YOSUA 13 - Susula Malalaok Hehelu Palak Ma Hehelu Beuk

Bei hapu nusak fo muse langatuu-lan

¹ Besak ia Yosua namalasi nanseli so. Manetualain nafa'da Yosua nae, “O mamalasi so, Yosua! Tehu bei nusak ba'uk-ka, muse mangatuu-man, fo nde:

² nusa Filistin-na lala'en-na, ma Gesur,

³ ma nusa Awi lala'en-na leo kona neu. (Nusak maneme Lee Sikhor-ra, nai Masir dae toon-na, losa leo Ekron dae toon-na nai boboak kii, basa sila lala'en-na, leken leoina Kanaan-na nusan sila; ma mane-manek Filistin manaleo nai Gaza, Asdod, Askelon, Gat, ma Ekron.)

⁴ Boeo bei hapu nusak fo muse mangatuu-man, fo nde: nusa Kanaan-na lala'en-na, ma Meara (fo leoina Sidon-na nuun ndia), losa leo Afek, nai leoina Amori nusan-na, dae toon-na;

⁵ basa boema, leoina Gebal-la nusan-na, ma nusa Libanon-na lala'en-na, leo boboak dulu neu, fo neme Baal-Gat nai Lete Hermon-na boboan kona, fo nakandoo leo enok manaleo Hamat neu.

⁶ Hapu la'iesak hataholi Sidon-nala nusan-na, nai dalek boe; hataholi Sidon fo manaleo nai nggolo letelepak-ka nai letek Libanon-nala ma Misrefot-Maim tala'da.” “Mahani te, neukose, Au usi heni basa leoina sila-la, nai lelek hataholi Israel-la lata'ti loos,” Manetualain kokolak nakandoo no Yosua nae, “O muse baba'e dae ndia neu hataholi Israel-la, fo da'di sila dae pusakan, sama leo Au paleta basan neu o so.

⁷ Da'di, besak ia baba'e dae ndia leona, neu Israel leo ka 9-na, ma neu leo Manasye seli, fo daenga dae ndia da'di sila dae pusakan.”

Baba'e dae manai Lee Yarden-na boboan dulu

⁸ Leo Ruben, ma Gad boema leo Manasye seli, sipo basa dae baba'ek neme Musa, fo Manetualain atan ndia mai so: fo nde dae manai Lee Yarden-na boboan dulu.

⁹ Sila nusan-na neni Aroer (fo nai Bafak manai Lee Arnon-na su'un-na), ma kota manai bafak ndia tala'daheon-na. Boeo nusa letelepak-kala lala'en-na, neme Medeba losa leo Dibon neu

¹⁰ ma losa leo dae Amon-na dae toon-na, fo nai dalek hapu basa kota fo Sihon, mane Amori paleta hain so, de nangatuuk neme Hesybon.

¹¹ Nusa Gilead-ta nai dalek boe, nusa-nusak manai Gesur ma Maakha titia-tatain-nala, boema Lete Hermon-na lala'en-na, ma nusa Basan lala'en-na losa leo Salkha neu.

¹² Sila nusan-na boeo, neni Mane Og, fo hataholi Refaim mate'ek fo ana paleta neme Asytarot ma Edrei. Musa sengi basa leoina sila-la, de ana usis, fo ala kalua leme sila nusan-na mai.

¹³ Tehu, hataholi Israel-la, ta usiheni laun Gesur ma Maakha-la fa; ala bei leo lahele nai Israel.

¹⁴ Leo Lewi-a, ana ta sipo dae baba'ek neme Musa mai fa, nana Manetualain nafa'da basa Musa nae, leo Lewi-a baba'en-na nde been-na, neme tutunu-hohotuk fo nanatunuk nai mei tunu-hotuk-ka, soaneu Manetualain, fo Israel Manetualain-na.

Nusak fo latu'du fen neu Ruben

¹⁵ Dae fo Manetualain helu fen neu Israel ndia, Musa fe seli neu teidalek manai leo Ruben-na dalek, fo da'di sila dae pusakan.

¹⁶ Sila nusan ndia, neni Aroer (Bafak Lee Arnon-na su'un-na) ma kota manai bafak ndia tala'daheon, losa leo letelepak manai Medeba titia-tatain;

¹⁷ boeo Hesybon ma basa kota manai letelepak ndia, fo nde: Dibon, Bamot-Baal, Bet-Baal-Meon,

¹⁸ Yahas, Kedemot, Mefaat,

¹⁹ Kiryataim, Sibma, Zeret-Hasahar fo nai pupukuk lain nai bafak ndia dalek.

²⁰ Bet-Peor, Lete Pisga huun-nala, ma Bet-Yesimot.

²¹ Basa boema, nai dalek boeo, hapu basa kota manai letelepak ndia, ma Sihon, fo leoina Amori-a manen-na, nusa paletan-nala lala'en-na, fo makahulun-na, nangatuuk neme Hesybon.

²² Nai leoina Israel-la taolisa hataholi-la dalek, hapu Bileam, fo Beor anan mananeuk ua-nalek ndia boe.

²³ Lee Yarden-na da'di leo Ruben nusan-na too muli. Kota-kota ma nggolo-nggolok sila-la, nde ala fen neu basa teidalek manai leo Ruben-na dalek, fo da'di sila dae pusakan.

Latu'du fe leo Gad-ta nusak-ka

²⁴ Dae fo Manetualain Ana helu fen neu hataholi Israel-la ndia, Musa fe seli neu teidalek manai leo Gad-ta dalek, fo da'di sila dae pusakan.

²⁵ Sila nusan-na, neni Yaezer ma basa kota manai Gilead-ta, boema seli neme leoina Amon-na nusan-na mai, losa leo Aroer fo nai Raba boboan dulu;

²⁶ nusak maneme Hesybon losa leo Ramat-Mizpa, ma Betonim, boema nusak maneme Mahanaim losa leo Lodebar dae toon-na neu; basa nusak sila-la lai dalek boe, fo soaneu leo Gad-ta.

²⁷ Nai Bafak Yarden-na, fo leo Gad-ta nusan ndia, neni Bet-Haram, Bet-Nimra, Sukot ma Zafon, fo nde bei ela Mane Sihon manai Hesybon-na, nusa paletan-na. Leo Gad-ta nusan ndia, too muli nde Lee Yarden-na, losa leo Dano Galilea nai boboak kii.

²⁸ Kota-kota ma nggolo-nggolok sila-la, nde ala fen neu basa teidalek manai leo Gad-ta dalek, fo da'di sila dae pusakan.

Latu'du fe leo Manasye seli, nusak manai Lee Yarden-na boboan dulu

²⁹ Dae fo Manetualain helu fen neu hataholi Israel-la ndia, de Musa fe basa seli neu teidalek manai leo Manasye seli dalek, fo da'di sila dae pusakan.

³⁰ Sila nusan-na, dae toon-na losa leo Mahanaim neu, fo Basan lala'en-na nai dalek, fo nde: Og, fo mane Basan-na nusan-na lala'en-na, ma Yair nggolo ka neehulun manai Basan nala boe.

³¹ Basa boema, nusa Gilead-ta seli, nai dalek boe, boema Asytarot ma Edrei, fo nde Mane Og-ka nai Basan, nusa paletan-na, popon duas. Ala fe la'iesak nusak ndia leo Mahir, fo Manasye anan-na, tititi-nonosin teidalen-nala.

³² Nai lelek Musa bei nai masadokek Moab-pa, ana baba'e tao leondiak, dae manai Yerikho boboan dulu, fo nai Lee Yarden-na selik.

³³ Tehu leo Lewi-a, ta hapu dae faa anak boen, neme Musa mai fa. Musa nafa'das nae, ana fe sila baba'en-na nde, tutunu-hohotuk fo nanatunu-hotuk soaneu Manetualain fo Israel Manetualain-na.