ZEFANYA 3 - Susula Malalaok Hehelu Palak Ma Hehelu Beuk

Yerusalem nanahukuk ma nanasoi-tefak

¹ Soo-supak neu Yerusalem, kota manggenggeok ma kota fo anan nau ka'da lena-la'ban Manetualain ma ana tuni-ndeni laun-nala!

² Soe ba'eneu kota, fo ana ta nau sipo Manetualain hala nasanene'dan-na fa, ma boeo ana ta taoafik neu Manetualain hala nabengan-na, ma ana ta nau fe so'dan-na neu Manetualain, ma ta noke tutulu-fafalik neu fan!

³ Kota ndia hataholi matua-mademan-nala, sama-na leo singa, fo ala nggasi beau. Manamaketu-mala'din-nala, sama-na leo busa fui kamala'ak-ka. Ala tenepeta lanseli, nalosa ta la'a ela paa dui esa boen, soaneu balahaa fa.

⁴ Nabin-nala, ta taoafik neu bela-ba'un-nala no malole, ma ta lamahele fas; basa imam-mala, tao langgenggeo hata fo nanafe hehelik neu Manetualain ma ala puputa-papaik Manetualain hoholo-lalanen-nala, fo ala hapu nanalak.

⁵ Tehu Manetualain bei nai kota ndia. Ana tao hata ndoos-sa tataas esa, ma Ana beita tao hata masalak fa. Tunga-tunga fafain-na, tao leo bee-o, Ana fe ndoos ma matetuk-ka neu anan-nala. Tehu hataholi fo ta nalelak eno ndoos ma matetuk manai kota ndia fa, ana tao nahele tatao-nono'i mangalauk-ka, no ta nalelak bibii-mamaek fa.

⁶ Manetualain nafa'da nae, “Au tao amopo leoina makadotok so. Au tao akalulutuk kotan-nala, ma papala nanadaman-nala, boema Au tao akalulutuk uma puni mademan-nala, de besenggela-besenggali. Kotan-nala da'di kota nees, de hataholi ta leo nai ndia so'on, boema nee-nee lino-lino.

⁷ Au dodoo ae, ‘Tao leo bee-o, besak ia, Au anang-ngala fe ha'da-holomata neu Au, ma ala taoafik neu Au hala nabengang lala'en-na. Tao leo bee-o, lafandele, Au fes nanolik-kala.’ Te se'kona ala boetai tao tatao-nono'i mangalauk seluk, lena heni makahulun-na.

⁸ Tehu manea besa-besa! Mahani ka'da fain-na losa, Au fo'a apadeik da'di leo manakalaak. Nana, Au aketu basa, soaneu aloo akabubua leoina-la, ma nusa-nusak-kala, fo Au po'a Au nasa melung neus. Neukose, Au ha'i nasa melung-nga, na'a heni basa daebafak-ka lala'en-na.

⁹ Tehu basa boema, Au tao asafali leoina sila-la dalen-nala, nalosa ala sene-do'ok ka'da neu Au mesang-nga, te ta neu lamatua daebafa fe'ek-kala fa. Neukose, basa leoina sila-la, ala tunga Au.

¹⁰ Nakalenak, Au anang fo manatapasasalak manai Sudan fo nai dook-ka ndia, neukose ala mai, fo ala tunu-hotu tutunu-hohotuk fe Au.

¹¹ Nai lelek ndia, hai anang-ngala lemin, emi ta paluu mame'da mamaek so'on, nanahu emi lena-la'ban basa Au so. Neukose, Au usi heni basa hataholi manakoao-ndaeaok-ka ma hataholi fo namatutua-nadedema aon-na, soona neukose, emi ta lena-la'ban seluk Au, nai Au pupuku malalao-malalafung lain so'on.

¹² Neukose Au po'ilotak leoina esa nai naa, dalen-na taidaek, boema namahena Au tutulu-fafaling, de ana bole leo nahele neme ndia.

¹³ Hataholi Israel fo bei elak-kala, neukose ala ta tao mangalauk seluk neu su'di see-a so'on; neukose ta lasapepeko-lasandandali so'on, ma ala ta tipu-dai boen. Neukose tetu-temak, ma so'da la'dak, boema ta lame'da bibii-namata'uk neu su'di see fa.”

Nakamee namahokok

¹⁴ Hai Israel, eeki-matadale, ma makamee leona! Hai Yerusalem, mamahoko no dalek-katematuak leona!

¹⁵ Nana, Manetualain Ana hahae huku emi. Ana usi heni basa emi musum-mala lala'en-na so, Mane Israel, fo emi Manetualaim-ma, nananasulu-nahapa emi. Besak ia, ta paluu emi mame'da bibii-namata'uk so'on.

¹⁶ Neukose fain-na losa, hataholi-la lafa'da lae, “Hai Yerusalem, boso bii, ma dalem-ma boso makasufu.

¹⁷ Emi Manetualaim-ma fo mabe'i-balakaik-ka, nananasulu-nahapak emi. Emi sengi nanahu koasan-na. Manetualain namahoko ma setelee, nanahu emi, Nai susue-lalain-na dalek, Ana fe emi so'da beuk. Hu ka nde emi, de nakamee no namahokok

¹⁸ sama leo hataholi manatao feta-dote.” Manetualain nafa'da nae, “Au usi heni susa-soe maneni mamates-sa so. Au lose heni emi matasi'da-matasaim-ma so.

¹⁹ Neukose fain-na losa, Au tao akalulutuk hataholi manatuni-ndeni emi-a, ma Au fe hataholi ei helak-kala maso'dak. Au hela-nole falik, basa hataholi nanatapa henik-kala. Au tao asafali matasi'da-matasain-nala, da'di maha'da-holomatak; su'di nai bee boe, nakalenak nai basa daebafak-ka lala'en-na, neukose sila nananamatutua-namadedemak ma nanakoa-nanakiok.

²⁰ Neukose fain-na losa, Au hela-nole falik, emi laum manatapasasalam-mala. Au tao-a emi da'di, nananita-nalelak nai basa daebafak-ka lala'en-na, ma neukose Au tao falik emi tetu-temam,” Manetualain nde manakokolak-ka.