YESKIAL 40 - Susula Malalaok Hehelu Palak Ma Hehelu Beuk

NINITAK LA'ENEU Manetualain UMAN-NA NAI TEPO-LELEK MANAMAIK-KA 40:1–48:35 Fo Manakoasa no Yeskial leo Yerusalem neu

¹ Lelek ndia, la'e hataholi Yahudi-la bula ka esan-na, fain sanahulu, fo nai lelek ami nai mamana tu'u-tapak, nai teu ka duahulu liman-na, fo ndia te, Yerusalem kala basa nai teu ka sanahulu haan-na so, au ame'da Manetualain koasan-na, ana koasa-na au, de noo au de au la'o.

² Nai ninitak esa dalek, Manetualain noo au leo dae Israel-la neu, de Ana pe'da au nai lete mademaina esa poin-na. Au ita nai au matang-nga, uma bubuak esa, nalupa kota esa.

³ Boema noo au leo ndia neu, de au ita touk esa mangadilak, sama leo liti-a, napadeik deka lelesuina. Ana ho'u tali uukuk esa, nanatatalik neme aba lutu-a mai, boema ana ho'u ai uukuk.

⁴ Touk ndia, nafa'da au nae, “Hai hataholi daebafak fo, manasapu-manalalok-konei, mamanene matalolole, ma taoafik neu basa hata lala'en fo, au atu'dun neu o, nana hu kande dede'ak ndia de, Manetualain koasan-na, noo o leo ia mai. Mafa'da leoina Israel-la, basa hata fo, neukose o mitan.”

Lelesuina dulu

⁵ Boema au ita papala nanadamak-ka, okofefeo-na Manetualain Uman-na. Touk ndia, mulai uku papala nanadamak ndia, nenik ai uukun fo nalun-na metel telu ndia. Ana hapu papala nanadamak ndia, deman-na metel telu, ma katen-na metel telu boe.

⁶ Basa boema, neu leo lelesuina fo, nasale leo dulu neu. Ana kae tunga e'dahuuk-ka, de ana losa lain boema, ana uku lelesu ndia doon-na, de loan-na metel telu.

^7-10 Nai lelesuina ndia dean-na, hapu mangalolok esa, fo nai mangalolok ndia boboan seli soona, hapu kama naneak telu. Kama sila-la, bekebaba'uk; ma balakak, fo boboan esa soona, nanalun-na metel telu. Papala nanadamak fo, manata'da ba'e kama esa no kama esa, kakaten-na metel dua seselik. Mangalolok ndia, namanalu metel telu seluk leo kama matua fo, mananasale leo Manetualain Uman-na neu. Touk ndia, ana uku kama maloa ndia de, loan-na metel haa; fo nai lelesuina pe'dan dalek, fo nde kama manadeka nanseli no Manetualain Uman-na. Papala nanadamak manai boboan fo, nasale leo Manetualain Uman-na neu-a, kakaten-na metel esa.

¹¹ Basa boema, touk ndia, ana uku mangalolok manai lelesuina, loloan-na, de ana hapu metel nee seselik, ma ana uku lelesuina ndia loan-na boe, de ana hapu metel lima.

¹² Nai kama naneak fo, loloa-nanalun metel beke teluk ndia matan-na, hapu papala nanadama kaba'ok esa, fo deman-na metel seselik esa, ma loan-na metel seselik esa boe.

¹³ Touk ndia, ana uku lelak neme kama naneak esa papala nanadaman deak, leo kama naneak manai kama naneak ndia boboan deak, de ana hapu metel sanahulu dua, senti lima.

¹⁴ Boeo ana uku kama matua ndia: de ana hapu nalun-na, metel sanahulu. Kama ndia lelesun-na, nasale leo Manetualain Uman-na, so'dan deak neu.

¹⁵ Neme lelesuina boboan manai deak-ka lelan-na losa leo kama matuaina, papala nanadaman fo, nasale leo Manetualain Uman-na neu-a, nde been-na metel duahulu lima.

¹⁶ Nai papala nanadamak dea, ma papala nanadamak fo, manata'da ba'e kama sila-la, hapu jendela anak-kala lai ndia. Papala nanadamak-kala boboan dalek, fo manalasale leo mangalolok-ka neu-a, nanabalias nenik dodoki-dudula ai palem.

Manetualain Uma so'dan manai deak-ka

¹⁷ Basa boema, touk ndia noo au tunga lelesuina, leo Manetualain Uman-na, so'dan manai deak-ka neu. Nai papala nanadamak-ka boboan deak, fo manaokofefeon-na Manetualain Uman ndia, ala tao kama teluhulu lai ndia. Hapu uma late batu, nai kama sila-la uluk,

¹⁸ fo ala okofefeo-la, uma so'dak ndia lala'en-na. Uma so'dan manai dalek-ka, dema lena uma so'dan manai deak-ka.

¹⁹ Nai ndia, hapu lelesuina fe'ek, fo napadeik nai mamanak-ka, dema lena, boema nasale leo uma so'dan manai dalek-ka neu. Touk ndia, ana uku lelesuina ka duak sila-la lelan-na, de ana hapu metel limahulu.

Lelesuina kii

²⁰ Basa boema, touk ndia, ana uku lelesuina kii, fo manaleo uma so'dan manai dalek-ka neu.

²¹ Kama naneak telu lai lelesuina ndia boe, fo lai mangalolok-ka boboan beke selik. Papala nanadamak manata'da ba'ek-kala, boema kama matuainan-na, basa-basas uukun-nala, sama no manai lelesuina dulu. Basa lelesuina manai mangalolok ndia lala'en-na, nalun-nala metel duahulu lima, ma loan-nala, metel sanahulu dua senti lima.

²² Leondiak boe, kama matuainan-na, jendelan-nala, ma dodoki-dudula ai palem-nala, sama no manai lelesuina dulu. E'dahuuk esa, anak hitu, leo lelesuina ndia neu, ma nai pe'dan-na, hapu kama matuaina, fo nasale leo Manetualain Uman-na so'dan manai deak-ka neu.

²³ Hapu lelesuina fe'ek, nasasale matak no lelesuina kii, fo leo uma so'dan manai dalek-ka neu, sama-na leo manai lelesuina dulu boboan-na. Hataholi ndia, ana uku lelesuina ka duak sila-la, lelan-na, de ana hapu metel limahulu.

Lelesuina kona

²⁴ Basa boema, touk ndia noo au leo, lelesuina kona neu, de ana ukun. Ana hapu lelesuina ndia uukun-na, sama no lelesuina fe'ek-kala.

²⁵ Jendela manai kaman-nala, sama no manai lelesuina fe'ek-kala. Lelesuina ndia, mangalolon-na, nanalun-na metel duahulu lima, ma loloan-na metel sanahulu dua, senti lima.

²⁶ E'dahuuk esa, anak hitu, leo lelesuina ndia neu, ma kama matuainan-na, nai pe'dan-na boe, fo nasale leo Manetualain Uman-na, so'dan manai deak-ka neu. Papala nanadaman manai boboan dalek-kala, lasale leo mangalolok-ka leu, fo nanabalias nenik dodoki-dudulak ai palem.

²⁷ Nai ndia, hapu lelesuina leo uma so'dan manai dalek-ka neu boe. Touk ndia, ana uku lelesuina ka duak sila-la, lelan-na, de ana hapu metel limahulu.

Lelesuina kona, fo leo uma so'dan manai dalek-ka neu

²⁸ Basa boema, touk ndia noo au tunga lelesuina kona, de ami masok leo uma so'dan manai dalek-ka meu. Ana uku lelesuina ndia, de uukun-na sama no lelesuina manai boboan deak-kala.

^29-30 Kama nanean-nala, kama matuainan-nala, ma papala nanadaman manai dalen-nala, sama no uukuk manai lelesuina fe'ek-kala. Kama manai lelesuina ia-la boeo, lanuu jendela. Lelesuina ndia, mangalolon-na, nanalun-na metel duahulu lima, ma loloan-na, metel sanahulu dua, senti lima.

³¹ Tehu kama matuainan-na, nasale leo uma so'dan manai deak-ka neu. Papala nanadaman manai boboan dalek-kala, lasale leo mangalolok-ka leu, fo nanabalias nenik dodoki-dudula ai palem boe. E'dahuuk esa, anak falu, leo lelesuina ndia neu.

Lelesuina dulu fo leo uma so'dan manai dalek-ka neu

³² Basa ndia boema, touk ndia noo au tunga lelesuina dulu, de ami masok leo uma so'dan manai dalek-ka meu. Ana uku lelesuina ndia, de uukun-na sama no lelesuina fe'ek-kala.

³³ Kama nanean-nala, papala nanadaman manai dalen-nala, ma kama matuainan-nala, uukun-nala sama no uukuk manai lelesuina fe'ek-kala. Nai kaman sila-la, ma nai kama matuaina-na, hapu jendela. Lelesuina ndia mangalolon-na, nanalun-na metel duahulu lima, ma loloan-na metel sanahulu dua, senti lima.

³⁴ Kama matuainan-na, nasale leo uma so'dan manai deak-ka neu. Papala nanadaman manai boboan dalek, fo nasale leo mangalolok-ka neu, nanabalias nenik dodoki-dudula ai palem. E'dahuuk esa, anak falu, leo lelesuina ndia neu.

Lelesuina kii fo leo uma so'dan manai dalek-ka neu

³⁵ Mate'en-na, touk ndia noo au leo lelesuina kii neu. Ana uku lelesuina ndia, de uukun-na sama no lelesuina fe'ek-kala.

³⁶ Boeo kama nanean-nala, papala nanadaman manai dalen-na, ma kama matuainan-na, sama no manai lelesuina fe'ek-kala. Nai kaman-nala, ma nai kama matuainan-na, hapu jendela. Lelesuina ndia mangalolon-na, nanalun-na metel duahulu lima, ma loloan-na metel sanahulu, senti lima.

³⁷ Kaman manai uluk-ka, nasale leo uma so'dan manai deak-ka neu boe. Papala nanadaman manai boboan dalek, fo nasale leo mangalolok-ka neu, nanabalias nenik dodoki-dudula ai palem. E'dahuuk esa, anak falu, leo lelesuina ndia neu.

Uma-uma fo manadeka loo lelesuina kii

³⁸ Nai uma so'dan deak, hapu kama nanatamak esa, nai lelesuina dalek-ka, boboan kii. Nai kama nanatamak ndia, hapu lelesu esa leo kama matuaina neu. Basa bana soaneu tutunu-hohotu nanatunuk-ka, nanasafek lai ndia.

³⁹ Hapu mei haa lai kama matuaina ndia dalek, fo boboan esa-na, mei dua. Nai mei sila-la lain nde, ala do'do bana soaneu tutunu-hohotu nanatunuk, do tutunu-hohotuk fo, sala-singok hapu do'o do ampon, do tutunu-hohotu bae hutak.

⁴⁰ Nai kama matuaina ndia deak, hapu seluk mei haa, fo nai lelesuina kii ndia, boboan esa-na, mei dua.

⁴¹ Da'di, nai mamana do'do bana tutunu-hohotuk-ka, hapu mei falu, fo haa lai dalek, ma haa lai uma so'dan manai deak-ka.

⁴² Mei ka haak manai kama nanatamak fo, nanapakek soaneu sadia tutunu-hohotu nanatunuk-ka, nanapa'ak neme batu mai. Mei sila-la deman-na, senti limahulu, ma poin-na balakak, ma nanalu-lalaon senti beke hituhulu limak. Dope-felas soaneu do'do nenik bana tutunu-hohotuk-kala, nanape'dak lai mei sila-la lain.

⁴³ Mei sila-la su'udoon-nala, loloan-na mili hituhulu lima. Basa paa fo neukose nanatunu-hotuk-kala, nanape'dak lai mei sila-la lain.

⁴⁴ Basa boema, touk ndia noo au leo uma so'dan manai dalek-ka neu. Nai ndia, hapu uma dua, nanataok neme ai mai, de esa nai lelesuina kii boboan-na, fo nasale leo kona neu, ma esa nai lelesuina kona boboan-na, fo nasale leo kii neu.

⁴⁵ Touk ndia nafa'da au, nae uma ai fo nasale leo kona neu ndia, nanasadiak soeneu basa imam fo, manamalalau-maoono nai Manetualain Uman-na,

⁴⁶ ma uma ai fo nasale leo kii neu-a, nanasadiak soaneu basa imam fo, manamalalau-maoono nai mei tunu-hotuk-ka. Basa imam sila-la, muse leme Zadok tititi-nonosin-nala mai. Nana neme leo Lewi-a mai, ka'da Zadok tititi-nonosin nde bole deka loo Manetualain fo lalalau-laoonon nai makaluku-makatele-a dalek.

Uma so'dan manai dalek-ka, ma Manetualain Uman-na

⁴⁷ Touk ndia, ana uku uma so'dan manai dalek-ka. Uma so'dak ndia balakak: nalun-na metel limahulu, ma loan-na metel limahulu. Manetualain Uman ndia, nai boboak muli, ma mei tunu-hotuk esa nai matan-na.

^48-49 Basa boema, noo au leo kama manai Manetualain Uman-na uluk neu, de ami kae tunga he'dahuu anak de'ubee. Ana uku kama masok-ka, de loloan-na, metel sanahulu hitu seselik, ma papala manai boboan duas, de kakaten-na, metel esa seselik. Nai boboan kii, boboan kona, hapu dii nanadamak esa. Kama manai uluk ndia mesak-kana, nalun-na metel sanahulu, ma loan-na metel nee.