YESKIAL 9 - Susula Malalaok Hehelu Palak Ma Hehelu Beuk

Yerusalem nanahukuk

¹ Basa boema, au amanene Manetualain naloo bou-bou nae, “Mai leo ia mai leona, hai hataholi-hataholi fo, neukose lakalala'ok Au huhukung-nga neu kota ia. Ho'i meni emi tafa-sisilom.”

² Tutik-ka, hataholi nee, ala to'da liik esa leme deak mai, fo leme Manetualain Uman-na, lelesuinan Kii mai; basa-basas leni tafa-sisilo. Ala mai sama-sama loo hataholi esa, ana pake tema abalutu, neni buku enge. Leu leo dalek leu, de lapadeik deka loo mei tutunu-hohotu liti-a.

³ Boema mandela-masa'ak fo, manada'di ta'du-tana neu Israel Manetualain mamain-na, nasalaa neme mahahaek sila-la mai, boema ana lali neme mamana makasososan ndia mai, de neu leo lelesu masok leo Manetualain Uman dale neu. Boema Manetualain naloo hataholi manapake tema abalutu ndia nae,

⁴ “Muu leo kota bu'un lalaena muu, fo tao ta'du neu hataholi manadale he'dik-kala, ma manasusak-kala dedein-nala, hu kande basa tatao-nono'ik nanamauluak-kala nanatao-no'ik nai kota ia dalek.”

⁵ Au amanene Manetualain nafa'da hataholi fe'ek-kala nae, “Tunga hataholi ndia, leo basa kota bu'u-bu'un-nala neu, fo taomisa basa hataholi-la; boso fe do'o do ampon neus.

⁶ Taomisa la'iesak touk-kala, inak-kala, lasik ma mulik, inalasik, toulasik ma ni'iana Tehu hataholi manapake ta'du-tana nai dedein-na, boso koila'e esa boen. Mulain neme ia mai leona, neme Au Umang ia mai.” Boema, ala mulai lakalala'ok sila bela-ba'un, nenik ala taolisa basa mauli-malangan fo, manamapadeik manai Manetualain Uman-na.

⁷ Boema Manetualain nafa'das nae, “Tao manggenggeo Au Umang ia leona! Tao mahenu uma so'dan-nala nenik mamates. Tao leona!” Boema ala taolisa hataholi manai kota dale-la.

⁸ Ala do'do-pau hataholi sila-la te, au mesang-nga nai ndia. Au senek, de au aloo bou-bou ae, “Manetualain Fo Mademaina, ade O nasa-melum leondiak ba'eneu Yerusalem, nalosa O sanga taomisa la'iesak hataholi bei maso'dak manai Israel ia do?”

⁹ Boema, Manetualain nataa nae, “Hataholi Israel-la, ma hataholi Yehuda-la, ala tao basa sala-singok matuaina so. Ala tao kanisak nai basa mamanak lala'en-na, ma ala tao langgenggeo Yerusalem nenik tatao-nono'i managalauk-kala. Ala lafa'da lae Au, fo Manetualain, la'oela nusak ia so, nalosa Au ta hapu ita sila tatao-nono'in fa.

¹⁰ Neukose, Au ta sue-lai fas. Hata fo sila taon neu hataholi fe'ek-kala, neukose, Au taon neu sila boe.”

¹¹ Basa boema, hataholi manapake tema abalutu ndia, ana fali ma'in, de nafa'da Manetualain nae, “Au akalala'ok basa, Manetualain paletan lala'en-na so.”