ZAKHARIA 14 - Susula Malalaok Hehelu Palak Ma Hehelu Beuk

Yerusalem ma leoina-la

¹ Manetualain fai naketu-nala'din, deka so. De neukose manabonga uma-la, ala bonga Yerusalem, de ala baba'e ala kalo leni hata-heto-la, nai lea matan.

² Neukose Manetualain naloo nakabubua basa leoina-la, fo leu sapu-la Yerusalem. Neukose ala loso-la kota ndia, ala bonga uman-nala ma ala sungu loo inan-nala. Neukose, ala foo leni laun-na seli, leo mamana tu'u-tapak neu, tehu bei ela hataholi-la, ala leo lahele nai kota ndia.

³ Boema neukose Manetualain tutulumatak, fo natee-nata'ti la'ban leoina sila-la, sama leo Ana taon nai tepo-lelek makahulun-na.

⁴ Nai faik ndia, neukose napadeik nai Lete Sion-na, nai Yerusalem boboan dulu. Boema neukose, heaba'e Lete Setun-na hu kande bafa maloaina, mulai neme dulu losa muli. Neukose, letek ndia seli nakababale leo kii neu, ma seli leo kona neu.

⁵ Neukose, emi malai tunga bafak fo manaba'e letek ndia neu 2. Neukose emi malai sama leo emi bei-ba'i kaim-mala, nai lelek dae manggengok-ka, ana da'di nai tepo-lelek, Uzia fo mane Yehuda paleta. Boema, Manetualain fo Manetualaing-nga, Ana mai, no basa ata nusa so'dan-nala tungan.

⁶ Metema, faik ndia losa soona, ta hapu makalenik do eis so'on.

⁷ Nai faik ndia, ta hapu makahatuk so'on. Neukose faik ndia, mangale'dok nahele, ma boeo nai fai le'odaen-na. Tehu ka'da Manetualain mesak-kana, nde bubuluk, faihi'da faik ndia losa.

⁸ Nai faik ndia, neukose oe neuk-ka ana faa neme Yerusalem mai; oe ndia seli, ana faa leo Tasi Mates-sa neu, ma seli, ana faa leo Tasi Tala'dak neu. Neukose oe ndia, ana faa tunga teuk, nau nai fai oefak, do nai fai hanas boe.

⁹ Boema neukose, Manetualain Ana paleta da'dileo manek neu basa daebafak-ka lala'en-na; basa hataholi-a, neukose sene-do'ok neun, da'di leo Manetualain, ma lalelak-kana nenik na'dek sama.

¹⁰ Basa nusak-ka lala'en-na, neme Geba nai kii, losa Rimon nai kona, neukose da'di dae ma'dak. Tehu neukose, Yerusalem boetai namadema fo dema lena dae manai boboa-kaisun-na; neukose, kota ndia namaloa neme Lelesuina Benyamin-na, losa Lelesuina Sudut, fo nde lelesuina Pertama mamanan-na, ma neme Uma Puni Madema Hananeel, losa manek-ka mamana kaka'bi angol-la.

¹¹ Neukose, hataholi-la leo no nee-nee lino-linok, nai kota ndia, no ala ta bii-lamata'u neu momopo-mamatek-ka fa.

¹² Neukose Manetualain fe he'di-laus mangalauk, neu basa leoina fo latee-lata'ti basa loo Yerusalem so. Hataholi sila matan-nala, ma maan-nala, nakalenak basa aoinan-nala lala'en-na, neukose laboo, te bei kaso'dak-kala.

¹³ Nai faik ndia, neukose Manetualain tao-na leoina sila-la lapangamak, ma ala bii-lamata'u lanseli, nalosa neukose hataholi esan-na, ana ho'u-na nonoon manai boboan-na, fo ana fepa-li'un.

¹⁴ Touk manai Yehuda-la, neukose latee-lata'ti soaneu lasala'e Yerusalem. Neukose ala ho'i-la, basa leoina manai boboa-kaisun-nala hata-heton, da'di leo bua-lo'a kakalok, fo nalupa lilopilas, lilofulak ma bua-lo'a papakek-kala ladodou.

¹⁵ He'di-laus mangalauk matuaina esa, neukose la'e ndala, bagal, onta ma keledei, boema basa bana-manu manai musu-a mamana leleon-na boe.

¹⁶ Basa boema, basa hataholi fo bei laso'da nai leoina manasapu-na Yerusalem dalek-ka, neukose leu leo kota ndia leu, fo ala sene-do'ok neu Manek, fo Manetualain ma soaneu, ala tao Feta Lalaa Akidook-ka.

¹⁷ Metema hapu leoina ta nau neu leo Yerusalem neu, fo sene-do'ok Manek, fo Manetualain fa soona u'dan ta nai nusan-na fa.

¹⁸ Ma metema, hataholi Masir-ra ta nau tao Feta Lalaa Akidook-ka fa soona, neukose ala hapu he'di-laus fo Manetualain Manakoasa fen neu basa leoina, fo ala ta nau leu sene-do'ok fa.

¹⁹ Huhukuk-ka nde ndia, ba'eneu Masir ma ba'eneu leoina fo ana ta nau tao Feta Lalaa Akidook-ka fa.

²⁰ Nai faik ndia, kileik-kileik manai ndala-la bua papaken-na, neukose nanadoki-dulak nenik dede'ak-ka nae, “Nanafe hehelik soaneu Manetualain.” Kete-kete manai Manetualain Uman-na, neukose nanafe ha'da-holomata, sama leo mango-mango manai mei tunu-hotuk-ka matan-na.

²¹ Basa kete manai Yerusalem-mala, ma nai basa Yudea lala'en-na, neukose nanafe hehelik, fo da'di Manetualain Fo Manakoasa pusakan. Laun fo manatunu-hotu tutunu-hohotuk-ka, neukose ana paken, fo ana nasu paa tutunu-hohotuk-ka. Metema, tepo-lelek ndia losa soona, neukose ta hapu manadangan nai Manetualain Fo Manakoasa Uman-na so'on.