YESKIAL 45 - Susula Malalaok Hehelu Palak Ma Hehelu Beuk

Nai nusa-nusak-kala, hapu dae dui hehelik soaneu Manetualain

¹ Lelek fo, dae ndia beita nanababa'ek neu leo-la esa-esak, fo da'di sila dae pusakan, muse duiheni duduik esa soaneu Manetualain. Dae ndia nanalun-na, muse kilo sanahulu dua, metel lima, ma loloan-na, kilo sanahulu. Dae ndia basa-basan lala'en-na, malalao-malalafuk.

² Muse uku-na, dae duduik esa neme dae ndia mai, fo sadian soaneu nafofo'a Manetualain Uman-na. Dae ndia balakak, de boboan esa-na, nanalun-na metel duahulu lima, ma mook okofefeon, de mook ndia loloan-na, metel duahulu lima, fo mafofo'a Manetualain Uman-na neu mook ndia.

³ Dae ndia seli, fo nalun-na kilo sanahulu dua seselik, ma loan-na, kilo lima, muse sadian soaneu nafofo'a Manetualain Uman-na, fo mamanak ndia, mamana malalao-malalafuk nanseli.

⁴ Dae ndia malalao-malalafuk, de sadia fe seli neu basa imam fo, manatao mamasok nai Manetualain Uman-na. Tao fe imam-mala uma neu, dae ndia seli, ma tao Manetualain Uman-na neu seli.

⁵ Dae ndia seli seluk, muse sadia fen neu hataholi Lewi fo laue-lale'di lai Manetualain Uman-na. Dae ndia nalun-na, kilo sanahulu dua, metel lima, ma loan-na kilo lima. Neukose lapadedeik kota-la lai ndia, fo ala leo leme ndia.

⁶ Muse dui fe'e dae duduik esa, nalun-na kilo sanahulu dua seselik, ma loan-na, kilo dua seselik, nai dae malalao-malalafuk ndia boboan-na, soaneu tao kota esa neu ndia, fo su'di hataholi see fo, neme leoina Israel-la mai, ana bole leo nai kota ndia.

Dae baba'ek soaneu manapaleta

⁷ Muse sadia fe manapaleta, dae boe. Ba'e fes dae fo, natabaa neme Manetualain daen-na, too muli, losa Tasi Tala'dak, ma neme Manetualain daen-na too dulu, losa nusak ndia dae toon dulu. Da'di, dae ndia no leo-leo Israel-la dae baba'en-na, beke nanaluk.

⁸ Dae ndia, ana da'di manapaleta manai Israel-la, pusakan, fo ela ala boso tuni-ndeni seluk Au anang-ngala, te ala fe dae lenak ndia neu leo-leo Israel-la, fo ala taon da'di sila pusakan.

Manapaleta bela-ba'un

⁹ Manetualain Fo Mademaina, nafa'da nae, “Hai manakoasa Israel-la lemin, emi sala-singom-mala dai so. Hahae tuni-ndeni laun-na leona. Tao-no'i hata fo, ndoos ma tunga matetun-na. Boso boe usiheni Au anang-ngala, leme sila daen dale mai. Au, Manetualain Fo Mademaina, fe paleta ndia neu emi.

¹⁰ Pake tatais matetuk.

¹¹ Metema emi uku hata esa tuuk soona efa esa, isin-na sama no bat esa, metema hata ndia oek. Muse pake homer esa, da'di uuku-susu'dik. Da'di, uuku-susu'dik ndia, muse leo iak: homer esa soona, sama no efa sanahulu, ma sama no bat sanahulu.

¹² Emi tataim-ma, muse leo iak: syikal esa soona, sama no gera duahulu mina esa soona, sama no syikal neehulu

^13-15 Tunu-hotu hehelik fo, emi muse tunu-hotuk-ka nde ia: gandum: balek natun esa soona, fe balek nee yelei: balek natun esa soona, fe balek nee mina setun: boto natun esa soona, fe boto esa. (Ukun tunga uuku bat: fo bat sanahulu soona, homer esa, sama no kor esa) bi'ilopo: bi'ilopo natun dua soona, fe bi'ilopo esa. Emi muse tunu-hotu, tutunu-hohotu gandum, tutunu-hohotu nanatunuk, ma tutunu-hohotu mole-dame, fo ela emi sala-singom, hapu do'o do ampon. Au, Manetualain Fo Mademaina, nde fe paleta sila-la.

¹⁶ Basa nusak-ka laun-nala lala'en-na, muse leni tutunu-hohotuk sila-la, leo manapaleta manai Israel-la neu.

¹⁷ Ndia nde, muse asa bana-manu soaneu tutunu-hohotu nanatunuk, tutunu-hohotu gandum, tutunu-hohotu angol, ba'eneu basa leoina Israel-la lala'en-na, nai fai malole-la, Feta Bula Beuk, fai Sabat-tala, ma fai malole fe'e-fe'ek-kala. Ndia muse sadia tutunu-hohotuk fo, sala-singok hapu do'o do ampon, tutunu-hohotu gandum, tutunu-hohotu nanatunuk, ma tutunu-hohotu mole-dame, soaneu noke do'o do ampon ba'eneu leoina Israel-la.”

Fai malole-la

¹⁸ Manetualain Fo Mademaina, nafa'da anan-nala nae, “Nai hataholi Yahudi-la, bula ka esan-na, fain esa soona, emi muse tao malalao-malalafu Au Umang-nga, nenik tunu-hotu sapi maneanak esa, ta lu'u-la'ak fa.

¹⁹ Imam-ma, muse ho'i-na, bana tutunu-hohotuk fo, sala-singok hapu do'o do ampon ndia, daan-na, fo ana losen neu Au Umang-nga dii lelesun-nala, ma neu mei tunu-hotuk-ka, bu'un haas, ma neu lelesuina fo, manai uma so'dan manai dalek-ka, dii lelesun-nala boe.

²⁰ Nai bulak ndia, fain hitu soona, tao leondiak boe, soaneu basa hataholi fo, ta name'da, do ana ta bubuluk fa te, ana tao sala-singok so. No enok ndia, neukose emi manea Au Umang-nga, malalao-malalafun.

²¹ Nai hataholi Yahudi-la, bula ka esan-na, fain sanahulu haa soona, emi muse tao Feta Paskah. Hataholi-la, ta bole la'a loti fo, ta kamen pake laluteik, faik hitu dalen-na.

²² Nai fai makasososan-na, manapaleta, muse tunu-hotu sapi mane esa, soaneu tutunu-hohotuk fo, sala-singok hapu do'o do ampon, ba'eneu ndia, ma ba'eneu basa laun-na lala'en-na.

²³ Nai lelek, feta fai ka hituk ndia, beita basa fan, tunga faik, ana muse tunu-hotu fe Manetualain, sapi mane hitu, ma bi'ilopo mane hitu, ta lu'u-la'ak-kala fa, fo ana tunu katemak-kasa. Tunga faik, ana muse tunu-hotu bi'ihii mane esa boe, soaneu tutunu-hohotuk fo, sala-singok hapu do'o do ampon.

²⁴ Fe'ek neme basa sila-la mai, muse tunu-hotu gandum litel sanahulu hitu seselik, soaneu sapi mane esa, boema mina setun litel telu, soaneu bi'ilopo mane esa.

²⁵ Nai Feta Lalaa Akidook fo, ana mulai nai hataholi Yahudi-la, bula ka hitun-na, fain sanahulu ndia, nai faik hitu dalen-na, tunga faik, manapaleta muse tunu-hotu, tutunu-hohotuk matak esa, fo nde tutunu-hohotuk fo, sala-singok hapu do'o do ampon, tutunu-hohotu nanatunuk, ma tutunu-hohotu gandum, boema mina setun.”