YOSUA 16 - Susula Malalaok Hehelu Palak Ma Hehelu Beuk

Dae fo latu'du fen neu Efraim ma Manasye Muli

¹ Latu'du fe Yusuf tititi-nonosin, dae toon-na, mulai neme Lee Yarden fo manadeka no Yerikho, nai oemata Yerikho boboan dulu, losa moo solokaek-ka. Too ndia neme Yerikho mai, de ana kae losa Betel nai nusak letelepak-ka.

² Too ndia, neme Betel mai, de nakandoo leo Lus neu, boema ana tunga Atarot, fo nde hataholi Arki-la mamana leleon-na.

³ Too ndia, neme ndia mai, de nakandoo leo Muli neu, fo neu leo Yaflet teidalen-nala nusan-na neu, losa leo Bet-Horon-Hilir, de nakandoo leo Gezer neu, boema nate'e nai Tasi Tala'dak.

⁴ Nusak ndia nde, ala fen neu leo Manasye ma Efraim, fo Yusuf tititi-nonosin, fo da'di sila pusakan.

Leo Efraim

⁵ Too-la nde ia, nde been-na, dae too fo ala fen neu teidalek manai leo Efraim dalek-kala. Sila dae toon manai boboan dulu, mulai neme Atarot-Adar losa Bet-Horon-Hulu neu,

⁶ boema nakandoo leo Tasi Tala'dak neu. Mikhmetat nai boboa kiin-na. Too ndia, ana pilu neme boboan muli, leo Taanat-Silo neu, boema ana selin, de neme boboan dulu leo Yanoah neu.

⁷ Too ndia, ana kona neme ndia, leo Atarot ma Naharat neu, boema ana ndolo nakandoo Yerikho, de nate'e nai Lee Yarden-na.

⁸ Efraim dae toon manai boboak muli, mulai neme Tapuah losa Leeanak Kana neu, boema nate'e nai Tasi Tala'dak. Ala fe dae ndia, neu teidalek maneme leo Efraim-ma mai, fo da'di sila pusakan,

⁹ nai dalek, hapu kota anak ma nggolok manai nusa Manasye dalek, de'ubee boe.

¹⁰ Tehu leo Efraim-ma, ta usi heni hataholi Kanaan maneme nusa Gezer-ra mai fa. Hu ndia de, losa besak ia, hataholi Kanaan-nala bei leo lahele loo hataholi Efraim-mala, tehu lakasetis, fo laue-lale'di da'di leo ata, soaneu hataholi Efraim-ma.