YOSUA 7 - Susula Malalaok Hehelu Palak Ma Hehelu Beuk

Akhan tao sala-singok

¹ Manetualain nafa'da basa hataholi Israel-la nae basa hata lala'en manai kota Yerikho, muse tao nakalulutuk-kasa, fo ta bole ho'i-la esa boen. Tehu ala ta tunga paleta ndia fa. Touk esa na'de Akhan, la'olena paleta ndia, nalosa Manetualain namanasa nanseli no hataholi Israel-la. (Akhan aman na'de Karmi, ma ba'in na'de Zabdi neme teidalek Zerah nai leo Yehuda dalek.)

² Nai lelek ndia, Yosua nadenu hataholi de'ubee, leme Yerikho leo Ai leu, fo kota esa nai Betel boboan dulu, deka no Bet-Awen. Ladenu hataholi sila leu palisak lutu-lutuk nusak ndia. Lakalala'ok basa sila bela-ba'un ndia boema,

³ ala fali ma'is, de lafa'da Yosua lae, “Ta paluu ita basatala teu sapu-ta, Ai fa. Fafa'kama haitua ka'da hataholi lifun dua do lifun telu leu. Boso haitua la'iesak solda'du-la leu latee-lata'ti nai naa, nanahu kota ndia anak-ka.”

⁴ Da'di, ka'da hataholi lifun telu leu sapu-la kota ndia, tehu ta lakataka fa, de lakadedeak.

⁵ Hataholi Ai-la usis leme kota Ai lelesuinan-na, losa leo mamana kali lilopilas-sa neu, de ala taolisa, fafa'kama hataholi teluhulu nee, neme hataholi lifu ka teluk-kala mai, nai pupukuk-ka huun-na. Boema hataholi Israel-la hela-hae, ma ala bii.

⁶ Yosua ma basa hataholi Israel-la, mauli-malangan-nala, dalen-nala he'dis nanseli, nalosa ala sisii-lulu'i bua-lo'an, de lele'dok esa dalen-na, losa le'odae, ala sene-do'ok nai Manetualain Peti Hehelu-balataan matan-na, ma ala tao afu neu langan-nala lain, fo da'di leo ta'du-tana dale he'dik.

⁷ Yosua nafa'da Manetualain nae, “Ou Manetualain fo au Manetualaing-nga! O moo ami losa leo Yarden selik ia mai, soaneu beek? Ade, soaneu fe ami neu hataholi Amori-la do? Fo ela ami mate do? Malole lenak, ami leo ka'da naa, fo nai Yarden selik!

⁸ Ou Manetualain! Musu sengi hataholi Israel-la so. Besak ia, au muse kokolak ae le'e bai?

⁹ Hataholi Kanaan-nala, ma basa hataholi manai nusak ia, neukose lamanene dede'ak ndia. Neukose lakahapi-la ami, fo taolisa ami! Boema, neukose O tao beek, fo O ho'u mahele O na'dem-ma?”

¹⁰ Manetualain nataa Yosua nae, “Fo'a! Te o sene-do'ok leondiak, neu dae lain ndia, sosoa-ndandaan ta!

¹¹ Hataholi Israel-la, tao sala-singok so. Au fe basa paleta, fo ela ala tunga hehelu-balataak nai sila loo Au, tehu ala la'olenan! Ala ho'i-la bua-lo'as, fo muse tao nalutus-sala so. Lamanako-la, bua-lo'as sila, de lafunis nai bua-lo'an-nala dalek, fo ela hataholi boso bubuluk.

¹² Hu ndia de, ala ta lakatatakak lasasalematak loo musu-a fa. Musu sengis, nanahu sila boeo, nanaketu basak, soaneu nanatao namopo-namatek so. Neukose, Au ta nai emi boboam-ma so'on, metema bua-lo'as fo ta bole ho'i fas sila-la, beita tao nakalulutuk-kasa fa.

¹³ Besak ia, fo'a leon Yosua! Tao malalao-malalafu hataholi Israel-la, ma madenus laheheleaon-nala, fo ala mai lataa Au. Paletas, fo balahaa soona, laheheleaon-nala, nana Au, Manetualain fo Israel Manetualain-na, neukose afa'das dede'ak-ka nde ia nae, ‘Hai hataholi Israel-la lemin! Au paleta basa emi, fo tao nakalulutuk bua-lo'as-sala, emi bei mafuni seli. Emi beita tapa heni bua-lo'as sila-la fa soona, emi ta makatatakak la'ban musu-a fa!’

¹⁴ Hu ndia de, Yosua, mafa'das mae balahaa fafaik, te neukose palisak-kasa, neme leo esa leo esa neu. Metema Au atu'du leo esa soona, basa bobongik nai leo ndia dalek-ka, muse esa-esa neu leo uluk neu. Ma metema, Au atu'du bobongik esa soona, basa teidalek manai bobongik ndia dalek-ka, muse esa-esa neu leo uluk neu. Basa soona, metema Au atu'du teidalek esa soona, hataholi manai teidalek ndia dalek-ka, muse esa-esa neu leo uluk neu.

¹⁵ Boema, hataholi nananatu'duk-ka, metema tete'ek-ka, ana pe'da bua-lo'as nanakena-ka'ik ndia soona, muse hotu henin sama-sama no teidalen, ma basa hata-heton lala'en-na; nanahu ndia nde la'olena hehelu-balataak, ma manatao tatao-nono'i mangalauk matua, nai hataholi Israel-la dalek.”

¹⁶ Balahaa, fo bei fafaianak nanseli te, Yosua nadenu hataholi Israel-la, leo esa-esa, neu leo uluk neu, boema la'e leo Yehuda.

¹⁷ Boema Yosua nadenu leo Yehuda, bobongin esa-esa, neu leo uluk neu, de la'e bobongik Zerah. Basa boema, nadenu bobongik Zerah, teidalen-na, esa-esa leo uluk neu, de la'e teidalek Zabdi.

¹⁸ Basa ndia boema, Yosua nadenu teidalek Zabdi hataholin-nala, esa-esa neu leo uluk neu; boema la'e Akhan, fo Karmi anan-na ma Zabdi upun-na.

¹⁹ Yosua nafa'da Akhan nae, “Anang-ngonei, makaheik, fo mafa'da no mangale'dok nai ia, nai Manetualain fo Israel Manetualain-na matan, o taon beek so. Mafa'dan neu au, fo boso mafunin.”

²⁰ Boema, Akhan nae, “Tete'ek-ka, au tao basa sala-singok neu Manetualain, fo Israel Manetualain-na so. Au taok-ka nde ia:

²¹ Nai ita kalo teni bua-lo'as-sala dalek, au ita ba'du manalu esa, mana'ahiik, fo Babilonia limaleen ndia, boema lilofulak fafa'kama kilo dua, ma lilopila bibiak esa, kilo seselik esa lenak. Au ahiik anseli no bua-lo'as sila-la, boema au ho'i-alas de au afunis nai dae dale, nai au mamana ofung-nga; au tao lilofulak-ka nai bui mate'en-na.”

²² Boema Yosua nadenu hataholi neu lai-lai leo Akhan mamana ofun-na neu. Tete'ek-ka bua-lo'as nanakena-ka'ik sila basa-basas lai naa, de nafunis nai dae dale, ma lilofulak-ka nai bui mate'en-na.

²³ Ala ho'i-la bua-lo'as sila, de lenis leo Yosua ma basa hataholi Israel-la neu. Boema, ala tao bua-lo'as sila neu Manetualain matan-na.

²⁴ Basa boema Yosua no basa hataholi Israel-la lala'en-na, ho'u-la Akhan, de loon leo Bafak Toto'a-tataak-ka neu, sama-sama no basa anan-nala, bana-manun sapi, keledei, bi'ilopo, lalaa teman-na, ma basa hata-heton lala'en-na, boema lilofulak, ba'du manalu ma namanako-na lilopilas-sa.

²⁵ Boema Yosua nafa'da Akhan nae, “Tao le'e, de o meni susa fe ita? Besak ia, neukose Manetualain fe susa neu o!” Boema basa hataholi Israel-la tapa Akhan no teidalen-nala nenik batu, losa mates. Boema, ala hotu heni basa hata-heton, ma namanako-na bua-lo'as-sala boe.

²⁶ Basa ndia boema, launu batu makadotok nanseli neu mamanak ndia, de losa besak ia, batu sila-la bei lai ndia. Hu ndia de, ala foi lahele mamanak ndia na'de, Bafak Toto'a-tataak. Boema, tenak heni Manetualain nasa-melun.