YOSUA 23 - Susula Malalaok Hehelu Palak Ma Hehelu Beuk

Yosua kokolak dede'a nasi'da-naba'ek

¹ Doon-na seli, nai lelek Manetualain fe hataholi Israel-la nee-nee lino linok; boema musu-a ta fes nasanene'dak mahelek so'on. Nai lelek ndia Yosua namalasi nanseli so.

² Boema naloo-na basa hataholi Israel-la lala'en-na, boeo basa lasi nggolok-kala, basa mauli-malangan-nala, basa manakee-manafula-la, ma basa malanga solda'du matuaina-la, de nafa'das nae, “Besak ia, au amalasi so.

³ Emi mita basa emi Manetualaim-ma, tao basa hata lala'en-na soaneu basa leoina manai ia-la, hu ka nde emi. Fo manamatatik soaneu emi nde been-na, Manetualain, fo emi Manetualaim-ma, mesak-kana.

⁴ Leoina-la daen fo bei elak-kala, leondiak boe, Au sengi basa leoina-la, daen manabetubala neme Lee Yarden-na boboan dulu, de nakandoo leo muli neu, fo ana losa Tasi Tala'dak-ka, Au baba'e basan neu emi, fo da'di emi pusakam so.

⁵ Metema, emi meu mata'ti moo leoina sila-la soona, emi Manetualaim-ma, neukose tao-na leoina sila-la lakadedeak, fo lalai leme emi mai. Neukose emi soa sila nusan-na, sama leo emi Manetualaim-ma, helu basan neu emi so.

⁶ Hu ndia de, manea leona, fo ela emi tunga ma makalala'ok basa hata lala'en fo nanasulak nai Musa Susula Hoholo-lalanen dale, Boso la'olena hoholo-lalanek sila-la, esa boen.

⁷ No enok ndia, neukose emi ta sese'do-babalik moo leoina fo ala bei leo lai emi tala'da fa. Neukose, emi ta seseik sila lamatua daebafan-nala na'den-na, do soo-supa menik na'dek ndia fa. Boeo emi ta hule-haladoi do sene-do'ok neu lamatua daebafak sila fa.

⁸ Nakalenak, emi muse lilineka mahele neu Manetualain, sama leo emi taon losa besak ia.

⁹ Manetualain usi-heni leoina matua ma mabe'i-balakaik-kala soaneu emi so, de sila hataholin esa boeo, ta nakatatakak nabe'i la'ban emi fa.

¹⁰ Emi hataholim esa, hapu sengi hataholi lifun esa, nanahu emi Manetualaim-ma nde nata'ti soaneu emi, sama leo Ana helu basak-ka so.

¹¹ Hu ndia de, mafandendelak leona, fo sue-lai emi Manetualaim-ma.

¹² Metema, emi ta lilineka, ma emi sese'do-babalik moo leoina fo ala bei leo lai emi tala'da, boema emi taos da'di emi saom soona,

¹³ mafandendelek te, tao leo bee-o, emi Manetualaim-ma, neukose ta usi heni leoina sila soaneu emi so'on. Nasafalin-na, neukose leni bibii-namata'uk nanseli soaneu emi, nana neukose sila da'di sama leo hihi'ik, do sama leo meo o, soaneu emi. Sila boeo, neukose tao-la emi doi-doso manseli; nana neukose ala da'di sama leo ue-a nai emi muliha'im-ma, do sama leo nggauk-ka nai emi matam dale. Neukose, emi doi-doso makandoo, losa ta ela emi hataholim esa boen, nai emi Manetualaim-ma, fe emi nusak malole ia dalek fa.

¹⁴ Besak ia, fain-na losa, au mate ia so. Emi basa-basam-mala, esa-esak bubuluk matalolole, mae emi Manetualaim-ma, fe basa emi, hata malole lala'en, fo Ana helu basan so. Ana tao natetu la'iesak, hehelu-balataan so, ta ela esa boen.

¹⁵ Tehu, sama leo Ana tao natetu hehelu balataan lala'en-na, leondiak boe, tao leo bee-o neukose nakalala'ok huhukun lala'en-na soaneu emi.

¹⁶ Metema, emi la'olena Manetualain fo emi Manetualaim-ma, hehelu-balataan, fo Ana paleta basan neu emi, fo daenga emi tao tungan, tehu emi meu makaluku-makatele neu lamatua fe'ek-kala, boema sene-do'ok neu lamatuak sila-la, soona neukose Manetualain namanasa, fo Ana huku emi. Ka'da nai fai nggenggelok esa mesak-kana, neukose mopok emi basa-basam-mala neme nusak malole fo Manetualain fen neu emi ia.”