YESKIAL 8 - Susula Malalaok Hehelu Palak Ma Hehelu Beuk

YESKIAL HAPU NINITAK KA DUA LA'ENEU MANETUALAIN 8:1–10:22 Sosongo-tatangok nai Yerusalem

¹ Nai hataholi Yahudi-la bula ka nee-a, fain lima, fo nai tepo-lelek ami nanatu'u-tapak leo mamana tu'u-tapak, teu ka neen-na, boema hataholi Yehuda nanatu'u-tapak-kala, mauli-malangan-nala, ala mai leo au umang mai, de ami mangatuuk sama-sama. Boema, no kaiboik, Manetualain Fo Mademaina koasan-na, ana koasa-na au.

² Au anganalo leo lain neu, de au ita hatak esa, lupan-na leo hataholi daebafak-ka. Meten neme tala'dan-na leo dae neu soona, sama leo ha'i-a, ma neme tala'dan-na leo lain neu soona, mangadilak sama leo liti nanalosek-ka.

³ Ana look hatak esa mai, lupan-na sama leo limak-ka, boema Ana lu'i au langadoong-nga. Basa boema, nai ninitak ndia dalek, Manetualain Duladalen-na, ana so'u namadema au leo lalai neu, de noo au leo Manetualain Uman-na nai Yerusalem, fo leo lelesu masok leo uma so'dan manai dalek-ka neu; lelesu ndia, nasale leo kii neu. Nai ndia, hapu dodoki-dudula sosongo-tatangok fo manatao nafo'a Manetualain nasa melun-na.

⁴ Boema au ita mangale'dok fo, manada'di ta'du-tana neu Israel Manetualain mamain-na, sama leo au itan nai lelek au eme Lee Kebar-ra su'un-na.

⁵ Manetualain nafa'da au nae, “Hai hataholi daebafak fo, manasapu-manalalok-konei, mete leo kii neu.” Au tunga, de nai mei tunu-hotuk-ka boboan fo, manadeka no enok masok leo dalek neu-a, au ita sosongo-tatangok fo, manatao nafo'a Manetualain nasa-melun-na nai ndia.

⁶ Boema, Manetualain nafa'da au nae, “Hai hataholi daebafak fo, manasapu-manalalok-konei, O mita beek ana da'di so? Taoafik neu hataholi Israel-la, ala tao tatao-nono'i nanamaluak-ka, fo ela Au dook-ka eme Au Umang-nga mai! Mai fo, Au atu'du o, tatao-nono'ik-kala, ta kandaak lena seluk bai.”

⁷ Boema, noo au leo lelesu masok leo uma so'dan deak-ka neu, de natu'du au, bolok esa nai papala nanadamak-ka.

⁸ Nafa'da au nae, “Hai hataholi daebafak fo, manasapu-manalalok-konei, tao mamaloa bolok ia.” Au tao amaloa basan boema, au ita lelesu esa.

⁹ Nafa'da au nae, “Muu leo dalek muu, fo mete ala tao tatao-nono'i ta kandaak-kala, ma nanamaluak-ka nai ndia.”

¹⁰ Tutik-ka, au u leo dalek u de au mete. Boema au ita bana manalo'do-laek mata-matak-kala, bana fe'e-fe'ek fo nanamaluak-kala, ma leoina Israel-la sosongon-tatangon-nala, nanadokik nai papala-la.

¹¹ Leoina Israel-la, mauli-malangan ka hituhulun-nala lai ndia, ma Yaazanya, fo Safan anan-na, nai dalek boe. Sila esan-na, ana ho'u mamana tutunu boomenik esa, de boomenik-ka masu-masu.

¹² Manetualain nafa'da au nae, “Hai hataholi daebafak fo, manasapu-manalalok-konei, o mita basa mauli-malangan Israel-la, no denge-dengek, ala tao beek ndia? Ala tao makaluku-makatele nai mamanak fo henuk no sosongo-tatangok-ka, boema lafa'da lae Au la'oela nusak ia so, de Au ta ita sila tatao-nono'in ndia fa.”

¹³ Boema Manetualain nafa'da au nae, “Neukose o mita, ala tao tatao-nono'ik fo nanamaluak lena seluk bai.”

¹⁴ Boema, noo au leo Manetualain Uman-na lelesuinan kii neu, de natu'du au, inak-kala kii-makaleleu Lamatua daebafa Tamus-sa mamaten-na.

¹⁵ Manetualain natane au nae, “Hai hataholi daebafak fo, manasapu-manalalok-konei, o mita ala tao beek ndia? Bei hapu tatao-nono'i nanamaluak, makadotok seluk bai.”

¹⁶ Boema, noo au leo Manetualain Uman-na, so'dan manai dalek-ka. Nai deka no lelesu masok leo kama malalao-malalafuk-ka neu, fo nai mei tunu-hotuk-ka no mangalolok-ka tala'da, hapu hataholi duahulu lima lai ndia. Langatuuk lasadea kama malalao-malalafuk-ka, de lasale leo dulu leu, fo ala sene-do'ok neu le'do-a.

¹⁷ Manetualain nafa'da au nae, “Hai hataholi daebafak fo, manasapu-manalalok-konei, o mita ndia do ta? Hataholi Yehuda ia-la, lame'da beita dai fa, metema ala tao ka'da tatao-nono'ik nanamaluak ndia mesak-kana, ma ala tao tatao-nono'i ta kandaak-kala, nai nusak ia lala'en-na. Nakalenak bai, ala tao-no'i basa sila-la, nai mamanak ia, fo nai Au Umang dale, de ala tao-la Au, amanasa ba'uk-ka seluk bai. Mitak, ala lakamumulu-lakamamaek Au nenik tatao-nono'ik fo, ta kandaak nanseli ia fa.

¹⁸ Neukose, ala lame'da lita, Au nasa-melung matuainang-nga! Neukose, Au ta fes do'o do ampon fa. Leomae ala nggasi, fo besak-ka ala hule-haladoi neu Au boe, Au ta nau amanene sila hule-haladoin ndia fa.”