YESKIAL 42 - Susula Malalaok Hehelu Palak Ma Hehelu Beuk

Uma dua deka loo Manetualain Uman-na

¹ Basa boema, touk ndia noo au leo uma so'dan manai deak-ka neu, de ana ho'u-na au limang-nga, boema ana hela no au leo uma nggelok, lai Manetualain Uman-na, boboan kii neu, fo ta dook-ka neme uma matuaina manai, Manetualain Uman-na boboan muli.

² Uma ndia nalun-na, metel limahulu, ma loan-na, metel duahulu lima.

³ Uma ndia, boboan esa nasale leo, uma fo loan-na, metel sanahulu ndia neu, ma boboan esa, nasale leo uma late batu neu, fo nai uma so'dan manai deak-ka. Uma ndia ta'dak telu; fo ta'dan-nala, ta lakatetepak loo ta'dak manai dae-la fa.

⁴ Nai kama sila-la uluk, fo nai dalek, hapu mangalolok, fo loan-na, metel lima, ma nalun-na, metel limahulu. Lelesun-nala, lasale leo kii leu.

⁵ Kama manai ta'dak lain-nala, makabi'ak lena neme kama manai, ta'dak dae-la, nana mangalolok nai kama manai lain-nala matan-na ndia, loa lena kama manai dae-la.

⁶ Kama sila-la ta'dak beke teluk, ma dii manatia-toban ta, sama leo uma manai uma so'dan-nala.

^7-8 Ta'dak nggelok lai dae, nanalun-na metel duahulu lima, lalupa ka'da papala nanadamak mesak-kana, tehu ta'dak nggelok, fo nanalun-na metel duahulu lima boe, ala tao kama-la lai ndia. Nai ta'dak manai poi mate'en-na, hapu kama ndolo uma ndia nanalun-na.

^9-10 Nai kama manai uma ndia pe'dan dulu, nisi daen-na, fo nai papala nanadamak-ka huun-na, hapu lelesu esa nai ndia, fo ana leo uma so'dan manai deak-ka neu. Nai Manetualain Uman-na, boboan kona, hapu uma-la lai ndia, matak esa, fo ta dook-ka leme uma manai boboak muli mai.

¹¹ Nai kaman-nala matan-na, hapu mangalolok fo, sama-na leo mangalolok manai boboan kii. Uuku-dodoun sama, kama-la lupak esa, lelesun-nala boeo sama.

¹² Nai kama kona-la nisi daen-na, nai pe'dan dulu, fo nai papala nanadamak-ka huun-na, lelesu esa nai ndia boe.

¹³ Touk ndia, nafa'da au nae, “Uma ka duak sila-la, uma malalao-malalafuk. Imam-mala bole lasasalematak loo Manetualain nai ndia, fo la'a tutunu-hohotu malalao-malalafuk-kala, fonde tutunu-hohotu gandum, tutunu-hohotuk fo, sala-singok hapu do'o do ampon, do tutunu-hohotu bae hutak.

¹⁴ Metema, imam-mala lalalau-laoono basa nai, Manetualain Uman, fo ala sanga leu leo uma so'dan manai deak-ka, soona muse ala la'oela sila bua papaken fo, ala paken nai lelek ala tao makaluku-makatele-a, nai kama sila-la dalek. Muse ala pake, bua papake fe'ek, basa ndia soona, besak-ka leu leo mamanak fo, laun-nala lakabubua.”

Manetualain Uman-na nanauku okofefeok

¹⁵ Touk ndia, ana uku basa Manetualain Uman-na dalek boema, noo au kalua tunga lelesuina dulu, boema ana uku okofefeok Manetualain Uman-na.

¹⁶ Ana uku boboan dulu, nenik ai uukun-na, de metel natun dua, limahulu.

^17-19 Basa boema, ana uku boboan kii, boboan kona, ma boboan muli; boboan sila-la, nanalun-nala sama, fo nde metel beke natun dua limahulu.

²⁰ Da'di, Manetualain Uman-na daen-na, neni dae duduik esa, fo balakak, de boboak esa soona, metel natun dua limahulu. Dae duduik ndia, nanapa'a okofefeok nenik papala nanadamak esa, fo sue kande ana ta'da fe'ek dae hehelik soaneu Manetualain-na, neme laun-na daen-na mai.