YOSUA 9 - Susula Malalaok Hehelu Palak Ma Hehelu Beuk

Hataholi Gibeon-nala ke'di-ndiu Yosua

¹ Halak la'eneu Israel sesengin-na, nakapela losa leo basa manek manai Lee Yarden-na boboan muli – nai letelepak-kala, nai letek-kala huun-na, nai mook manandolo nahele Tasi Tala'dak-ka su'un-na, losa Letek Libanon-na nai boboak kii: fo nde mane-manek Het, Amori, Kanaan, Feris, Hewi, ma Yebus.

² Mane-manek sila-la lalahalak fo lakabubua, soaneu leu lata'ti loo Yosua ma hataholi Israel-la.

³ Tehu, hataholi Gibeon-nala leme leoina Hewi-a mai, lamanene basa la'eneu hata fo, Yosua taon soaneu Yerikho ma Ai so.

⁴ Boema ala ho'i nakeketuk, fo ke'di-ndiu Yosua nenik, ala fua kalong palaak, ma mamana angol bana louk manada'di taak-kala neu sila keledein-nala lain. Ma ala sadia loti tuuk manapukuaik-kala da'di neu tua-lepa.

⁵ Ala pake bua-lo'a si'da-saik ma ta'buein-nala palaak ma nanatanak.

⁶ No papake-ngganggao leondiak-ka, leu latongo loo Yosua nai mamana ofun-na nai Gilgal, boema lafa'dan no hataholi Israel-la lae, “Ami meme nusa dook mai, de ami sanga tao hehelu-balataak moo Tuan-tuan-nala.”

⁷ Tehu hataholi Israel-la lafa'da lae, “Sosoak hata, ami tao hehelu-balataak moo emi? Fafa'kama emi mamana leleom-ma, ka'da deka-deka nai ia!”

⁸ Boema lae, “Ami nau tao su'di beek fo Tuan paletan.” Boema Yosua natanes nae, “See emi? Ma emi meme nusak bee mai?”

⁹ Boema lataa lae, “Ami meme nusak-ka, doon-na seli. Tuan, hu kande ami mamanene la'eneu Manetualain Manetualain fo Tuan-tuan-nala sene-do'ok-ka. Ami mamanene la'eneu basa hata fo Ana taon neme Masir,

¹⁰ ma la'eneu hata fo Ana taon soaneu Amori mane ka duan manai Yarden boboan dulu, fo nde: Sihon, mane Hesybon, ma Og, mane Basan, fo ala leo lai Asytarot.

¹¹ Mauli-malangan, ma ami nusam-ma laun-na lala'en-na, ladenu ami sadia tua-lepa, fo ami mai leo ia mai, fo matongo moo Tuan, ma mafa'da mae ami mataa neu Tuan-tuan-nala. Hu ndia de, ami dokodoe neu Tuan-tuan-nala dale malolen-na, fo tao hehelu-balataak moo ami.

¹² So'ba Tuan-tuan-nala mete loti, fo ami tua-lepam ia-la leona. Lelek ami la'o, loti ia-la bei lato'bi. Tehu besak ia, metes leon! Lamatuu, ma ala pukuai so.

¹³ Ma alukose angol ia-la bei beuk, nai lelek ami sali angol leo dalek neu; tehu besak ia, metes leona! Siiba'es so. Ami bua papakem-ma, ma ami ta'bueim-ma boeo, nalutus so, nanahu leleo-lala'o madooina ia.”

¹⁴ Boema hataholi Israel-la, sipo-la, hataholi Gibeon sila nana'a-nininun faaanak, te ta latane Manetualain la'eneu dede'ak ndia fa.

¹⁵ Boema, Yosua tao hehelu-balataa tia-laik no hataholi Gibeon sila-la, de ana helu, ana ta taonisa fas. Mauli-malangan Israel-la boeo, soo-supa fo ala tao latetu hehelu-balataak ndia.

^16-17 Tehu se'kona, ala tao hehelu-balataak ndia, neu fai ka telun-na, te hataholi Israel-la losa kota Gibeon, Kefira, Beerot ma Kiryat-Yearim, fo nai hataholi sila-la nusan-na so. Boema besak-ka ala bubuluk, lae hataholi Gibeon sila-la, mamana leleon-na, ta dook-ka neme Gilgal mai fa.

¹⁸ Tehu, hataholi Israel-la ta bisa taolisa fas, nana mauli-malanga Israel-la, soo-supa basa los, nenik hataholi Israel-la Manetualain-na, na'den-na so.

¹⁹ Tehu, mauli-malangan sila lataa lae, “Sa'dik-ka tao leo bee! Ami maheluk basa moos, pake soo-supak nenik hataholi Israel-la Manetualain-na, na'den-na so! Besak ia, ita ta bole tao mangalauk neu fas.

²⁰ Ita ta bole taotisa fas, nana ita helu basa so; de metema ita talelesi hehelu-balataak ndia soona, neukose Manetualain huku ita.

²¹ Da'di, nemen-na fo laso'da, tehu ita taos da'di ita manabia ain, ma ita manalepa oen.” Mauli-malangan sila hala nafafa'dan-na leondiak.

²² Boema laloo hataholi Gibeon sila-la, fo ala mai lataa Yosua. Yosua nae, “Tao le'e de, emi ke'di-ndiu ami, de emi mafa'da mae emi nusam-ma doon-na seli, tehu se'kona, ana deka nde ia?

²³ Hu kande emi tatao-nono'im ndia, de Manetualain huku emi. Neukose, emi leoinam-ma da'di ata tataas esa, manabia ai ma manalepa oe soaneu au Manetualaing-nga Uman-na.”

²⁴ Boema lataa lae, “Ami tao leondiak, nanahu ami mamanene lae Manetualain, fo Tuan-tuan-nala sene-do'ok ndia, nadenu basa Musa fo atan ndia, fe nusak ia lala'en-na neu Tuan, ma nai lelek Tuan ho'i-na dae ia soona, Tuan taonisa la'iesak laun-na. Ami bii manseli, boso nalosak ami nanataonisak, hu ndia de, ami tao basa dede'ak ia-la.

²⁵ Besak ia, ami nai Tuan koasan dale. Tao ami, tunga hata fo Tuan meten malole.”

²⁶ Boema Yosua taok-ka nde ia, nasulu-nahapa hataholi sila-la, ma ana ta nau hataholi Israel-la taolisa fas.

²⁷ Tehu ala taos da'di ata, fo nde manabia ai ma manalepa oe soaneu hataholi Israel-la, ma soaneu Manetualain mei tunu-hotun. Losa besak ia, ala bei tao lahele tatao-nono'ik ndia, nai mamanak fo Manetualain manakoasa hele fes, da'di mamana makaluku-makatele ba'eneun.