1 A̱korontiyawa 1 - A̠lyiat A̠gwaza na di̠n Tyap: A̠li̠ka̠uli A̠fai

Byat Hu

¹ Nung Bulut, nang á̱ khai mat shim A̱gwaza n gyet a̱ta̱m Kristi Yesu a̱ni, nung gwa ndyuut nyin wusika jini ndung ma̱ng a̱na̱nyiuk nzi̱t wu Sa̱stanit.

² N dyuut sot á̱niet khwi A̱gwaza ba̱ shya̱ Korinti a̱ni wusika jini; nyin bya yet á̱niet ba nang A̱gwaza yorong ba̱ yet á̱za̱za̱rak á̱niet nggu a̱ni. A̱gwaza tyia̱ nyin nyi si̱ yet á̱za̱za̱rak á̱niet di̱ mun á̱pyia̱ nyin ma̱ng Kristi Yesu; ma̱nang gu ku nnyia̱ ma̱ng a̱mgba̱m á̱niet ba̱ shya̱ koji á̱ dyep a̱lyoot Yesu Kristi, a̱ yet A̱tyoli nzi̱t wu, ma̱ng á̱si̱ mba wu a̱ni.

³ Yok A̱gwaza a̱ yet A̱tyia̱ nzi̱t wu a̱ni, ma̱ng A̱tyoli Yesu Kristi gu fa̱k shok nyin, gu tyia̱ nyi swan swat nyinyang ma̱ng á̱ghyang nyin.

Bulut Tak A̱gwaza A̱gwai nggu na

⁴ Kuzang jen n ni̱ gwai A̱gwaza nung wu da̱nian nyin, ma̱ng a̱di̱di̱t za̱náng chet A̱za̱za̱rak Ntswa A̱gwaza nang gu ka̱u nyin, mat shok nggu ji, nang nyi ngyet á̱si̱ Kristi Yesu ma̱nini a̱ni.

⁵ Di̱ mun á̱pyia̱ nyin ma̱ng Yesu Kristi hwa nang A̱gwaza ntyia̱ nyi si̱ yet á̱niet nzwá di̱ kuzang vak, ma̱ng lyen tak a̱lyiat nggu na tí̱tak ma̱ng a̱mgba̱m mumwang nang nyi byia̱ a̱ni.

⁶ Si̱ huni tak za̱m nang a̱lyiat n ku ntak nyin tazwa Yesu Kristi a̱ni, yet a̱chuchuk wa.

⁷ Ma̱ninika, nyi byia̱ a̱mgba̱m kuzang tangka̱i za̱nang chet a̱za̱za̱rak Ntswa nang nyi chat a̱ni, nang nyi nswan ma̱ng di̱dang fwuong bwuok bai Yesu Kristi A̱tyoli nzi̱t wu a̱ni.

⁸ A̱ na tyia̱ nyin nyi yong mi̱ chet nang á̱niet khwi a̱ni si̱ nat sangba̱p. Da̱nian nyi ka yet á̱niet sang a̱bun a̱tuk nang Yesu Kristi A̱tyoli nzi̱t wu na mbwuok a̱ bai a̱ni.

⁹ A̱gwaza na nyia̱ si̱ huni, mat a̱ yet a̱tsotswat wa. A̱ na nyia̱ kyang nang gu hyia̱ a̱ni. A̱wot a̱ ka̱n gyorong nyin nyi mun á̱pyia̱ ma̱ng Nggwon nggu ka, Yesu Kristi A̱tyoli nzi̱t wu.

Á̱niet Khwi Ghai di̱ Susot

¹⁰ N naai nyin á̱niet khwi Yesu ba nang n chat a̱ni, mami tyok a̱lyoot A̱tyoli nzi̱t Yesu Kristi, nyi swan swat nyinyang ma̱ng á̱ghyang nyin. Nyi yok ghai di̱ susot bah. Da̱ a̱kwonu a̱kya, nyi swan ma̱ng mun á̱pyia̱, nyi yok a̱di̱dam nyin wu ma̱ng kyang nang nyi chat a̱ni, ku yet nyiung.

¹¹ Nyin á̱niet khwi Yesu ba nang n chat a̱ni, mat á̱niet mali Kuluwi hyia̱ ma̱ng a̱nung nyia̱ nyi ya fwuang ma̱ng á̱ghyang nyin.

¹² Á̱ghyang á̱niet ma̱ nyin ghai á̱pyia̱ mba di̱ susot nyia̱, “N khwi Bulut wa.” Á̱ghyang á̱niet si̱ nyia̱, “N khwi A̱folot wa,” ku “N khwi Bitut wa,” ku “N khwi Kristi wa ma̱nyin gu.”

¹³ Kristi wu ghai a̱pyia̱ nggu di̱ susot a? Nung Bulut wa á̱ ku kpang da̱ a̱team a̱khwu wu da̱nian nyin a? Ke á̱ ku nyia̱ a̱yin ma̱ nyin ba̱ptisman ji da̱ a̱lyoot Bulut kya? A̱tsak a̱lyiat, a̱nia wa bah!

¹⁴ N gwai A̱gwaza mat n nyia̱ a̱yin ba̱ptisman ma̱ nyin bah; mi̱ Ki̱ri̱but wa ma̱ng Gayut nang n ku nyia̱ mba ndyo.

¹⁵ Mat a̱nia, ma̱nini a̱yin si̱ mi̱n nyia̱ á̱ nyia̱ nggu ba̱ptisman da̱ a̱lyoot nung bah.

¹⁶ (Ma̱ng a̱nia, a̱tsak a̱lyiat, n ku nyia̱ kyang bwak Itifanat ba̱ptisman meang. A̱wot kang ma̱ng ba̱ptisman jini, n bu njhyung a̱ghyang a̱niet nang n nyia̱ gu ba̱ptisman a̱ni bah).

¹⁷ Mat Kristi ku ta̱m nung da̱nian n ka nyia̱ á̱niet ba̱ptisman ja bah. A̱ ku ta̱m nung mat n shei A̱sham Nkhang kya. A̱wot n shei ka ma̱ng lyen tak a̱lyiat tí̱tak hwa bah, kalak a̱team a̱khwu Kristi wu na yet a̱buk kyang wa.

Yesu Wa yet Chet ma̱ng Mumwang A̱gwaza hu

¹⁸ A̱lyiat a̱team a̱khwu Yesu na yet bwuon hwa da̱ a̱vwuo á̱niet ba̱ swan a̱khwu sang sangba̱p a̱ni! A̱wot da̱ a̱vwuo nzi̱t zi̱ shyat swuan sang sangba̱p ji a̱ni, a̱team a̱khwu Yesu wu yet a̱tsak nchet A̱gwaza wa.

¹⁹ Ma̱nang á̱ ndyuut ma̱ A̱lyiat A̱gwaza na a̱ni, nyia̱, “N na byian mumwang á̱niet ba̱ fa nyia̱ ba̱ byia̱ mumwang a̱ni. N bu tyia̱ tat á̱ghyi á̱niet ku tyia̱ tai.”

²⁰ A̱tyu mumwang wu shya̱ a̱ji wa? A̱yaagwak tyiet doka ba shya̱ a̱ji wa? Á̱niet ba̱ fa ba̱ lyen kuzang kyang mi̱ jen a̱fwun ji a̱ni, shya̱ a̱ji wa? A̱gwaza tyia̱ mumwang swanta huni li nang bwuon hwa a̱ni.

²¹ Nang A̱gwaza mami mumwang nggu hu ntyia̱ swanta hu ku lyen gu mat mumwang a̱tyubishyi hwa a̱ni bah; huhwa mbyia̱ A̱gwaza khai gu san á̱niet ba̱ nwuak fwuo da̱ a̱nggu, mat shei a̱lyiat nang á̱ nwuan nang bwuon hwa a̱ni.

²² A̱lyiat a̱team a̱khwu Yesu na yet bwuon hwa da̱ a̱vwuo A̱yahudawa ba̱ chat li nkyang a̱ga̱de na̱ neet Ma A̱gwaza tswazwa a̱ni. A̱wot na̱ si̱ yet bwuon hwa da̱ a̱vwuo A̱helenawa, ba̱ chat mumwang a̱tyubishyi a̱ni.

²³ A̱wot ka̱ zi̱ shei a̱lyiat Yesu Kristi nang á̱ ku kpang da̱ a̱team a̱khwu wu a̱ni, na̱ ni̱ yet A̱yahudawa ba a̱lyiat nang ba̱ lak fa̱k a̱ni. A̱wot A̱helenawa ni̱ nyia̱, na̱ yet a̱buk a̱lyiat wa.

²⁴ A̱wot da̱ a̱vwuo á̱niet nang A̱gwaza yorong ba̱ shya̱ swuan sang sangba̱p a̱ni, a̱mgba̱m A̱yahudawa ba ma̱ng Nnwap na̱ nwai yet A̱yahudawa a̱ni; A̱sham Nkhang kani yet Yesu Kristi wa, a̱ yet chet ma̱ng mumwang A̱gwaza hu a̱ni.

²⁵ Mat kyang nang a̱tyubishyi nwuan nang bwuon hwa A̱gwaza nyia̱ a̱ni, ku swak mumwang nang a̱tyubishyi byia̱ a̱ni. A̱wot kyang nang a̱tyubishyi nwuan nang sang chet A̱gwaza hwa a̱ni, ku swak a̱mgba̱m chet a̱tyubishyi.

²⁶ Nyin á̱niet khwi Yesu ba nang n chat a̱ni, nyi jhyung si̱sak ji nang A̱gwaza ku ngyorong nyin a̱ni. Á̱ghyang á̱niet ma̱ nyin ku byia̱ mumwang, ku nyi yet a̱cha̱chet á̱niet, ku á̱niet nzwá, nang á̱niet mi̱ swanta ba a̱ni bah.

²⁷ Da̱ a̱kwonu a̱kya, A̱gwaza ku khai á̱niet nang swanta hu fa nyia̱ ba̱ yet á̱bwuon bya a̱ni, da̱nian gu ka tyia̱ á̱niet swanta ba, ba̱ fa nyia̱ ba̱ byia̱ mumwang a̱ni, ba̱ swuo nsum. A̱wot A̱gwaza si̱ khai á̱niet ba̱ sang chet a̱ni, da̱nian gu ka tyia̱ á̱niet ba̱ byia̱ chet a̱ni, ba̱ swuo nsum.

²⁸ A̱gwaza ku khai á̱niet nang á̱niet swanta ba kyiak ba̱ yet kyang a̱ni bah. A̱wot A̱gwaza si̱ nyia̱ ta̱m ma̱ng a̱mba ba̱ si̱ nyia̱ kyang tswá, nang á̱niet mi̱ swanta ba fa ku byia̱ tswá a̱ni bah.

²⁹ Nang ku ndi a̱nia a̱ni, a̱yin si̱ mi̱n mak tam a̱zaghyi A̱gwaza bah.

³⁰ A̱gwaza wa tyia̱ nyi si̱ mun á̱pyia̱ ndung ma̱ng Kristi Yesu. A̱gwaza si̱ bwuak Kristi a̱ ntyia̱ mumwang nggu nang a̱tyubishyi a̱ni, da̱nian zi̱ ka shya̱ kpangti̱n. Kristi si̱ tyia̱ zi̱ yet á̱tsotswat ma̱ng A̱gwaza. A̱ si̱ jaat zi̱t zi̱ yet a̱za̱za̱rak. A̱wot a̱ si̱ ti̱n zi̱t ma̱ a̱ka̱tuk nyia̱.

³¹ Mat a̱nia, ma̱nang á̱ ndyuut ma̱ A̱lyiat A̱gwaza na a̱ni, nyia̱, “Ka a chat tam, a tam da̱ A̱gwaza wa ma̱nyin gu.”