YESKIAL 41 - Susula Malalaok Hehelu Palak Ma Hehelu Beuk

¹ Touk ndia, noo au leo kama tala'dak-ka neu, fo loken lae Mamana Fo Malalao-malalafuk. Ana uku mangalolok manaleo ndia neu, de nalun-na metel telu,

² ma loan-na metel lima. Papala manai boboan duas, kakaten-na metel dua seselik. Boema ana uku Mamana Fo Malalao-malalafuk ndia, de nalun-na metel duahulu, ma loan-na metel sanahulu.

³ Boema, ana masok leo kama manai dalek-ka neu. Ana uku mangalolok manaleo ndia neu, de nalun-na metel esa, ma loan-na metel telu, ma papala manai boboan duas, kakaten-na metel telu seselik.

⁴ Boema, ana uku kama ndia boe. Kama ndia balakak, de nalun-na metel sanahulu, ma loan-na metel sanahulu. Basa boema, nafa'da au nae, “Kama Fo Malalao-malalafuk nanseli-a nde ia.”

Kama-kama fo nananafofo'ak nai Manetualain Uman-na papala nanadaman lain

⁵ Basa ndia boema, touk ndia, ana uku Manetualain Uman-na, papala nanadaman manai dalek-ka, de katen-na metel telu. Nai papala nanadamak fo, manaokofefeon-na Manetualain Uman-na ndia, hapu kama-kama fo, loloan-nala metel beke duak.

⁶ Kama sila-la ta'dak telu, fo nai ta'dak esa soona, hapu kama teluhulu. Papala nanadamak manai deak-ka, ta'dan-nala ni'is lena neme ta'dak manai dae-la, nalosa kama sila-la, bisa lakatoto'dok, tehu ta paluu tao bolok nai Manetualain Uman ndia, papala nanadaman-na so'on.

⁷ Metema, mete Manetualain Uman-na, papala nanadaman ndia neme deak mai soona, kakaten-na neme dae losa lain, sama. Nai Manetualain Uman-na, papala nanadaman manai deak-ka, fo nai kama sila-la boboan deak, hapu e'dahuuk matuaina dua, de hataholi-la, bisa kae leme ta'dak dae, leo ta'da ka dua ma ka telu leu.

^8-11 Kama sila-la, papala nanadaman manai deak-ka, kakaten-na metel dua seselik. Uma sila-la malelesuk-kala, fo lelesu sila-la leo kama manai Manetualain Uman-na, boboan kii leu, ma lelesu fe'ek-kala, ala leo kama manai boboan konan-nala leu. Nai Manetualain Uman-na boboa-kaisun, hapu emper, fo loloan-na metel dua seselik; dedeman-na, metel telu neme dae lain mai, ma dedeman-na sama no kama-kama manai Manetualain Uman-na, laten-na Nai teras ma uma fo imam-mala pakek-kala tala'da, hapu uma-la lai ndia, fo loan-nala metel sanahulu, nai Manetualain Uman-na boboan kii ma boboan kona.

Uma manai boboak muli-la

¹² Nai uma so'dan muli selik, hapu uma matuaina-la fo nanalun-nala metel haahulu lima, ma loloan-nala metel teluhulu lima, ma papalan-nala kakaten-na, metel dua seselik.

Manetualain Uman-na uuku matetun-na

¹³ Touk ndia, ana uku Manetualain Uman-na nanalun-na, de metel limahulu. Neme Manetualain Uman-na boboan deak, losa uma matuaina manai boboak muli, papala nanadaman deak, lelan-na metel limahulu boe.

¹⁴ Neme Manetualain Uman-na uluk, fo nasale leo dulu neu, no uma so'dan-na nai kii-kona, loloan-na metel limahulu boe.

¹⁵ Touk ndia boeo, ana uku uma matuaina fo, nasale leo uma so'dan muli neu, de loloan-na metel limahulu, fo papala kii-konan, nanalekek nai dalek boe. Kama-kama manai Manetualain Uman-na, kama muka, Mamanak Fo Malalao-malalafuk-ka, ma Mamanak Fo Malalao-malalafuk nanseli,

Kama-kama manai Manetualain Uman-na

¹⁶ nanabalias nenik papak ai, neme laten-na losa jendelan-nala. Jendela sila-la nanalonak nenik tema jendela.

¹⁷ Basa papala manai dalek lala'en-na, nanabalias nenik dodoki-dudulak

¹⁸ ai palem, ma mahahae nusa so'dak, fo ai palem esa nai, mahahae nusa so'dak dua tala'da. Mahahae nusak ndia, mata-panan dua,

¹⁹ de esa, mata-panan hataholi, fo nasale leo ai palem manai boboan kii, ma mata-pana singa-a, nasale leo ai palem manai bobon konan-na neu. Dodoki-dudulak sila-la, lai Manetualain Uman dale lala'en-na,

²⁰ mulai neme uma dalen-na losa lelesu poin lain.

²¹ Mamanak Fo Malalao-malalafuk-ka, diin-nala balakak. Nai Kama Malalao-malalafuk nanseli-a, hapu hata esa, meten soona, sama leo mei tunu-hotuk fo, nanataok neme ai-a mai.

Mei tutunu-hohotuk fo nanataok neme ai-a mai

²² Deman-na, metel esa seselik, ma loan-na, metel esa. Bu'un-nala, buin-na, ma papalan-na, nanataok neme ai-a mai. Touk ndia, nafa'da au nae, “Mei ia nde nai Manetualain matan-na.”

Lelesu-la

²³ Nai mangalolok fo manaleo Mamanak Fo Malalao-malalafuk-ka, pe'dan-na, lelesu esa nai ndia, leondiak boe, nai mangalolok fo manaleo Mamanak Fo Malalao-malalafuk nanseli-a, pe'dan-na, lelesu esa nai ndia boe.

²⁴ Lelesu sila-la, lanuu lelesu dook beke duak, fo soin nai tala'da.

²⁵ Mamanak Fo Malalao-malalafuk-ka, lelesun-nala, nanabalias nenik dodoki-dudulak ai palem, ma mamahaek nusa so'dak, sama leo manai papalan-nala. He'dahuu ai-a, nai kama muka matan-na, fo nai boboan deak.

²⁶ Jendela-la lai papala manai boboan duas, ma papalan-nala, nanabalias nenik dodoki-dudulak ai palem.