YOSUA 4 - Susula Malalaok Hehelu Palak Ma Hehelu Beuk

Lapadedeik lutu batu nasanene'dak sanahuludua

¹ Lelek basa hataholi Israel-la lala'en-na lala selik boema, Manetualain nafa'da Yosua nae,

² “Hele-ma hataholi sanahulu dua, neme Israel leo ka sanahuluduan-nala mai.

³ Paletas, fo leu ho'i-la batu sanahuludua, neme Lee Yarden-na tala'da heon mai, nai mamanak fo imam-mala lapadeik-ka. Madenus fo ala lu'a leni batu sila-la leo emi mamana ofum-ma, le'odaek ia dalen-na boe.”

⁴ Boema Yosua naloo-na, hataholi nanahelek ka sanahuluduak sila-la,

⁵ de nafa'das nae, “Meu leo Lee Yarden-na tala'da heon-na, leo emi Manetualaim-ma, Peti Hehelu-balataan matan-na. Hataholi esan-na, ho'i-na batu esa, neme mamanak ndia mai – dede'un-na, batu sanahuludua, fo nandaa no leoina Israel-la, leo ka sanahuluduan-nala, dede'un-na.

⁶ Neukose batu sila-la, ala fe leoina ia, lafandendelek hata fo Manetualain tao basan so. Nai fai makabuin, metema emi anam-mala latane batu ia-la sosoa-ndandaan hata ba'eneu emi soona,

⁷ ela leo been-na, emi mafa'das, mae Lee Yarden-na oen-na ma'dan, nai lelek leni Manetualain Peti Hehelu-balatan tunga lee ndia. Batu sila-la, neukose fe nafandendelek tataas esa neu leoina Israel-la, hata fo ana da'di nai ia.”

⁸ Hataholi ka sanahuluduak sila-la, tunga Yosua paletan-na. Nandaa no Manetualain natutu'dun neu Yosua, de ala ho'i-la batu sanahuludua neme Lee Yarden-na tala'da heon mai – dede'un-na, nandaa no leo-leo manai leoina Israel-la dalek – boema lenis leo sila mamana ofun-na neu.

⁹ Nai Lee Yarden-na tala'da heon ndia boeo, Yosua nakatoto'dok batu sanahuludua, nai imam-mala manandolo Peti Hehelu-balataak ndia, mamana napadein-na. (Batu sila-la bei lahele lai ndia, losa besak ia.)

¹⁰ Basa imam-mala lapadeik lahele lai Lee Yarden-na tala'da heon, losa hataholi sila-la tao basa hata lala'en, fo Manetualain paleta neus, tunga Yosua. Ndia nandaa no Musa natutu'dun neu Yosua. No lai-laik, hataholi Israel-la lena Lee Yarden-na.

¹¹ Lelek basa-basas lala lee selik boema, basa imam manandolo Peti Hehelu-balataak ndia, ala la'ok nai uluk

¹² Nandaa no Musa paletan-na, de palani ta'tibatu-la leme leo Ruben, Gad, ma leo Manasye seli, ala lena lakahuluk leo lee selik leu.

¹³ Basa-basas lala'en-na, touk manaho'u tafa-sisilo, lifun haahulu, laheheleaon fo latee-lata'ti. Nai Manetualain matan, ala lena lasale leo masabafak mana deka no Yerikho-a.

¹⁴ Faik ndia, Manetualain tao dede'a-dede'ak fo tao-na leoina Israel-la fe ha'da-holomata neu Yosua, da'di leo hataholi matua. Nai fai maso'dan-na dalek, ala fe ha'da-holomata neun, sama leo ala fe ha'da-holomata neu Musa.

¹⁵ Basa boema, Manetualain, nadenu Yosua

¹⁶ paleta basa imam-mala manandolo Peti Hehelu-balataak ndia, fo ela ala kalua leme Lee Yarden-na dalek mai.

¹⁷ Yosua tao hata fo Manetualain paleta neun.

¹⁸ Basa imam sila-la losa lee su'un-na tu'tik-ka, lee ndia oen-na mulai faa falik, de oen-na makadotok nanseli, sama leo makahulun-na.

¹⁹ Hataholi Israel-la losa Lee Yarden-na selik, de nai hataholi Yahudi-la bula ka esan-na, fain sanahulu boema, ala ofu leme Gilgal, fo nai Yerikho boboan dulu.

²⁰ Nai mamanak ndia, Yosua nakatoto'dok batu ka sanahuluduak, fo ala ho'i lenis leme Lee Yarden-na dalek mai.

²¹ Boema, Yosua nafa'da hataholi Israel-la nae, “Nai fai makabuin, metema emi anam-mala latane la'eneu batu ia-la sosoa-ndandaan soona,

²² mafa'das mae hataholi Israel-la, lena Lee Yarden ia, nai dae ma'dak lain.

²³ Tuis mae, emi Manetualaim-ma tao nama'da Lee Yarden ndia, fo emi basa-basam-mala losa selik, sama leo Ana tao nama'da Tasi Gelagah, soaneu ami,

²⁴ fo ela basa hataholi manai daebafak-ka bubuluk, Manetualain koasan-na ba'un-na seli. Ma no enok ndia boe, neukose emi fe ha'da-holomata neu emi Manetualaim-ma, losa dodoon-na.”