YOSUA 1 - Susula Malalaok Hehelu Palak Ma Hehelu Beuk

Manetualain nadenu Yosua, fo neu nangatuun-na Kanaan

¹ Mate basa Musa, fo Manetualain atan ndia boema, Manetualain kokolak no Musa limaboa konan-na, fo nde Yosua fo Nun anan-na.

² Manetualain nafa'da nae, “Mate Au atang Musa so. De besak ia, malole lenak, o ma hataholi Israel-la lala'en-na maheheleaom, fo lena leo Lee Yarden-na selik meu, fo masok leo nusak fo Au fen neu sila.

³ Au afa'da basa Musa ae, emi eim-ma ta'bula'e nusak-ka, Au fe basa neu o, Yosua, ma neu Au anang-ngala lala'en-na.

⁴ O nusam-ma, neukose ana betubala neme moo maloa manai kona, losa leo Letelepak Libanon-na nai kii, ma neme Lee Efrat matua ndia nai dulu, boema nakandoo, fo neni la'iesak leoina Het-ta nusan-na, losa Tasi Tala'dak nai muli.

⁵ Ta hapu hataholi esa boen, neukose bisa sengi o fa Yosua, nai o fai maso'dam-ma dalek. Nana neukose Au nai o boboam-ma tataas esa, sama leo makahulun-na, Au nai Musa boboan-na. Neukose, Au ta la'oela o fa.

⁶ Ela leo been-na, o mamahele ma mapalani, nana neukose o mauli-malanga leoina ia, nai lelek langatuu-la nusak fo Au helu basa, fen neu sila bei-ba'i kain-nala so.

⁷ Ka'da ela leo been-na, te'e-te'e o mamahele ma mapalani. O muse manea, fo ela o tunga la'iesak hoholo-lalanek, fo Musa Au atang ndia, ana fen neu o, o boso mafandele heni faa anak boen, soona neukose o hapu buna-boan.

⁸ O muse lees fe Au anang-ngala susula hoholo-lalanek ndia tataas esa. Manoli susulak ndia isi-liin lele'do-le'odaen, fo ela basa hata fo nanasulak nai dalek, o makalala'ok-kana tataas esa. Metema o tao basa sila-la soona, neukose o so'dam-ma tetu-temak, ma o ue-le'dim, neni buna-boak.

⁹ Mafandendelek, te Au paleta basa o, fo ela te'e-te'e o mamahele, ma mapalani! O boso bii-mamata'u, do pela-bale, nana Au, fo o Manetualaim-ma, nai o boboam-ma, nai lelek o muu leo su'di bee muu.”

Yosua fe hataholi Israel-la, paleta ma natutu'duk

¹⁰ Boema Yosua paleta hataholi Israel-la mauli-malangan-nala,

¹¹ fo ela ala la'ok okofefeo la'iesak hataholi Israel-la uman-nala, fo fes paleta nde ia nae, “Sadia tua-lepa, nanahu bei faik telu seluk bai soona, emi muse lena leo Lee Yarden-na selik meu, fo mangatuu-ma nusak fo emi Manetualaim-ma, fen neu emi.”

¹² Yosua nafa'da leo Ruben, Leo Gad, ma leo Manasye seli nae,

¹³ “Mafandendelek! Te Musa fo Manetualain atan ndia, nafa'da basa emi nae, emi Manetualaim-ma, Ana fe emi dae manai Lee Yarden-na boboan dulu, fo da'di emi nusam.

¹⁴ Basa emi sao-anam ma emi bana-manum-mala, bole leo lai ia, tehu emi hataholim manamatee-matatim-mala, muse laheheleaon soaneu latee-lata'ti, ma ala lena lakahuluk leo Lee Yarden-na selik leu.

¹⁵ Emi muse tulu-falis, losa langatuu-la dae manai Lee Yarden-na boboan muli ia, dae fo emi Manetualaim-ma, fen neu sila. Metema Manetualain fe basa leoina Israel-la lala'en-na laso'da no nee-nee lino-linok soona, besak-ka emi bole fali me'um-ma leo emi daem manai Lee Yarden-na boboan dulu ia, fo Musa Manetualain atan ndia ana fen neu emi.”

¹⁶ Boema leo Ruben, Gad ma leo Manasye seli sila-la lataa lae, “Leomae o paleta ami tao beek ndia boeo, neukose ami taon, ma o madenu ami meu leo su'di bee meu boeo, neukose ami meu.

¹⁷ Neukose ami tunga o, sama-na leo, ami boeo tunga Musa tataas esa. Sa'di leo been-na, emi Manetualaim-ma, nai o boboam-ma, sama leo nai Musa boboan-na!

¹⁸ Basa hataholi, fo ana ta nau nakatele neu o koasam-ma, do ana ta nau tunga o paletam-ma fa soona, neukose nanahukunisak. Ela leo been-na, o mamahele, ma mapalani!”