YUNUS 2 - Susula Malalaok Hehelu Palak Ma Hehelu Beuk

Yunus hule-haladoi

¹ Yunus hule-haladoi neu ndia Manetualain-na, nai i'ak ndia tein dalen-nae,

² “Ou Manetualain, nai au susang-nga dalek, au aloo neu O de O mataa au Au dokodoe tutulu-fafalik neme hataholi manamatek-kala daebafan dale mai, de O mamanene ma O taoafik neu au dokodoeng-nga.

³ O tapa au leo mamana madema neu losa tasi bui mate'en-na. Oe manafaak-ka, okofeo-na au nai ndia, lii-a ba'u neni au.

⁴ Au kokolak nai au daleng dale ae: Manetualain usi heni au neme matan-na mai so. Neukose au ta ita seluk uma malalao-malalafun-na so'on.

⁵ Tasi oe-a, ana kae losa au difadoong-nga tasi maloaina poti-na basa au aong-nga lala'en-na, enga tasi fefeo-na au langang-nga.

^6-7 Au palaboku losa letek-kala huun-na, leo mamanak fo lelesuinan-na nananggoek losa tepo-lelek mate'ek-ka. Au samane nga sota-mangu nai au aoinang dale boema au afandele de au aloo bou-bou neu O. Boema au hule-haladoing losa O, leo O Uma malalao-malalafum-ma dalek neu. Boema O so'u-ma au neme tasi dale mai, ou Manetualain, fo au Manetualaing-nga!

⁸ Manasongo-tangok sosoa-ndandaa taak-kala, la'oela O, de ala ta lilineka so'on.

⁹ Tehu neukose au akamee nakamee kokoa-kikiok ba'eneu O ma au tunu-hotu tutunu-hohotuk soaneu O. Neukose, au tao atetu au hehelu-balatang lala'en-na O nde Manetualain fo manasoi-tefa.”

¹⁰ Basa boema, no Manetualain paletan-na, de i'ak ndia muta heni Yunus leo ma'dak lain neu.