YOSUA 15 - Susula Malalaok Hehelu Palak Ma Hehelu Beuk

Latu'du fe leo Yehuda nusak-kala

¹ Leo Yehuda teidalen-nala sipo dae baba'en-nala, de too-lanen nde ia: Nai boboak kona, nusak ndia natabaa losa moo solokaek Zin-na, pe'da mate'e na, nai too no Edom-ma;

² mulai neme Tasi Mates-sa pe'dan kona mai,

³ de nakandoo leo kona neu, de ana tunga letek manai Akrabim-ma huun-na, losa Zin. Basa boema, ana tunga Kades-Barnea kona, de nakandoo tunga Hezron, de ana kae leo Adar neu, basa boema, ana pilu leo Karka neu.

⁴ Neme ndia mai, de nakandoo leo Azmon neu, boema ana ndolo leeanak manai too no Masir-ra, basa boema, nate'e nai Tasi Tala'dak. Leo Yehuda nusan-na, boboan kona, too-lanen leondiak. Ma too-lane ndia, nalupa nusa Israel-la lala'en-na, too kona.

⁵ Too manai boboak dulu nde Tasi Mates-sa, de nakandoo leo kii neu, de losa Lee Yarden-na pe'dan-na. Too manai boboak kii, mulai neme Lee Yarden-ndia pe'da na mai,

⁶ de ana kae leo Bet-Hogla neu, boema nakandoo leo too manai Bafak Yarden-na neu. Too kii neme ndia mai, de ana kae nakandoo leo kii neu losa Batu Bohan. (Ruben anan Bohan ndia),

⁷ basa boema, nakandoo leo Bafak Toto'a-tataak-ka losa Debir, boema ana pilu seluk leo kii neu, fo leo Gilgal, fo nasasalematak no letek manai Adumim-ma, nai bafak ndia boboan kona. Neme ndia mai, de nakandoo seluk leo oemata En-Semes neu, boema ana leo En-Rogel neu,

⁸ basa boema, ana kae tunga Bafak Hinom-ma, de neu leo pupukuk-ka boboan kona, fo nai bee, Yerusalem fo hataholi Yebus-sala kotan-na, nai ndia. Too ndia, neme ndia mai, de nasale leo pupukuk ndia poin-na neu, fo nai Bafak Hinom-ma boboan muli, nai Bafak Refaim-ma pe'dan kii,

⁹ basa boema, nakandoo leo oemata Me-Neftoah neu, losa kota-kota manadeka no Letek Efron-na. Nusak ndia, toon-na neme ndia mai, de ana pilu leo Baala neu (fo nde Kiryat-Yearim),

¹⁰ ma ana okofeo-na Baala boboan muli, leo letelepak Edom-ma neu, boema nakandoo leo Letek Yearim-ma boboan kii neu (fo nde Letek Kesalon-na), de ana kona leo Bet-Semes neu, basa boema nakandoo leo Timna neu.

¹¹ Neme Timna mai, de too ndia nakandoo leo Letek Ekron-na boboan kii neu, boema ana pilu leo Sikron tunga Letek Baala neu, de nakandoo leo Yabneel neu, boema nate'e nai Tasi Tala'dak,

¹² fo nalupa Yehuda nusan-na toon muli. Teidalek manai leo Yehuda dalek-ka, ala leo nai nusak ndia dalek.

Kaleb nangatuun-na Hebron ma Debir

¹³ Nandaa no Manetualain paletan neu Yosua de, ana fe nusa Yehuda seli neu Kaleb, fo Yefune neme leo Yehuda, anan-na. Ana fe kota ndia leo Hebron, fo nde Arba fo Enak anan-na.

¹⁴ Enak tititi-nonosin nde hataholi Sesai, Ahiman, ma Talmai. Kaleb usi heni basa-basas leme Hebron mai.

¹⁵ Neme kota ndia mai, de neu sapun-na hataholi manaleo manai Debir-ra. (Makahulun-na kota ndia nananita-nalelak da'di leo Kiryat-Sefer.)

¹⁶ Kaleb nae, “Ba'eneu see, fo ana hapu angatuun-na Kiryat-Sefer soona, ana bole sao-na au anafe'ong, Akhsa.”

¹⁷ Otniel, fo Kaleb tolanon-na na'de Kenas anan-na, nagatuu-na kota ndia; boema Kaleb fe anafe'on Akhsa, da'di Otniel saoinan.

¹⁸ Neu faik fo ala ka'bing boema, Otniel nakaseti Akhsa fo daenga noke aman, fo ana fes dae, duduik esa. Boema Akhsa kona neme keledein lai mai boema, Kaleb natanen, nahiik beek.

¹⁹ Akhsa nataa nae, “Au hii oemata de'ubee, nana dae fo ama fe au ndia, nai mamana oe tak.” Boema Kaleb fen oemata manai lee langan-na, ma oemata manai lee boboan dae.

Yehuda kotan-nala

²⁰ Tutuik manamaik ia, nde be na, dae fo ala fen neu teidalek manai leo Yehuda dalek, fo da'di sila pusakan.

^21-32 Kota-kota fo doon-na seli, nai boboan kona, fo da'di Yehuda pusakan-na, nai too no Edom-ma, basa-basas kota duahulu sio, fo nai dalek hapu nggolo-nggolok manai boboa-kaisun-nala. Kota-kota sila-la nde: Kabzeel, Eder, Yagur, Kina, Dimona, Adada, Kedes, Hazor-Hadata, Keriot-Hezron (fo nde Hazor), Amam, Sema, Molada, Hazar-Gada, Hesmon, Bet-Pelet, Hazar-Sual, Bersyeba, Baal-laa, Iyim, Erem, Eltolad, Khesil, Horma, Ziklag, Madmana, Sansana, Lebaot, Silhim, Ain ma Rimon.

^33-36 Kota-kota fo nai dalek hapu nggolo-nggolok manai boboa-kaisun, fo lai pupukuk-kala huun-na, basa-basas kota sanahulu haa, fo nde: Esytaol, Zora, Asna, Zanoah, En-Ganim, Tapuah, Enam, Yarmut, Adulam, Sokho, Azeka, Saaraim, Aditaim, Gedera ma Gederotaim.

^37-41 Boeo, kota ka sanahulu neek ia-la, fo sama-sama loo nggolo-nggolok manai boboa-kaisun-nala nde: Zenan, Hadasa, Migdal-Gad, Dilean, Mizpa, Yokteel, Lakhis, Bozkat, Eglon, Khabon, Lahmas, Khitlis, Gederot, Bet-Dagon, Naama ma Makeda.

^42-44 Boeo kota ka siok manamaik ia-la, sama-sama loo nggolo-nggolok manai boboa-kaisun-nala nde, Libna, Eter, Asan, Yiftah, Asna, Nezib, Kehila, Akhzib ma Maresa.

⁴⁵ Boeo Ekron no kota anak-kala, ma nggolo-nggolon-nala,

⁴⁶ boema basa kota-kota, ma nggolo-nggolok manadeka Asdod-ta, neme Ekron losa leo Tasi Tala'dak neu.

⁴⁷ Leondiak boe, Asdod ma Gaza no kota anak-kala, ma nggolo-nggolok fo lakapepela losa deka loo leeanak, manai too Masir ma Tasi Tala'dak su'un-na.

^48-51 Nai nusak letelepan-na, kota sanahulu esa, sama-sama loo nggolo-nggolok manai boboa-kaisun-nala nde: Samir, Yatir, Sokho, Dana, Kiryat-Sana, (fo nde Debir), Anab, Estemoa, Anim, Gosyen, Halon ma Gilo.

^52-54 Boeo kota ka siok, fo nanasulak nde nisidaen ia, nai dalek hapu nggolo-nggolok manai boboa-kaisun-nala nde: Arab, Duma, Esan, Yanum, Bet-Tapuah, Afeka, Humta, Kiryat-Arba, (fo nde Hebron) ma Zior.

^55-57 Boeo, kota ka sanahuluk, fo nanasulak nde nisidaen ia, sama-sama loo nggolo-nggolok manai boboa-kaisun-nala nde: Maon, Karmel, Zif, Yuta, Yizreel, Yokdeam, Zanoah, Kain, Gibea ma Timna.

^58-59 Ma kota ka neek, fo nanasulak nde nisidaen ia-la boeo, sama-sama loo nggolo-nggolok manai boboa-kaisun-nala nde: Halhul, Bet-Zur, Gedor, Maarat, Bet-Anot ma Eltekon.

⁶⁰ Boeo kota ka duak, fo nanasulak nde nisidaen ia, sama-sama loo nggolo-nggolok manai boboa-kaisun-nala nde: Kota Kiryat-Baal (fo nde Kiryat-Yearim) ma Kota Raba.

^61-62 Nusak manai moo solokaek-ka, hapu kota 6, nde ia, sama-sama loo nggolo-nggolok manai boboa-kaisun-nala nde: Bet-Araba, Midin, Sekhakha, Nibsan, Kota Masik, ma En-Gedi.

⁶³ Yehuda hapu kota Yerusalem-ma boe, tehu hataholi Yehuda-la ta hapu usi heni hataholi Yebus manaleo nai ndia fa. Losa besak ia, hataholi Yebus-sala bei leo lahele loo hataholi Yehuda-la lai kota ndia.