YOSUA 10 - Susula Malalaok Hehelu Palak Ma Hehelu Beuk

Ala sengi hataholi Amori-la

¹ Adoni Zedek, fo mane Yerusalem-ma, namanene lae Yosua nagatuu-na, ma ana tao nakalulutuk la'iesak kota Ai-a, boema ana taonisa manen-na, sama leo ana tao basan neu Yerikho, ma manen-na. Boeo namanene lae hataholi Gibeon-nala, ala tao basa hehelu-balataa tia-laik loo hataholi Israel-la, ma ala leo sama-sama los so.

² Boema laun Yerusalem-mala bii lanseli, nana Gibeon nde been-na kota matuaina; matua-na sama no kota-kota fo nanuu manek, nakalenak matua lena kota Ai-a. Hataholin-nala boeo, palani ta'tibatu malela natee-natatik-kala.

³ Hu ndia de, Adoni-Zedek nadenu hataholi neni hala heheluk-ka nde ia, fe Mane Hoham-ma nai Hebron, Mane Piream-ma nai Yamut, Mane Yafia nai Lakhis, ma Mane Debir-ra nai Eglon. Hala heheluk-ka nae:

⁴ “Mai fali au, fo teu sapu-ta Gibeon, nana hataholin-nala tao basa hehelu-balataa tia-laik loo Yosua ma hataholi Israel-la so.”

⁵ Boema, Amori mane ka-5n sila, fo nde mane Yerusalem, Hebron, Yamut, Lakhis, ma Eglon lakabubua, boema loo basa solda'dun-nala lala'en-na, de leu lakahapi ma sapu-la Gibeon.

⁶ Boema, hataholi Gibeon-nala, haitua halak ia neu Yosua nai mamana ofun-na, nai Gilgal nae, “Boso po'ilotak ami mesam-ma, Tuan! Mai lai-lai, fo fali-ma ami, nana basa manek manai Amori-la, solda'dun-nala lakabubua basa, fo la'ban ami!”

⁷ Boema Yosua no la'iesak solda'dun-nala lala'en-na, ma solda'du neulaun-nala boe, de leu latee-lata'ti nai Gilgal.

⁸ Manetualain nafa'da Yosua nae, “Boso bii hataholi sila. Au fe basa sesengik-ka neu o so, hu ndia de, sila hataholin esa boen, ta hapu nakatatakak la'ban o fa.”

⁹ Le'odae boema, Yosua no solda'dun-nala mulai la'ok leme Gilgal leo Gibeon leu, boema ala sapu-la hataholi Gibeon-nala no kaiboik.

¹⁰ Manetualain taon-na hataholi Amori-la nggenge, nai lelek lita solda'du Israel-la. Ala taolisa hataholi Amori makadotok nai Gibeon, ma ala usi bei maso'dak-kala kona leo letek manai Bet-Horon-na huun-na, dodoon-na, losa leo Azeka ma Makeda, nai boboak kona.

¹¹ Nai lelek hataholi Amori-la bei loe letek ndia, nanahu lalai leme solda'du Israel-la mai boema, Manetualain fe u'da eis matuaina-la tu'da leme lalai mai de tuni-nalas, su'di enok-ka nanalun-na losa Azeka. U'da eis ndia tunenisa hataholi-la, de'u lena hataholi Israel-la taolisak-kala.

¹² Nai faik ndia, fo nai lelek Manetualain fe hataholi Israel-la sengi hataholi Amori-la, Yosua kokolak no Manetualain. Ma Yosua kokolak nai hataholi Israel-la matan nae, “Hai le'do-a nei! Mate'e nai lete Gibeon-na poin-na. Ma o, bulak-ka nei! Boso heok meme Bafak Ayalon-na lain mai.”

¹³ Boema le'do nate'e, ma bulak-ka ta heok, losa hataholi Israel-la sengi musun-nala. Manada'dik ndia, nanasulak nai Yasar Susulan dale. Fai katemak esa dalen-na, le'do nate'e nai lalai-a tala'da, de doon-na seli, besak-ka ana tenak.

¹⁴ Manada'di ndia, beita da'di nita fa, ma neukose nai faik esa, ana ta da'di sama leo faik ndia, fo nae Manetualain tunga hataholi daebafak-ka dale hihiin-na. Manetualain natee-nata'ti nok Israel!

¹⁵ Basa natee-natatik ndia boema, Yosua sama-sama no solda'dun-nala fali le'us leo mamana ofun-nala nai Gilgal.

Yosua ho'un-na mane Amori lima

¹⁶ Tehu, mane Amori ka limak sila lalai, de ala ke'ke leme leak esa dalek, nai Makeda.

¹⁷ Hataholi-la litas, boema lafa'da mamana ke'ken-na neu Yosua,

¹⁸ boema Yosua nae, “Loli batu matuaina-la leo leak ndia bafan-na neu, ma pe'da manamanea neu mamanak ndia,

¹⁹ tehu emi boso hahae meme ndia. Usi maheles, ma sapu-malas neme dea mai, fo boso po'ilotak-kasa, leu leo kotan-nala dalek leu! Emi Manetualaim-ma, fe emi sengis so.”

²⁰ Yosua ma hataholi Israel-la, taolisa hataholi Amori sila, tehu bei hapu nggelok lalai, fo leu sanga nasulu-nahapak nai sila kotan-na, nalosa ala ta taolisa fas.

²¹ Basa boema Yosua solda'dun-nala lala'en-na, ala fali leo Yosua nai mamana ofun-na nai Makeda. Ta hapu hataholi esa boen nai nusak ndia, napalani kokolak hata-hata soaneu la'ban hataholi Israel-la!

²² Basa ndia boema, Yosua nae, “Besak ia, soi heni leak ndia bafan-na, fo moo manek ka limak sila-la, leo ia mai.”

²³ Boema ala soi heni leak ndia, de ala loso mane Yerusalem, Hebron, Yarmut, Lakhis, ma Eglon leo deak mai,

²⁴ de loos leo Yosua neu. Boema Yosua naloo nakabubua basa hataholi Israel-la, de basa boema, ana paleta, fo ela basa malanga solda'du matuaina, fo manatunga natee-natatik-kala, loo Yosua heheta-aa'i manek sila botoliin-na. Basa malanga solda'du matuaina sila mai, de ala heheta-aa'i manek sila botoliin-na.

²⁵ Basa ndia boema Yosua nafa'da malanga solda'du matuainan-nala nae, “Dalem-mala boso ba'ihana ma bii. Ela leo been-na, emi mamahele ma mapalani, nana neukose, Manetualain tao emi musum-mala, enon-na leoiak.”

²⁶ Boema Yosua taonisa manek sila, de ana lona 5-s leu ai lolonak 5 lain. Ala po'ilotak popolan-nala leme ndia, losa le'donoso.

²⁷ Nai lelek, le'do-a tenak boema, no Yosua paletan-na, de lakona heni popolak sila, de ala tapas leo leak, fo na'kasa manek sila paken da'di mamana keke'ken-na dalek neu. Basa boema, ala loli batu matuaina-la neu leak ndia bafan-na. Losa besak ia, batu sila-la bei lai ndia.

Yosua nangatuun-na nusa Amori daen makadotok seluk

²⁸ Faik ndia Yosua neu sapun-na Makeda, de ana sengi kota ndia no manen-na. Ana taonisa la'iesak kota ndia laun-nala; ana ta po'ilotak hataholi esa boen, naso'da fa. Yosua tao mane Makeda, sama leo ana tao mane Yerikho-a.

²⁹ Basa ndia boema, Yosua no solda'dun-nala la'ok lakandoo, leme Makeda leo Libna leu, de ala sapu-la Libna.

³⁰ Manetualain boeo, Ana fe hataholi Israel-la, sengi kota ia no manen-na. Ala ta po'ilotak hataholi esa boen, naso'da fa; Ala taolisa la'iesak hataholi manai kota ndia. Yosua tao kota ndia manen-na, sama leo ana tao mane Yerikho-a.

³¹ Basa boema Yosua no solda'dun-nala la'ok lakandoo, leme Libna leo Lakhis leu. Lakahapi la kota ndia, boema leu sapu-lan.

³² Manetualain fe hataholi Israel-la, sengi Lakhis nai natee-natatik fai ka dua-na. Hata fo ala taon nai Libna, ala taon nai Lakhis boe; ala taolisa la'iesak-kasa, ala ta po'ilotak hataholi esa boen, naso'da fa.

³³ Horam, fo mane Gezer-ra, mai fali Lakhis, tehu Yosua sengin no solda'dun-nala; ala taolisa la'iesa kasa, de ta ela esa boen.

³⁴ Balahaa boema, Yosua no solda'dun-nala la'ok lakandoo leme Lakhis leo Eglon leu, boema lakahapi, ma sapu-la kota ndia.

³⁵ Nai faik ndia boe, langatuu-la Eglon, de ala taolisa la'iesak hataholi manai sila-la, sama leo ala taon nai Lakhis.

³⁶ Neme Eglon, Yosua no solda'dun-nala nda'e leo letelepak-ka leu, de leu leo kota Hebron-na leu, boema ala sapu-las,

³⁷ de langatuu-lan. Ala taolisa kota ndia manen-na, ma ala taolisa la'iesak hataholin-nala, ma hataholi manai kota-kota fe'ek manai titia-tatain-nala. Yosua tao nakalulutuk la'iesak kota ndia, sama leo ana taon neu kota Eglon-na. Ana ta po'ilotak hataholi esa boen, naso'da nai ndia fa.

³⁸ Basa ndia boema, Yosua no solda'dun-nala fali, de ala sapu-la Debir.

³⁹ Yosua loso-na kota ndia no manen-na, ma basa kota fe'ek manai titia-tatain-nala. Ana taonisa la'iesak hataholi manai sila-la. Yosua tao Debir no manen-na, sama leo ana tao Hebron ma Libna, boema manen-na.

⁴⁰ Yosua nangatuun-na kota ndia lala'en-na. Ana sengi basa manek manai nggolo leten-nala, nai pupukuhuk manai boboak dulu, nai letek-kala huun manai boboak muli, ma nai masadokek manai boboak kona. Ana ta po'ilotak hataholi esa boen, naso'da fa; Ana taonisa la'iesa kasa. Ndia nandaa no Manetualain fo Israel Manetualain paletan-na.

⁴¹ Yosua sengi nggolo-nggolok, fo neme Kades-Barnea nai boboak kona, losa leo Gaza, fo deka no nggolo tasi su'uk-ka, nai dalek hapu nusa Gosyen-na lala'en-na, losa leo Gibeon nai kii.

⁴² Ka'da nai natee-natatik la'iesa mesak-kana, de Yosua sengi basa manek sila-la, ma nangatuun-na, sila nusa paletan-nala, nanahu Manetualain fo Israel Manetualain na, natee-nata'ti soaneu Israel.

⁴³ Basa ndia boema, Yosua no solda'dun-nala fali le'us leo mamana ofun-nala nai Gilgal.