YESKIAL 44 - Susula Malalaok Hehelu Palak Ma Hehelu Beuk

Lelesuina dulu nanakenak

¹ Basa boema, touk ndia ho'u-na au limang-nga, de ana hela au leo lelesuina deak-ka, fo nai Manetualain Uman-na, daen boboan dulu. Lelesuina ndia, nanakenak,

² de Manetualain nafa'da au nae, “Lelesuina ia, muse nanakenak nahele, fo ta bole soi fan. Ta hapu hataholi esa boen, bole masok tunga ndia fa, nana Au, fo Israel Aman Manetualain, masok basa leo Au Umang dale, tunga lelesuina ia so. Da'di, lelesuina ia, muse nanakenak nahele.

³ Tehu manakoasa fo, manaho'u paleta-la, bole leu leo lelesuina ndia leu, fo la'a nana'a malalao-malalafuk-ka, nai Au matang. Sila muse masok tunga kama matuaina, ma ala fali tunga, enok ndia boe.”

Hapu loak, soaneu masok Manetualain Uman-na

⁴ Basa boema, touk ndia noo au leo lelesuina kii, fo nasasalematak no Manetualain Uman-na. Au taoafik matalololen boema, au ita Manetualain mandela-masa'an poti-na Manetualain Uman-na, fo da'di ta'du-tana nae, Manetualain nai ndia. Boema au bala uu de, au sene-do'ok,

⁵ boema Manetualain nafa'da au nae, “Hai hataholi daebafak fo, manasapu-manalalok-konei, taoafik matalolole, hata fo o mitan, ma o mamanenen. Neukose Au afa'da o, basa nakanenetek ma hoholo-lalanek lalaena, la'eneu Au Umang ia. Sulak matalolole, see-see fo, ana hapu loak masok Au Umang-nga, ma see-see fo, ta bole masok Au Umang-nga fa.

⁶ Mafa'da hataholi Israel fo, ala hii ka'da lalenalanga-lasa'basoo ndia, mae Au, Manetualain Fo Mademaina, ta nau po'ilotak sila, tao tatao-nono'i manggenggeok so'on.

⁷ Ala tao langgenggeo Au Umang-nga so, nana ala tunu-hotu fe Au, tutunu-hohotuk minan-na, ma daan-na, ma ala fe loak neu hataholi nusa dea fo, nanasunat beitak-kala, ma ala ta nau tunga neu Au fa, ala bole masok leo dalek leu. No sila tatao-nono'in fo, nanamaluak ndia de, ala la'olena Au hehelu-balataang no sila so.

⁸ Ta ka'da sila mesak-kasa, nde tao feta malalao-malalafuk-ka nai Au Umang fa, te ala fe hataholi nusa dea-la bela-ba'uk soaneu ala tao-no'in.

⁹ Au, Manetualain Fo Mademaina po'a-benga, ae hataholi nusa dea fo, nanasunat beitak-kala, ma hataholi fo, ana tunga neu Au fa, ta bole masok Au Umang-nga fa. Nakanenetek ndia, la'e hataholi nusa dea fo, ala leo lahele lai, leoina Israel-la tala'da heon-na boe.”

Hataholi Lewi-la, nanakalua henik leme bela-ba'uk imam-ma mai

¹⁰ Manetualain nafa'da au nae, “Neukose, Au huku hataholi Lewi-la, sama-sama loo hataholi Israel fe'ek fo, manala'oela Au, ma manasene-do'ok neu sosongo-tatangok-kala.

¹¹ Sila bole lalalau-laoono nai Au Umang dale, ka'da da'di leo hataholi mana'a ngga'di, ma manamanea lelesuina. Sila bole do'do bana-manu, soaneu tutunu-hohotu nanatunuk, ma tunu-hotuk, ma sila hapu bela-ba'uk, soaneu lalalau-laoono salanik-kala.

¹² Tehu, hu kande ala tao feta fo, sene-do'ok neu sosongo-tatangok, soaneu leoina Israel-la, de no enok ndia, ala loso leoina Israel-la, leo sala-singok dale leu, de Au, Manetualain Fo Mademaina soo, ae sila muse nanahukuk.

¹³ Sila ta bole lalalau-laoono seluk Au, da'di leo imam, do ala koila'e hata fo, malalao-malalafuk ba'eneu Au, do ala masok leo Mamanak Fo Malalao-malalafuk nanseli-a, dalek leu fa. Sila tao, tatao-nono'i manggenggeok-ka, huhukun-na nde ndia.

¹⁴ Besak ia, Au fes bela-ba'uk, fo ala tao tatao-nono'i belak fo, palu nanatao-no'ik nai Au Umang-nga.”

Basa imam-mala

¹⁵ Manetualain Fo Mademaina, nafa'da nae, “Nai lelek Leoina Israel-la, ala la'oela Au, imam Lewi-la leme Zadok tititi-nonosin-nala mai, lalalau-laoono lahele Au no lilinekak, nai Au Umang. Hu ndia de, besak ia, sila nde muse lalalau-laoono Au, ma ala mai leo Au matang mai, fo ala tunu-hotu, tutunu-hohotuk-kala minan-na, ma daan-na.

¹⁶ Ka'da sila mesak-kasa nde, bole masok leo Au Umang dale mai, lalalau-laoono Au nai Au mei tunu-hotung-nga, ma ala tao mamasok nai Au Umang.

¹⁷ Nai lelek, ala masok leo lelesuina, manaleo uma so'dan manai dalek-ka leu, ala muse pake bua papakek-ka, neme tema abalutu mai. Ala ta bole pake, bua papakek neme temak bi'ibulu mai, metema ala bei lalalau-laoono lai, uma so'dan manai dalek-ka, do lai Au Umang dale.

¹⁸ Sila muse pake lopo tema abalutu, ma ta pake kalikee, ma papa'a langak neme tema abalutu mai, fo ela ala boso makadese, ma ala puse.

¹⁹ Metema, leu leo uma so'dan manai deak-ka, fo nai bee, laun-nala lakabubua soona, imam-mala, muse ala la'oela sila bua papake imam-ma, nai kama malalao-malalafuk manai Au Umang dale, fo ala pake bua papake fe'ek, fo ela bua papake hehelik ndia, boso neni soe fe laun-na.

²⁰ Basa imam-mala, ta bole nggeupolik langadoon-nala fa, do ala po'ilotak langadoon-nala lamanalu. Muse nggute keke'u langadook ndia, nandaa no nakanenetek fo, nananaketu basak-ka so.

²¹ Metema, ala sanga masok leo, uma so'dan manai dalek-ka leu soona, ta bole linu angol fa.

²² Basa imam-mala, ala bole sao ka'da anafe'oana Israel fo, bei matatema, do inafalu fo, imam-ma mate la'oelan. Sila ta bole sao, ina maela saok fa.

²³ Basa imam-mala, muse lanoli Au anang-ngala, soaneu ala bisa mete lalelak, beek-kande nanafe hehelik neu Au, ma beek-kande ta, beek-kande balisi, tunga agama, ma beek-kande manggenggeok.

²⁴ Nai dede'ak esa dalek, sila muse fe nakeketuk, da'di leo manakee-manafula, ma sila muse laketun tunga Au nakaneneteng-ngala; sila muse ho'u lahele Au hoholo-lalaneng, ma Au nakeketung-ngala, nai Au fai maloleng-ngala, ma ala tao lalalao-lalafu Au fai Sabat-ta.

²⁵ Imam esa, ana ta bole tao nanggenggeo aoinan-na, nenik ana koila'e mamates, ta'da fe'e, mamatesa ndia, ndia ina-aman, ndia anan, ndia tolanoo toun, do tolanoo inan fo ana beita saoana fa.

²⁶ Metema, aoinan-na balisi falik soona, ana muse nahani seluk, faik hitu,

²⁷ soona neu leo Au Umang-nga, so'dan manai dalek-ka neu, fo ana tunu-hotu tutunu-hohotuk, soaneu ana tao nalalao aoinan-na, fo ela ana bole nalalau-naoono seluk, nai Au Umang. Au, Manetualain Fo Mademaina, nde manakokolak-ka.

²⁸ Basa imam-mala, ala sipo kandela nangatutuuk imam ndia, da'di leo sila baba'en-na, neme hata fo Au fen neu Israel no tititi-nonosin-nala. Sila ta bole hapu hata esa boen nai Israel fa. Nana sila hata-heton nde, Au.

²⁹ Sila muse laso'da leme tutunu-hohotu gandum, tutunu-hohotuk fo, sala-singok hapu do'o do ampon, ma tutunu-hohotu bae huta-bu'uk-ka mai; basa hata lala'en fo, nanafe hehelik neu Au, muse fes leo sila neu.

³⁰ Muse fe basa imam-mala, baba'ek neme basa boa sosak malole lala'en-na mai, ma neme su'di beek fo, nanatunu-hotuk soaneu Au. Nai lelek fo, leoina Israel-la tao loti, soona loti makasososak-ka nde been-na, basa imam-mala nuun ndia Soona neukose, Au fe baba'e-papalak neu leoina Israel-la, uma-loon-nala.

³¹ Manupui mates, ma bana mates, do bana makaak-kala, ala kaa lisan soona, basa imam-mala, ta bole la'a paa ndia fa.”