YOSUA 3 - Susula Malalaok Hehelu Palak Ma Hehelu Beuk

Hataholi Israel-la lena Lee Yarden-na

¹ Balahaa fafaik boema, Yosua ma hataholi Israel-la lala'en-na, fo'a fafaianak nanseli, boema ala la'oela leme sila mamana ofun manai Sitim-ma, de leu leo Lee Yarden-na leu. Ala ofu leme ndia, fo lahani fain-na losa, ala lena leo selik leu.

² Basa faik telu boema, basa mauli-malangan-nala la'ok okofefeo mamana ofu lala'en-na,

³ de ala fe hataholi Israel-la paleta nde ia nae, “Metema emi mita, basa imam-mala ndolo emi Manetualaim-ma, Peti Hehelu-balataan soona, ela leo been-na, emi boeo, la'oela mamana ofu ia. Tunga Peti ndia leona,

⁴ tehu boso la'ok deka Peti ndia; tungan neme dea mai, nai dae dodoon-na kilo esa. No enok ndia, neukose emi bubuluk enok fo muse emi la'ok tungan, nana emi beita meu hai leo nusak ia meu fa.”

⁵ Yosua nafa'da hataholi Israel-la nae, “Ela leo been-na, emi tao malalao-malalafu emi aoinam-ma, nana balahaa te, neukose Manetualain tao manada'di beuk nai emi tala'da heom.”

⁶ Boema Yosua paleta basa imam-mala, fo ela ala ndolo Peti Hehelu-balataak ndia, fo ala la'ok lakahuluk leme hataholi Israel-la mai. Ala tao tunga Yosua paletan-na.

⁷ Manetualain nafa'da Yosua nae, “Mulai faik ia, neukose Au tao o da'di hataholi matua, nalosa basa hataholi Israel-la lala'en-na, fe ha'da-holomata neu o, ma ala lame'da, lae Au nai o boboam-ma, sama leo Au nai Musa boboan-na.

⁸ Besak ia, paleta basa imam-mala manandolo Peti Hehelu-balataak ndia, fo ela ala losa lee dale soona, leu leo lee dale leu, fo lapadeik deka su'un-na.”

⁹ Boema, Yosua naloo hataholi Israel-la, de nafa'das nae, “Mai fo mamanene hata fo emi Manetualaim-ma, paletan neu emi-a.

^10-11 Mahani te, metema emi tutulumatak soona, tao leo bee-o, Manetualain usi heni hataholi Kanaan, Het, Hewi, Feris, Girgasi, Amori ma Yebus-sala. Ma nai lelek Manetualain fo nakadada'dik lalai ma daebafak-ka, Peti Hehelu-balatan lena Yarden-na, nakahuluk neme emi mai soona, neukose emi mita Manetualain fo maso'dak-ka, nai emi tala'da heom.

¹² Besak ia, ela leo been-na, emi hele hataholi sanahuludua – hele hataholi esa neme leoina Israel-la, leon-na esa-esak mai.

¹³ Mahani te, metema basa imam-mala fo manandolo Manetualain Peti Hehelu-balataan-na heta ein-nala lala Lee Yarden ndia oen dale soona, oe fo manafaa neme lee langan lain mai-a, neukose nanabakate'te nisak nai mamanak esa.”

^14-15 Nai lelek ndia, bei fai ketu-koluk, de sama leo biasa, de Lee Yarden-na, oen-na bei makadotok nanseli. Lelek hataholi Israel-la la'oela sila ofun-na, fo leu lena Lee Yarden na boema, basa imam-mala la'ok lakahuluk, ma leni Peti Hehelu-balataak-ka. De nai lelek imam-mala, heta ein-nala lala lee oen dale boema,

^16-17 no hatematak ndia boe, lee-a ta faa so'on. Oe manafaa neme lee langan-na mai, ana da'di te'te, tehu nai dook-ka, nai kota Adam fo kota esa nai kota Sartan-na boboan-na. Lee oen manafaa leo Tasi Mates-sa neu, ana ta faa so'on, nalosa hataholi Israel-la, la'ok nai dae ma'dak lain leo selik leu mamanak ndia, nasasalematak no kota Yerikho-a. Basa imam-mala fo manandolo Peti Hehelu-balataak ndia, lapadeik lahele nai lee tala'da heon, losa hataholi Israel-la lala'en-na, lala selik.