YOEL 1 - Susula Malalaok Hehelu Palak Ma Hehelu Beuk

¹ Manetualain hala hehelun-na neu Yoel, fo Petuel anan-na, nae leo ia.

Hataholi Israel-la dalen-nala he'dis-sa, nanahu lamak-kala la'a heni tinan-nala buna-boan

² Mamanene leon, hai lasi-lasi kala lemin; taoafik leon, basa hataholi manai Yehuda-la lemin. Manada'dik leo ia-ka, ana da'di hai nai emi tepo-lelem-ma do nai emi bei-ba'i kaim-mala, tepo-lelen-na so do beik?

³ Tui manada'dik ndia neu emi ana mala; fo ela landuku-lalosak tutuik ndia neu sila anan-nala. Bobongi makabuik-kala muse lamanenen boe, fo landuku-lalosak-kana neu bobongi manamaik-ka.

⁴ Lama bubuak fo ta leke-nala dede'un-na fa, ala tai lai tina-la, fo la'a heni buna-boan. Lama bubuak ia na'a ela beek soona, lama bubua fe'ek-kala la'a heni seluk-kasa.

⁵ Hai basa manamafuk-kala lemin, fo'a leona! Hai maninuk-kala lemin, kii leona! Nana angol beuk-ka ala loso-lan neme o bafam-ma mai so.

⁶ Lamak bubua ina esa, sapu-la ita nusan-na. Lamak sila mabe'i-balakaik, ma ta tafa'da-tala dede'un-nala fa, nisin-nala tanen-na leo singa ina nolin-na.

⁷ Ala taolisa ita ai angol-la, ma ita ai kaan-nala, ela ka'da huun-na. Ala sii heni, ndanan-nala loun-na, nalosa ndanan-nala da'di fulak.

⁸ Kii leon, hai hataholi-la lemin, sama leo anafe'oana manasusak, fo ana kii-makaleleu tonanga susuen-na, mamaten-na.

⁹ Mopo gandum ma angol-la neme Manetualain Uman dale mai so. Boema imam-imam fo manalilineka lalalau-laoono Manetualain ala falu.

¹⁰ Tina-la belutu so. Dae-a falu, nana mate basa gandum lala'en-na, angol-la boan-na lamatuu, ma basa mina setun-nala.

¹¹ Hai hataholi manatao tina-osi-la lemin, makaleleu leo na! Hai manamanea osi angol-la lemin, kii leona. Nana gandum, jelei, ma keketu-kokoluk lala'en-na mate basas.

¹² Ai maboak manai mook-kala basa-basas lamatuu: ai angol, apel, kaak, kurma, ma dalima. Boema laun-na boeo ta lamahoko so'on.

¹³ Hai basa imam fo nalalau-naoono nai mei tunu-hotuk-ka, pake lafa kalong, da'di neu ta'du-tana fafaluk, fo kii leona. Masok leo Manetualain Uman dale meu, fo kii-makaleleu le'odaek esa, nana ta hapu tunu-hotu angol ma gandum ba'eneu o Manetualaim fa.

¹⁴ Paleta basa hataholi-lala'en-na, fo ala oka aon-nala, po'a-bengas, nakabubua matuaina! Ka'i basa mauli-malangan-nala ma lasi-lasik-kala boema basa Yehuda laun-nala lala'en-na, fo daenga ala mai leo Manetualain Uman mai, fo laloo beebou loke tutulu-fafalik neun.

¹⁵ Manetualain fain-na deka so, faik fo neni bibii-namata'uk; faik Fo Manakoasa fe nakalulutuk-ka mai.

¹⁶ Nana'ak-ka basan ma mopok-kana nai ita matan, nai ita Manetualain Uman ta hapu eeki-natadalek so'on.

¹⁷ Mate bini-ngges nai dae tokotik-ka. Ta hapu pe'da gandum fa, boema soka-la louk, de ala da'di sosonga madoudouk.

¹⁸ Bana-manu lakadii-lakau ma hela hae, nana ta hapu moo mana'uk fo la'a so'on. Bi'ilopo-la boeo, bendole-bendaku.

¹⁹ Au oke tutulu-fafalik neu O, ou Manetualain nana moo mana'uk-kala lamatuu de mate na'un-nala, ai-la boeo, leondiak nono'kabai ha'i na'ak-kala.

²⁰ Lena-lenak bana fuik manai nula dale-la laloo bebou neu O loke tulu-falik. Ala ta hapu linu lakabete fa, nana ma'da la'iesak lee-la.