YOSUA 12 - Susula Malalaok Hehelu Palak Ma Hehelu Beuk

Musa sengi mane-manek-kala

¹ Nusak manai Yarden boboan dulu, neme Bafak Lee Arnon-na mai, de ana kae nakandoo leo Bafak Yarden-na neu, losa leo Lete Hermon-na, nai boboak kii, hataholi Israel-la loso-lan, de langatuu-lan so. Ala sengi manek dua.

² Esa na'de Sihon, fo mane Amori-a, nangatuuk nai Hesybon. Nusa paletan-na neni nusa Gilead-ta seli; fo nde neme Aroer (nai Bafak Arnon-na su'un-na) ma kota manai bafak ndia tala'daheon, losa leo Lee Yabok-ka, nai dae too leoina Amon-na nusan-na;

³ boeo neni Bafak Yarden-na boboan dulu, fo neme Dano Galilea leo kona neu, fo losa leo Bet-Yesimot (nai Tasi Mates-sa boboan dulu) soona nakandoo leo Lete Pisga huun-na neu.

⁴ Hataholi Israel-la sengi mane fe'ek-ka nde ia: Mane Og neme nusa Basan-na mai, nangatuuk nai Asytarot ma Edrei. Ela leoina Refaim hataholin-nala, esa nde ndia.

⁵ Nusa paletan-na, neni Lete Hermon, Salkha, ma Basan lala'en-na, losa leo nusa Gesur ma Maakha; boeo neni nusa Gilead-ta seli, losa leo Mane Sihon-na nusa paletan-na nai kota Hesybon-na.

⁶ Sila nde mane ka duak fo Musa sama-sama no hataholi Israel-la sengik-ka. Musa, fo Manetualain atan ndia, ana fe manek sila-la daen-na leo, leo Ruben, leo Gad ma basa leo Manasye lala'en-na neu, fo da'di sila dae pusakan.

Yosua sengi manek-kala

⁷ Yosua sama-sama no hataholi Israel-la sengi manek-kala nde, basa mane-manek manai nusak manai Lee Yarden-na boboan muli, fo neme Baal-Gad nai Bafak Libanon-na, losa leo Letelepa Na'u tak-ka, nai boboan kona, deka Edom. Yosua baba'e nusak ndia neu leoina Israel-la leon-nala, fo da'di sila dae pusakan.

⁸ Nusak ndia, neni nusak manai letelepan-na, nusa pupuku huuk-ka nai boboak muli, Bafak Yarden-na no nusa pupuku huun-na, nusa masakakalak-kala, nai boboak dulu, ma moo maloa, nai boboak kona. Nusa-nusak sila-la nde been-na, leoina Het, Amori, Kanaan, Feris, Hewi ma Yebus, mamana leleo palaan.

^9-24 Ala sengi manek-kala, basa-basan manek 31, fo nde: mane-manek-kala leme kota-la nde ia: Yerikho, Ai (deka no Betel), Yerusalem, Hebron, Yarmut, Lakhis, Eglon, Gezer, Debir, Geder, Horma, Arad, Libna, Adulam, Makeda, Betel, Tapuah, Hefer, Afek, Lasaron, Madon, Hazor, Zimron-Meron, Akhsaf, Taanakh, Megido, Kedes, Yokneam (nai Karmel), Dor (nai tasi su'un-na), Goyim (nai Galilea) ma Tirza.