bu lyuut naa da̱nian á̱ ka gba nzi̱t, nzi̱t á̱niet zi̱ shya̱ ma̱ ngaan jen wuni a̱ni.

¹² Mat a̱nia, ka̱ a̱yin fa a̱ yong mi̱ chet, si̱ a̱ ta̱bam a̱ du ba̱ kwa.

¹³ Mai ku shyat nyin a̱ni, ku vwuon ma̱ng si̱ nang á̱ghyang á̱niet shyat a̱ni bah. A̱wot A̱gwaza yet a̱tsotswat wa. A̱ na ghwon á̱ mak nyin ma̱ng kyang ku swuo chet nyin nyi kwa a̱ni bah. A̱wot di̱ mak a̱hwa hwa, nang gu na nkhwuk nyin vak nang nyi na nghwut a̱ni, da̱nian nyi ka gbang a̱lyia̱ di̱n jen mak ji.

¹⁴ Mat a̱nia, nyin á̱niet khwi Yesu ba nang n chat a̱ni, nyi tyong, nyi yok kwok nghwughwu a̱yaagwaza sang swuan ntong bah.

¹⁵ N dyiat ma̱ng a̱nyin nang á̱niet ba̱ byia̱ a̱tsak a̱di̱dam a̱ni. Nyi zop a̱lyiat nung na ma̱ á̱pyia̱ nyin shansham nyi lii, ki̱ na̱ yet a̱tsatsak a̱lyiat wa.

¹⁶ Di̱n jen ya kyayak a̱di̱dam a̱khwu Yesu ji, nang zi̱ ni̱ ntyia̱ a̱li̱ba̱rka wu ma̱ a̱kashyi da̱ A̱tyii A̱tyoli Yesu wu a̱ni, mee ku yet kidee di̱ mun á̱pyia̱ hwa ma̱ a̱sok Yesu Kristi naa? Ma a̱nia wa, jen ji nang zi̱ ni̱ nkpa̱ra̱m burodi sang yit wu a̱ni, mee ku yet kidee mun á̱pyia̱ nzi̱t ja mi̱ vam Yesu Kristi hu a?

¹⁷ A̱wot ku nang zi̱ nshi á̱kpa a̱ni, a̱mgba̱m nzi̱t zi̱ ni̱ ya burodi a̱nyiung wa, si̱ a̱hwa tak nang zi̱ ngyet vam nyiung hwa.

¹⁸ Nyi nwuan á̱niet Isi̱rela ba, nyi lii. N wa ngyei ba̱ ku mun á̱pyia̱ kya ma̱ng A̱gwaza di̱ ya za̱náng ji nang á̱ ku neap A̱gwaza wu da̱ a̱tyii za̱nang wu a̱ni a?

¹⁹ Yihwa nang n fa a̱ji? Kyayak nang á̱ neap nghwughwu a̱yaagwaza sang swuan na a̱ni yet a̱tsatsak kyang wa a? Kee nghwughwu a̱yaagwaza ni̱nia yet a̱tsatsak kyang wu?

²⁰ Kaai, ku ma̱ chunchwiit! N fa kyayak nang á̱ neap a̱yaagwaza sang swuan a̱ni, ba̱ neap A̱gwaza wa bah. Ba̱ neap á̱ka̱tuk ntswá bya. A̱wot n chat nyi mun á̱pyia̱ ma̱ng á̱ka̱tuk ntswá bah.

²¹ Nyi si̱ mi̱n swuo ma̱ a̱kashyi A̱tyoli Yesu, nyi bu swuo ma̱ á̱si̱ á̱ka̱tuk ntswá bah. Da̱ nyin, nyi si̱ mi̱n ngya kyayak ma̱ a̱tyii A̱tyoli Yesu, nyi bu ya ma̱ si̱ á̱ka̱tuk ntswá bah.

²² Zi̱ shwaat A̱gwaza wu gu nyia̱ na̱nvan hwa a? Nyi fa nyi byia̱ chet lan A̱gwaza wu a?

Yok Á̱niet Khwi ba̱ Nwuak A̱gwaza Shi di̱ Kuzang Kyang

²³ Á̱ nyia̱, “Á̱ shim nung ndyo, n nyia̱ kuzang kyang.” A̱wot nung, n nyia̱ kuzang kyang hwa yet a̱tan da̱ a̱vwuo ang bah. Á̱ nyia̱, “Á̱ shim nung ndyo, n nyia̱ kuzang kyang.” A̱wot n nyia̱ kuzang kyang hwa yet si̱ beang ang bah.

²⁴ A̱yin gu yok chat kyang ku na myim nggu wa a̱ni ma̱nyin nggu bah. Da̱ a̱kwonu a̱kya, gu chat kyang ku bu na myim á̱ghyang á̱niet a̱ni.

²⁵ Mat a̱nia, ka̱ nyi doot nyi ya kuzang tangka̱i nam nang á̱ lyiai mi̱ tungga a̱ni, nyi yok zop a̱vwuo ka nang nam hu nneet a̱ni bah, kalak a̱di̱dam nfwuo nyin wu na kpaat nyin.

²⁶ Mat A̱lyiat A̱gwaza na nyia̱, “Swanta hu ma̱ng a̱mgba̱m nkyang na̱ shya̱ ma nhu a̱ni, yet si̱ A̱gwaza nia.”

²⁷ Ka̱ a̱tyu nwai khwi Yesu yei nyin ya kyayak, nyi si̱ shim nyi si̱ nat. Nyi si̱ ya kuzang tangka̱i kyayak nang á̱ ka̱u nyin a̱ni. Nyi yok zop bah, kalak a̱di̱dam fwuo nyin wu na kpaat nyin.

²⁸ A̱wot ka̱ a̱yin nyia̱ ma̱ng a̱nyin, “Nam huni, za̱nang ja nang á̱ neap nghwughwu a̱yaagwaza a̱ni.” Nyi yok ya bah, mat nggu a̱tyu a̱ tak ma̱ng a̱nyin a̱ni, kalak a̱di̱dam fwuo nggu wu na kpaat guu.

²⁹ Shimba ya nam a̱hwa ku na tyia̱ a̱di̱dam fwuo ang a̱ kpaat ang bah. A̱wot ku na tyia̱ nggu a̱tyu a̱nia̱u a̱ tak ma̱ng a̱nwan a̱lyiat nam na a̱ni, a̱di̱dam fwuo nggu wu a̱ kpaat guu. Di̱ nvak ghyang, yihwa na mbyia̱ a̱fi̱fa fwuo a̱ghyang a̱niet na nvwuong nung shya̱ a̱wat nyia̱ kyang hu nang n dyen ku nwai yet a̱ka̱tuk a̱ni?

³⁰ Ki̱ n na gwai A̱gwaza da̱nian kyayak hu nang n gya fwuong nyinyang a̱ni, yihwa na mbyia̱ á̱ mbat nung a̱bun di̱ ya kyayak a̱hwa?

³¹ Mat a̱nia, ku nyi ya ku nyi swuo wa, kuzang kyang nang nyi nyia̱ a̱ni, nyi ni̱ nyia̱ nhu da̱nian nyi ka nwuak A̱gwaza shi.

³² Nyi yok yet jat a̱kwa A̱yahudawa ku Nnwap na̱ nwai yet A̱yahudawa a̱ni, ku susot á̱niet khwi A̱gwaza ji bah.

³³ Nung meang, n ni̱ nkwan n tyia̱ konyan gu fa̱k nyinyang mami kuzang kyang nang n nyia̱ a̱ni. Nung, n ni̱ nyia̱ kyang ku myim nung wa a̱ni ma̱nyin nung bah. N ni̱ nyia̱ á̱ghyang á̱niet nkyang na̱ swak mi̱ yet a̱ni, da̱nian á̱niet ma̱ a̱di̱di̱t ba̱ ka shya̱ san.