ZAKHARIA 4 - Susula Malalaok Hehelu Palak Ma Hehelu Beuk

Ninitak la'eneu banu eik

¹ Ata nusa so'dak fo manakokolak no au ndia, ana mai seluk, de nafofo'a au, sama leo nafofo'a hataholi manasunguk-ka,

² de natane nae, “O mita beek?” Boema, au ataa ae, “Banu eik esa, nanataok neme lilopilas-sa mai. Mamana minan-na, nai pe'dan-na lain, ma banuk 7, nai boboa-kaisun, fo esa soona, nanuu mamana tetelu 7.

³ Ai setun ndanak 2, nai banu eik ndia boboa kii-konan.”

⁴ Basa boema, au atane ata nusa so'dak ndia ae, Tuan, “Buas sila-la leni ta'du-tana beek?”

⁵ Boema natane au nae, “O ta bubuluk-kana fa?” Au ataa ae, “Ta Tuan.”

^10b Ata nusa so'dak ndia nafa'da au nae, “Banu ka hituk sila-la nde been-na, Manetualain mata ka hitun-nala, fo Ana mete leo basa daebafak-ka lala'en-na neu.”

¹¹ Basa boema, au atane seluk-kana ae, “Ai ndana setun ka duak manai banu eik ndia boboa kii-konan ndia, sosoa-ndandaan hata?

¹² Boeo, ade ai ndana setun ka duak manai pipa lilopilas ka duak-kala boboan manafaa mina setun-na, sosoa-ndandaan-na beek?”

¹³ Nataa au nae, “O ta bubuluk-kana fa?” Au ataa ae, “Ta Tuan.”

¹⁴ Boema nafa'da nae, “Ndia nde bee soona, hataholi 2, fo Manetualain fo mana makadada'dik lalai maloa, Ana hele basa duas so, de natu'du duas fo lalalau-laoonon.”

Manetualain hehelu-balatan neu Zerubabel

⁶ Ata nusa so'dak ndia, nadenu au, fo au anduku-alosak Manetualain hala hehelun-na nde ia, neu Zerubabel nae, “Ta nenik solda'du be'i-balakain, do boeo ta nenik o be'i-balakaim mesam-ma, neukose o sengi, tehu nenik Au duladaleng-nga dei.

⁷ Leomae mana mapanggenggek-ka ba'u letek-ka boeo, neukose nanasi'u henik neme o matam-ma mai. Neukose, o mafofo'a falik Au Umang-nga, ma nai lelek o pe'da batu makasososak-ka neu mamanan-na, neukose hataholi-la laloo beboo lae, ‘Mana'ahiik nanseli!’ ”

⁸ Boema, Manetualain hala hehelu fe'en-na, ana mai seluk,

⁹ nae, “Zerubabel pe'da basa Au Umang-nga batu makasososan-na so, de neukose ana tao nakababasak uma ndia lala'en-na. Metema, dede'ak ndia ana da'di soona, neukose Au anang-ngala bubuluk, lae Au nde adenu o, fo Zakharia neu leo sila neu.

^10a Hapu nggelok lakadadaek manada'dik ia. Tehu neukose sila lita Zerubabel nafofo'a nakandoo Au Umang-nga, fo neukose sila-lamahoko.”