YESKIAL 4 - Susula Malalaok Hehelu Palak Ma Hehelu Beuk

Yeskial fe natutu'duk la'eneu lakahapi-la Yerusalem

¹ Manetualain nafa'da nae, “Hai, hataholi daebafak fo, manasapu-manalalok-konei, ho'i-ma batu bata esa, fo pe'dan neu o matam-ma, fo dokik kota Yerusalem-ma dulan-na neu lain

² Boema, dokik-ma musu-a, nakahapi-na kota Yerusalem-ma no oelolok-kala, dae madodouk-kala, solda'du-la uma ofun-nala, ma pe'da taka-besi okofefeo-la papala nanadaman-na.

³ Boema ho'i-ma ulebesi esa, fo mapadedeik-kana neu o ma kota ndia tala'da, fo ana da'di papala besi. Basa soona, masale leo kota ndia fo nono'kabai, o nde makahapi-ma kota ndia. Neukose ndia da'di dulak ba'eneu leoina Israel-la.

^4-5 Soona mangape'uk menik o boboa kiim-ma, fo Au fe leoina Israel-la salan-na tuni-ndeni-na o. Neukose o mangape'uk leondiak, faik natun telu siohulu, fo o doi-doso, nanahu sila salan-na. O mangape'uk leondiak faik esa soona, belin-na ba'u leoina Israel-la huhukun teuk esa.

⁶ Basa ndia soona, o mangape'uk menik o boboa konam-ma, faik haahulu dalen-na, fo mame'da mita huhukuk soaneu hataholi Yehuda-la salan-na, fo faik esa soona, belin-na ba'u sila huhukun teuk esa.

⁷ Mete musu-a nakahapi-na Yerusalem. Kukumu o limam-ma, fo matu'dun leo kota ndia neu, fo manduku-malosak Au hala hehelung-nga la'eneu huhukuk ba'eneu sila.

⁸ Neukose Au henge o, nalosa o ta hapu masafali o boboa kiim-ma, leo o boboa konam-ma neu, do o masafali o boboa konam-ma leo o boboa kiim-ma neu fa, losa musu-a hahae nakahapi-na kota ndia.

⁹ Besak ia, ho'i-ma gandum, jelei, fufue pilas de'e matua, fufue pilas de'e ana, fufue sekoi, ma gandum sopuk. Sese'dok makabubuas, fo tao loti. O nana'am-ma nde ndia, nai lelek o mangape'uk menik o boboa kiim-ma, nai faik natun telu siohulu dalen-na ndia.

¹⁰ O muse ba'e tao loti ndia tao leo beek, fo faik esa soona, o mu'a ka'da gram natun dua teluhulu. Ta bole lenak neme ndia mai fa.

¹¹ O muse ba'e, o oe nininum-ma boe, fo faik esa soona, minu galatee dua.

¹² Taom-ma ha'i nenik hataholi daebafak-ka tein-na, fo ana da'di mina dae. Tunu o lotim-ma, nai ha'i ndia lain, fo mu'an nai basa hataholi-la matan.”

¹³ Manetualain nafa'da nae, “Enon-na leondiak, ba'eneu hataholi Israel-la la'a nana'ak fo, Musa hoholo-lalanen kena-ka'in, nai lelek Au tu'u-tapahenis leo nusa dea-la leu.”

¹⁴ Tehu au ataa ae, “Awi, Manetualain Fo Mademaina! Neme au bei anang-nga mai, losa besak ia, au beita tao anggenggeo au aoinang-nga, nenik au u'a bana mates popolan-na, do bana fuik-kala la'a ela paa-la fa. Au beita u'a ita nana'ak fo, nanakena-ka'ik-ka.”

¹⁵ Boema, Manetualain nafa'da nae, “Hei, Au nggati hataholi daebafak-ka tein-na, nenik sapi teik, fo o bole paken, soaneu tunu menik o lotim-ma.”

¹⁶ Basa boema, nafa'da seluk nae, “Hai, hataholi daebafak fo, manasapu-manalalok-konei, neukose Au tao akalulutuk, mamana pepe'da nana'ak manai Yerusalem-ma. Neukose ala uku sila nana'an-na, ma sila oe nininun-na, fo la'a-linu no dalen-nala ta tesa-tama fa.

¹⁷ Neukose ketu namahehenan-nala, nanahu basa lotin-nala, ma basa oe nininun-nala, de mate'en-na mates, hu kande sala-singon-nala.”