YOSUA 14 - Susula Malalaok Hehelu Palak Ma Hehelu Beuk

Nusak manai Lee Yarden-na boboan muli, nanababa'ek

¹ Tutuik manamaik ia la'eneu nusa Kanaan-na, nai Lee Yarden-na boboan muli, baba'en leo beek neu hataholi Israel-la. Manababa'e dae ndia neu hataholi Israel-la, nde Imam Eleazar, Yosua fo Nun anan-na, ma leoina Israel-la, mane leon-nala.

² Sama-na leo Manetualain paleta basan neu Musa, de nusa-nusak manai Lee Yarden-na boboan muli, fo nananaketuk, fen neu leoina Israel-la, leo ka sio seselin-na, muse nanababa'en nenik tu'u batu.

^3-4 Musa fe basa, dae manai Lee Yarden-na boboan dulu, neu leo kadua seselik-ka so. (Paluu nanasulak nai ia, nae Yusuf tititi-nonosin nanaba'ek neu leo dua; fo leo Manasye ma leo Efraim-ma.) La'eneu leo Lewi-a soona, Musa ta fes dae fa. Ka'da ana fes kota, soaneu mamana leleon-nala, ma mook-kala, soaneu bana-manun-nala.

⁵ Hataholi Israel-la baba'e dae ndia leondiak, nandaa no Manetualain paleta basan neu Musa so.

Fe Hebron leo Kaleb neu

⁶ Faik esa boema, hataholi-la leme leo Yehuda mai, de leu leo Yosua nai Gilgal. Hataholi esa nai hataholi sila dalek, fo nde Kaleb, fo Yefune hataholi Kenas ndia, anan-na nae, “Yosua! O bubuluk hata fo Manetualainnafa'dan neu Musa, fo Manetualain hataholi nadedenun ndia, neme Kades-Barnea, la'eneu o ma au.

⁷ Au teung haahulu nai lelek Musa, fo Manetualain atan ndia, nadenu au neme Kades-Barnea, fo da'di mata-mata soaneu palisak lutu-lutuk nusak ia. De au fali ma'ing-nga boema, au afa'dan halak-ka, ta pepekok fa.

⁸ Au u o hataholi-la, ala tao-la hataholi Israel-la bii-lamata'u. Tehu au lilineka ahele Manetualain fo au Manetualaing-nga.

⁹ Ma hu ndia de, Musa helu nae, dae fo ana la'ok okofefeon-nana, tao leo bee-o, neukose ana fen neu au, ma au anang-ngala, fo da'di ami pusakam, losa dodoon-na.

¹⁰ Besak ia, Manetualain nafa'da basa dede'ak ndia neu Musa, teuk haahulu lima ia so. Dede'ak ndia, ana da'di ndek lelek hataholi Israel-la bei laleu-lalaak leme moo solokaek-ka. Ma sama leo Manetualain helu basan, de Manetualain boeo, nasulu-nahapa au so, nalosa au aso'da ahele losa besak ia. Mitak besak ia, au teung faluhulu lima so,

¹¹ tehu au bei balakaik, sama leo nai lelek Musa nadenu au-a. Au balakaing-nga bei dai soaneu atee-atati, do tao su'di beek-ka.

¹² Hu ndia de, besak ia, fe nusa letelepak fo Manetualain helu basa, fen neu au so, nai lelek au ma hataholi fo sama-sama loo au fali ma'im-ma, fo ami meni hala nafa'dak. Nai lelek ndia, o mamanene matam, lae hataholi ao matuaina ma ei madema-la lai naa, fo lokes soona lae, leoina Enak. Ala leo lai kota-kota matuaina-la, lanuu papala nanadamak. Fafa'kama, Manetualain, neukose Ana tulu-fali au, nalosa au hapu usi henis, sama leo Manetualain nafa'dak-ka.”

¹³ Boema Yosua ba'e-pala Kaleb, fo Yefune anan-na, de ana fen kota Hebron-na, da'di ndia pusakan.

¹⁴ Losa besak ia, kota ndia bei da'di Kaleb fo Yefune hataholi Kenas ndia, anan-na pusakan, nanahu ana lilineka, ma tunga Manetualain fo Israel Manetualain-na.

¹⁵ Makahulun-na, loke Hebron soona lae, kota Arba. (Arba nde been-na, hataholi matuaina nanseli, nai leoina Enak-ka dalek.) Boema nusak ndia nee-nee lino-lino, ma so'da-molek, nanahu natee-natatik ta so.