ZAKHARIA 7 - Susula Malalaok Hehelu Palak Ma Hehelu Beuk

Manetualain nape'da dale nasak okaaok fo ta matetuk-ka fa

¹ Nai hataholi Yahudi-la bula Kislew, fo nde bula ka 9, fain 14, fo nai Mane Darius-sa paleta neu teu ka haan-na, Manetualain fe seluk au hehelu-balataak.

² Laun Betel-la, ladenu basa Sarezer ma Regem-Melekh, boema ana nadedenun-nala, fo leu leo Manetualain Fo Manakoasa Uman leu, fo ala dokodoe baba'e-papalan.

³ Boeo ladenus, fo latane imam-mala ma basa nabi-la, lae leo ia, “Bei paluu ami kii-makaleleu Manetualain, Uman-na nakalulutun-na nenik okaaok-ka nai tunga-tunga bula ka 5, sama leo ami taon dodoo basa ia do?”

⁴ Manetualain hala-hehelun neu au-a nde ia,

⁵ nae, “Mafa'da basa laun manai nusak ia lala'en-na, ma basa imam mala, mae okaok ma kii-makaleleuk fo sila taon nai hataholi Yahudi-la bula ka 5 ma bula ka hitun-na, nai teuk hituhulu dalen-na ia, ta neni ha'da-holomata ba'eneu Au fa.

⁶ Boeo lelek la'a ma linu ndia, ala sanga ka'da sila tei nakabeten-na mesak-kana.”

⁷ Dede'ak ndia nde Manetualain nafa'dan tunga nabi-la nai tepo-lelek maneuk-ka, fo nai lelek hataholi bei leo nai Yerusalem, de laun-na tetu-temak. Nai lelek ndia, hataholi ta ka'da leo nai nggolo-nggolok manai kota boboa-kaisun fa, tehu lena-lenak, ala leo nai boboan kona, ma nai pupukuk-kala huun-na, fo nai boboak muli.

Lena-la'bak-ka neninin-na ka'da da'di hataholi nanafook

⁸ Manetualain Fo Manakoasa, Ana fe au hala heheluk-ka nde ia nae,

⁹ “Teu-teu maneuk-ka, Au fe Au anang-ngala, paleta nde ia nae, ‘Emi muse maso'da tunga matetun-na, masue-malai ao, madale malole neu emi nonoo hataholim-ma.

¹⁰ Boso tuni-ndeni inafalu-la, anamaak-kala, hataholi nusa dea manaleo nai emi nusam dale, do su'di see fo nai susa dalek. Ma boso tutu'u eno mangalauk soaneu emi nonoo hataholim-ma.’

¹¹ Tehu, Au anang-ngala langa batu, de ta nau lamanene makandondook fa, ma ala suleketu di'idoon-nala, fo ela boso lamanene.

¹² Latea dalen-nala, nalosa natea sama leo batu-a. Au amanasa anseli, nanahu ala ta nau tunga nanolik fo Au fen tunga nabi makahuluk-kala fa.

¹³ Au ta ataa huhule-haladoin-nala fa, nanahu sila boeo ta lamanene Au, nai lelek Au kokolak fa.

¹⁴ Au sapu balisis, sama leo ani-sangu-a, nalosa no nakasetik, leu leo nai nusa dea-la. Dae maisi-mamina ia, ana da'di nee-nee lino-linok, hataholin ta, ma na'u-aianan ta.”