YOSUA 21 - Susula Malalaok Hehelu Palak Ma Hehelu Beuk

Kota-kota soaneu leo Lewi-a

^1-2 Faik esa boema, basa malanga uma loo manai leo Lewi dalek, leu leo Silo, nai nusa Kanaan-na, fo leu lataa Imam Eleazar, Yosua, fo Nun anan-na, ma basa leoina Israel-la, leo-leon-nala, malanga uma loon-nala lala'en-na. Lafa'da lae, “Manetualain Ana paleta basa tunga Musa so, fo ela fe ami, fo hataholi Lewi-la kota-kota, soaneu mamana leleok, ma moo mana'uk-kala nai kota sila-la boboa-kaisun, soaneu ami bana-manum-mala.”

³ Boema, hataholi Israel-la, tunga Manetualain paletan-na. Ala fe hataholi Lewi-la, kota ia-la loo moo manaun-nala, neme sila dae mesan-nala mai.

⁴ Fo manasipo makasososa kota-kota-nala nde: teidalek maneme leo-ingu Kehat-ta, nai leo Lewi-a dalek. Ala fe teidalek maneme Imam Harun-na tititi-nonosin mai kota sanahulu telu, neme leo Yehuda, Simeon ma Benyamin nusan-nala mai.

⁵ Ala fe teidalek Kehat-ta, leo-ingu fe'en-nala, kota sanahulu, neme leo Efraim, leo Dan boema leo Manasye nusan-nala mai, fo nai Lee Yarden-na, boboan muli.

⁶ Leo-ingu Gerson-na hapu kota sanahulu telu, neme leo Isakhar, Asyer, Naftali ma leo Manasye nusan-nala mai, fo nai Lee Yarden-na, boboan dulu.

⁷ Teidalek maneme leo-ingu Merari-a hapu kota sanahulu dua, neme leo Ruben, Gad ma Zebulon nusan-nala mai.

⁸ Hataholi Israel-la, baba'e kota-kota sila-la loo mook mana'un-nala, neu hataholi Lewi-la, tunga tu'u batu, sama leo Manetualain paletan tunga Musa.

Kota-kota soaneu leo-ingu Kehat-ta

^9-19 Neme leo-ingu Kehat manai leo Lewi dalek, imam-mala fo Harun tititi-nonosin-nala, nde sipo makasososa, sila kotan-nala; ala fes kota sanahulu telu, loo moo mana'un-nala. Ala sipo kota sio, neme leo Yehuda ma leo Simeon-na mai, fo nde: Libna, Yatir, Estemoa, Holon, Debir, Ain, Yuta, Bet-Semes ma Arba, de ala foi na'den-na, tunga Enak aman na'den-na. Besak ia kota ndia na'de Hebron, fo kota nasulu aok esa nai Yehuda letelepan-na. Ala fe basa, kota ia tinan-nala, ma nggolo-nggolon-nala, leo Kaleb, fo Yefune anan-na neu so, fo da'di ndia dae pusakan. Ala sipo kota haa, neme leo Benyamin na mai, fo nde: Gibeon, Geba, Anatot ma Amon.

^20-26 Ala fe teidalek fe'ek-kala leme Kehat leo-ingu-na mai kota sanahulu, loo mook mana'un-nala. Leo Efraim-ma, sipo kota haa, fo nde: Bet-Heron, Kibzaim, Gezer ma Sikhem, fo kota nasulu aok esa nai letelepak Efraim-ma. Leo Dan-na, sipo kota haa, fo nde: Elteke, Gibeton, Ayalon ma Gat-Rimon. Leo Manasye manai boboak muli, ala sipo kota dua, fo nde: Taanakh ma Gat-Rimon.

Kota-kota soaneu leo-ingu Gerson ma Merari

^27-33 Leo-ingu fe'ek esa nai leo Lewi dalek, nde leo-ingu Gerson. Ala fe teidalek manai leo-ingu Gerson ndia dalek, kota sanahulu telu, loo mook mana'un-nala. Leo Manasye manai boboak dulu, ala sipo kota dua, fo nde: Beestera ma Golan, fo kota nasulu aok esa, nai Basan nusan-na. Leo Isakhar-ra, sipo kota haa, fo nde: Kisyon, Dobrat, Yarmut ma En-Ganim. Leo Asyer-ra, sipo kota haa, fo nde: Misal, Abdon, Helkat ma Rehob. Leo Naftali-a, sipo kota telu, fo nde: Hamat-Dor, Kartan ma Kedes, fo kota masulu-mahapak esa, nai Galilea.

^34-40 Bei ela leo-ingu manai leo Lewi dalek-ka, nde: leo-ingu Merari, de ala fes kota sanahulu dua, loo mook mana'un-nala. Leo Zebulon-na, sipo kota haa, fo nde: Yokneam, Karta, Dimna ma Nahalal. Leo Ruben-na, sipo kota haa, fo nde: Bezer, Yahas, Kedemot ma Mefaat. Leo Gad-ta, sipo kota haa, fo nde: Mahanaim, Hesybon, Yaezer ma Ramot, fo kota nasulu aok esa nai Gilead.

^41-42 Da'di, leoina Israel-la, daen-nala lala'en-na, kota haahulu falu loo moo mana'uk manai titia-tatain-nala, ala fes leo hataholi Lewi-la neu.

Kanaan da'di hataholi Israel-la pusakan

⁴³ Manetualain fe hataholi Israel-la dae lala'en, fo Ana helu basan nenik soo-supak neu sila bei-ba'i kain-nala. Langatuu-la nusak ndia boema, hataholi Israel-la leo lahele leme ndia.

⁴⁴ Boema nandaa no Manetualain helun neu sila bei-ba'i kain-nala, de nusak ndia nee-nee lino-linok, nanahu Manetualain nasulu-nahapan. Musu-musun-nala, ta hapu esa boen hapu la'ban-nana fa, nana Manetualain fe hataholi Israel-la sengi basa musun-nala.

⁴⁵ Manetualain tao natetu basa hala hehelun neu hataholi Israel-la; ta hapu esa boen, fo Ana ta tao natetu fan.